03 iyul, 2020

AMEA əməkdaşlarının Web of Science və Scopus elmi bazalarında indeksləşən jurnallarda dərc olunan məqalələri müəyyənləşdiriləcək

Son illər AMEA-da elmin informasiya bazasının gücləndirilməsi, alimlərin beynəlxalq əlaqələrinin inkişaf etdirilməsi, onların nüfuzlu elmi bazalarda indeksləşən jurnallarda əsərlərinin sayının artırılması məqsədilə mühüm tədbirlər həyata keçirilir.

Bu tədbirləri davam etdirmək, eyni zamanda, AMEA alimlərinin sosial müdafiəsini gücləndirmək, onları daha yüksək səviyyəli elmi tədqiqatlar aparmağa həvəsləndirmək məqsədilə AMEA-nın prezidenti, akademik Ramiz Mehdiyev 22 iyun 2020-ci il tarixində “2019-cu ildə Web of Science və Scopus elmi bazalarında indeksləşən jurnallarda dərc olunan məqalələrin müəyyənləşdirilməsi haqqında” Sərəncam imzalayıb.

Sərəncamda AMEA-nın elmi bölmələrinə tabeliklərində olan müəssisələrin əməkdaşları tərəfindən 2019-cu ildə Web of Science və Scopus elmi bazalarında indeksləşən jurnallarda dərc olunan məqalələrin siyahısının müvafiq formaya uyğun hazırlanıb bir ay müddətində AMEA Rəyasət Heyəti aparatının Elm və təhsil idarəsinə təqdim etmələri tapşırılıb.

Sənədə əsasən, Elm və təhsil idarəsinə təqdim olunmuş məqalələrin həmin idarənin Elmi-analitik şöbəsi tərəfindən müvafiq qaydada təhlil edilməsi və akademiya üzrə yekun siyahının hazırlanaraq AMEA-nın prezidentinə təqdim edilməsi həvalə olunub.

Mənbə: www.science.az.

02 iyul, 2020

AMEA və Monpelye Universitetinin alimlərindən ibarət birgə komissiyanın onlayn görüşü keçirilib

AMEA və Fransanın Monpelye Universiteti arasında imzalanmış əməkdaşlıq sazişi əsasında 2020-2022-ci illər üçün elan edilmiş müştərək doktorantura proqramına namizədlərin seçimi üzrə birgə komissiyanın onlayn formatda görüşü keçirilib.

Onlayn görüşdə AMEA tərəfindən komissiyanın sədri – AMEA-nın birinci vitse-prezidenti, akademik İbrahim Quliyev, üzvlər – AMEA-nın vitse-prezidenti, akademik İradə Hüseynova, AMEA-nın akademik-katibi, AMEA-nın müxbir üzvü Əminağa Sadıqov və AMEA Rəyasət Heyəti aparatının Xarici əlaqələr idarəsinin rəisi, biologiya üzrə fəlsəfə doktoru Esmira Əlirzayeva iştirak edib.

İclasda Monpelye Universitetini komissiyanın sədri – bu ali müəssisənin Beynəlxalq əlaqələr üzrə vitse-prezidenti, professor Patrick Caron, üzvlər – biologiya və ətraf mühit (CBS2 və GAİA) üzrə sahələrə məsul doktorluq təşkilatlarından professorlar Eric Julien və Valerie Micard, eləcə də universitetin Beynəlxalq əlaqələr idarəsinin rəis müavini Nadia Lagarde təmsil edib.

Müştərək doktorantura proqramına təqdim edilmiş mövzular üzrə ilkin seçim mərhələlərindən uğurla keçmiş namizədlər birgə komissiyanın qarşısında təqdimatla çıxış edib, komissiya üzvlərinin suallarını cavablandırıblar.

Fikir mübadiləsi məqsədilə AMEA və Monpelye Universiteti tərəfindən komissiya üzvlərinin ayrılıqda müzakirəsi keçirilib. Tərəflər yenidən bir araya gələrək qərarlarını təqdim edib və müzakirə əsasında ümumi nəticəyə gəliblər.

Seçilmiş namizədlər təhsil müddətinin 2 ilini Monpelye Universitetində, 1 ilini AMEA-da tamamladıqdan sonra həm Azərbaycan, həm də Fransa tərəfindən fəlsəfə doktoru diplomlarına layiq görülmək hüququ qazanırlar.

Qeyd edək ki, 2018-ci ildən bu proqram üzrə 4 doktorant təhsilini Monpelye Universitetində davam etdirir.

 

Mənbə: www.science.az.

25 iyun, 2020

AMEA Biofizika İnstitutunun Elmi Şurasının növbəti iclası keçirilib

25 iyun 2020-ci il tarixində AMEA Biofizika İnstitutunun Elmi Şurasının növbəti iclası keçirilib.

İclası institutun direktoru, AMEA-nın müxbir üzvü, fizika-riyaziyyat elmləri doktoru, professor Oktay Qasımov açaraq Şura üzvlərini gündəlikdəki məsələlərlə tanış edib.

Gündəlikdə yer alan ilk məsələ 11 mart 2020-ci ildə “Respublika” qəzetində elan olunmuş müsabiqədə vakant vəzifələri tutmaq üçün sənəd təqdim etmiş iddiaçıların seçkisinin keçirilməsi ilə bağlı olub. Şuranın iclasında elmi işçi və böyük elmi işçi vəzifələrinə açıq, laboratoriya müdiri və aparıcı elmi işçi vəzifələrinə isə gizli səsvermə keçirilib. Səsvermənin nəticələrinə əsasən, b.ü.e.d. Kərim Quli oğlu Qasımov “Molekulyar və hüceyrə biokimyası” laboratoriyasına müdir, b.ü.e.d., prof. Tokay Məhərrəm oğlu Hüseynov “Ekoloji biofizika” laboratoriyasına müdir, f.r.e.n., dosent Rasim Bəxtiyar oğlu Aslanov “Biomolekulların strukturu, dinamikası və funksiyası” laboratoriyasına aparıcı elmi işçi, b.ü.f.d., dosent Mürsəl Zübayil oğlu Dadaşov “Ekoloji biofizika” laboratoriyasına aparıcı elmi işçi, b.e.n. Sevinc Haqverdi qızı Cəfərova “Ekoloji biofizika” laboratoriyasına böyük elmi işçi, Arzu Hətəmşah qızı Aydəmirova “Biomolekulların strukturu, dinamikası və funksiyası” laboratoriyasına elmi işçi, Sevinc Yavus qızı Hüseynova “Ekoloji biofizika” laboratoriyasına elmi işçi vəzifəsinə seçiliblər.

Qərara alınıb ki, laboratoriya müdiri və aparıcı elmi işçi vəzifələrinə səsvermənin nəticələri  təsdiq edilməsi üçün AMEA-nın Fizika-Riyaziyyat və Texnika Elmləri Bölməsinə  təqdim olunsun.

Daha sonra iclasda 2019-2020-ci tədris ilində Biofizika İnstitutuna qəbul olunmuş doktorant və dissertantların fərdi iş planlarının təsdiqi məsələsi və fəlsəfə doktoru hazırlığı üzrə dissertantların attestasiyasının nəticələri müzakirə olunub, müvafiq  qərarlar qəbul edilib.

Sonda bir sıra cari məsələlər müzakirə olunub.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

25 iyun, 2020

Xüsusi karantin rejiminin sərtləşdirilməsi ilə bağlı AMEA-nın iş rejimində məhdudiyyətlər tətbiq edilib

Məlum olduğu kimi, Azərbaycan Respublikası Nazirlər Kabinetinin “Bakı, Sumqayıt, Gəncə, Lənkəran, Yevlax, Masallı, Cəlilabad şəhərlərinin və Abşeron rayonunun ərazisində xüsusi karantin rejiminin sərtləşdirilməsi ilə bağlı əlavə tədbirlər barədə” 2020-ci il 19 iyun tarixli qərarına əsasən, xüsusi karantin rejiminin sərtləşdirilməsini təmin etmək üçün sözügedən şəhər və rayonların ərazisində 2020-ci il 21 iyun saat 00:00-dan 5 iyul saat 06:00-dək məhdudiyyətlər tətbiq edilib.

Bunları nəzərə alaraq, AMEA prezidenti, akademik Ramiz Mehdiyev 22 iyun 2020-ci il tarixində “Xüsusi karantin rejiminin sərtləşdirilməsi ilə bağlı Azərbaycan Milli Elmlər Akademiyasının iş rejimində məhdudiyyətlərin tətbiq edilməsi haqqında” Sərəncam imzalayıb.

Sərəncama əsasən, AMEA-nın elmi müəssisə, təşkilat və xidmətlərində karantin rejimi müddətində işçilərin onların ümumi sayının 20 faizindən çox olmamaq şərti ilə həftələr üzrə qrafik müəyyən edilməklə növbəlilik qaydasında işə cəlb edilməsinə icazə verilir.

Sənəddə, həmçinin iş rejiminin saat 10:00-dan 19:00-dək müəyyən olunması və yaşı 65-dən yuxarı olan işçilərin işə cəlb edilməsinə yol verilməməsi qeyd olunub.

Sərəncamda işə cəlb edilmiş işçilərin “COVID-19” infeksiyası ilə bağlı sanitar-epidemioloji qaydalara və karantin şəraitinin tələblərinə ciddi riayət etmələrinin təmin edilməsi, eləcə də yay mövsümü üzrə əmək məzuniyyəti qrafikinə uyğun olaraq işçilərə əmək məzuniyyətinin verilməsinin həyata keçirilməsi də əksini tapıb.

Mənbə: www.science.az.

24 iyun, 2020

AMEA Biofizika İnstitutunun ştatında vakant elmi işçi vəzifələrini tutmaq üçün Müsabiqə komissiyasının qərarı

22 iyun 2020-ci il tarixində “AMEA Biofizika İnstitutunun ştatında vakant elmi işçi vəzifələrini tutmaq üçün (“Respublika” qəzeti 11 mart 2020-ci il) Müsabiqənin keçirilməsi” məqsədi ilə Müsabiqə komissiyasının ekspert iclası keçirilib. İclasda ekspertizadan keçmiş, müsabiqədə iştirak etmək hüququ qazanmış iddiaçıların sıyahısı təqdim edilib.

Müsabiqə komissiyasının qərarına əsasən institutun ştatında olan vakant elmi işçi vəzifələrini tutmaq üçün müsabiqəyə buraxılır:

1. Laboratoriya müdiri – b.ü.e.d. Kərim Quli oğlu Qasımov, “Molekulyar və hüceyrə biokimyası” laboratoriyası üzrə;

2. Laboratoriya müdiri – b.ü.e.d., prof. Tokay Məhərrəm oğlu Hüseynov, “Ekoloji biofizika” laboratoriyası üzrə;

3. Aparıcı elmi işçi – f.r.e.n., dosent Rasim Bəxtiyar oğlu Aslanov, “Biomolekulların strukturu, dinamikası və funksiyası” laboratoriyası üzrə;

4. Aparıcı elmi işçi – b.ü.f.d., dosent Mürsəl Zübayil oğlu Dadaşov, “Ekoloji biofizika” laboratoriyası üzrə;

5. Böyük elmi işçi – b.e.n. Sevinc Haqverdi qızı Cəfərova, “Ekoloji biofizika” laboratoriyası üzrə;

6. Elmi işçi – Arzu Hətəmşah qızı Aydəmirova, “Biomolekulların strukturu, dinamikası və funksiyası” laboratoriyası üzrə;

7. Elmi işçi – Sevinc Yavus qızı Hüseynova, “Ekoloji biofizika” laboratoriyası üzrə.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

17 iyun, 2020

AMEA Biofizika İnstitutunda fəlsəfə doktoru hazırlığı üzrə dissertantların attestasiyası keçirildi

17 iyun 2020-ci il tarixində AMEA-nın Biofizika İnstitutunda fəlsəfə doktoru hazırlığı üzrə dissertantların attestasiyası keçirildi.

Xüsusi karantin rejiminə uyğun olaraq tibbi maskadan istifadə və sosial məsafə gözlənilməklə baş tutan tədbirdə fəlsəfə doktoru hazırlığı üzrə 3 dissertant AMEA-nın müxbir üzvü, institutun direktoru, professor Oktay Qasımovun 09 iyun 2020-ci il tarixli 63 saylı əmri ilə yaradılmış Attestasiya Komissiyası qarşısında 2019-cu tədris ili ərzində yerinə yetirdikləri elmi-tədqiqat işləri barədə hesabat verdilər.

Attestasiya Komissiyasının qərarı ilə fərdi iş planlarında nəzərdə tutulan işlər tam həcmdə yerinə yetirildiyindən dissertantlar Vəfa Atayeva, Arzu Aydəmirova, Sevinc Hüseynova növbəti tədris ilinə attestasiyadan keçirildi.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

16 iyun, 2020

Elmi Şuranın növbəti iclası keçiriləcək

25 iyun 2020-ci il tarixində saat 10:00-da Biofizika İnstitutunda Elmi Şuranın növbəti iclası keçiriləcək.

İclasda aşağıdakı məsələlərə baxılacaq:

  1. AMEA Biofizika İnstitutunda elan olunmuş vakant elmi işçi vəzifələrini tutmaq üçün (“Respublika” qəzeti 11 mart 2020-ci il) müsabiqənin keçirilməsi;
  2. AMEA Biofizika İnstitutunun dissertantlarının attestasiyası nəticələrinin müzakirəsi və təsdiqi;
  3. 2019-2020-ci tədris ilində Biofizika İnstitutuna qəbul olunmuş doktorant və dissertantların fərdi iş planlarının müzakirəsi və təsdiqi;
  4. 2022-ci ildə Bakı şəhərində keçiriləcək 73-cü Beynəlxalq Astronavtika Konqresi haqqında məlumat;
  5. Cari məsələlər.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

16 iyun, 2020

AMEA-da yay imtahan sessiyası iyunun 22-dən iyulun 20-dək keçiriləcək

AMEA-nın prezidenti, akademik Ramiz Mehdiyev 12 iyun 2020-ci il tarixində “Yay imtahan sessiyasının keçirilməsi haqqında” Sərəncam imzalayıb.

Sərəncama əsasən, AMEA-da fəlsəfə doktoru hazırlığı üzrə doktorluq imtahanlarının keçirilməsi məqsədilə ixtisas, xarici dillər və Azərbaycan dili (xarici vətəndaşlar üçün) fənlərindən doktorluq imtahanlarının qəbulu ilə bağlı yay imtahan sessiyasının 2020-ci il iyunun 22-dən iyulun 20-dək keçirilməsi nəzərdə tutulur. Doktorluq imtahanları AMEA Rəyasət Heyətinin qərarı ilə təsdiq edilmiş fənn proqramlarına uyğun olaraq karantin rejiminin tələblərinə riayət edilməklə ənənəvi qaydada, zərurət olduqda isə onlayn keçiriləcək.

Həmçinin ixtisas fənni üzrə doktorluq imtahanlarını qəbul etmək məqsədilə elmi müəssisələrdə imtahan komissiyaları yaradılacaq.

İngilis dilindən doktorluq imtahanları AMEA Rəyasət Heyətinin 4 mart 2015-ci il tarixli qərarına uyğun olaraq akademik IELTS proqramı üzrə, alman və fransız dillərindən isə AMEA prezidentinin 9 oktyabr 2019-cu il tarixli sərəncamına uyğun olaraq keçiriləcək.

Mənbə: www.science.az.

16 iyun, 2020

Fizika-Riyaziyyat və Texnika Elmləri Bölməsinin Elmi Şurasının iclasında bir sıra prioritet məsələlər müzakirə olunub

İyunun 12-də AMEA-nın Fizika-Riyaziyyat və Texnika Elmləri Bölməsinin (FRTEB) Elmi şurasının onlayn iclası keçirilib.

Tədbirdə AMEA-nın vitse-prezidenti, Elmi şuranın sədri, akademik Rasim Əli­qu­li­yev, şu­ra üzv­lə­ri, bölmənin tərkibinə daxil olan elmi müəssisələrin rəhbərləri və aidiyyəti şəxslər iştirak edib­lər.

Əvvəlcə akademik R.Əliquliyev gündəlikdəki məsələləri iclas iştirak­çı­la­rı­nın diq­qə­tinə çatdırıb.

O, bir müddət öncə Prezident İl­ham Əli­ye­vin imza­la­dı­ğı müvafiq Sərəncamlara əsasən, Azər­baycanda el­min inkişafına göstərdikləri xid­mət­lərə görə aka­­demik Fik­rət Əliyevin Azərbaycan Res­pub­­li­ka­sı­nın “Əməkdar elm xadimi” fəx­ri adına layiq gö­rül­düyünü, akademik Yusif Məm­­mədovun 2-ci də­rə­cəli “Əmək” ordeni, akademik Adil Qəribovun və AMEA-nın müxbir üzvü Aydın Ka­zım­zadənin “Şöh­rət” or­den­i­ ilə təltif olunduqlarını bildirib.

Elmi şuranın sədri, həmçinin Prezident İlham Əliye­vin 22 may 2020-ci il tarixli Sərəncamı ilə akademik Nazim Məmmədovun, professor İma­məddin Əmiraslanovun, f.e.d., dosent Nadir Abdullayevin və Ziya Əliyevin həmmüəllifi olduqları “Ma­teriyanın yeni kvant halı – antiferromaqnit topoloji izolyator: dizayn, əsas elektron xas­sələri və tətbiq perspektivləri” mövzusunda elmi məqalələr toplusuna Azərbaycan Res­pub­likasının elm sahəsində Dövlət Mükafatının verildiyini diqqətə çatdırıb.

Təltif olunan bölmə üzvləri dövlət başçısı İlham Əliyevə və AMEA-nın prezidenti, akademik Ramiz Mehdiyevə Azərbaycan elminə və alimlərimizə gös­­tər­dik­­ləri diqqət və qayğıya görə minnətdarlıqlarını bildiriblər.

Daha sonra akademik R.Əliquliyev AMEA-nın 10 iyun 2020-ci il ta­rixində keçirilmiş Ümu­­mi yığıncağının FRTEB qarşısında müəy­yən­ləş­dir­diyi vəzifələr haqqında ət­raflı mə­lu­mat verib. Qeyd edib ki, bölmənin elmi müəssisələri tərəfindən irəli sürülmüş bir sıra mühüm təkliflər Ümumi yığıncaqda geniş müzakirə olunmuş və bu barədə qərarlar qəbul edilmişdir.

Onlayn iclasın gündəliyində yer alan növbəti məsələ FRTEB üzrə məqsədli elmi proqramların müzakirəsi olub. Elmi şuranın üzvləri FRTEB-in elmi tədqiqat müəssisələrinin məqsədli elmi proqramlarının AMEA-nın Rəyasət Heyətinə təqdim edilməsini qərara alıblar.

Tədbirdə, həmçinin bir sıra elmi-təşkilati məsələlərə baxılıb. Belə ki, “AMEA-nın 2020-2025-ci illər üçün inkişaf proqramı”nın icrası ilə bağlı Tədbirlər planı, həmçinin FRTEB-in elmi müəssisələrinin koronavirus pandemiyası və onunla əlaqədar problemlərə dair təklifləri geniş müzakirə olunub, müvafiq qərarlar qəbul edilib.

Bu ilin mart ayında Türkmənistan Prezidenti Qurbanqulu Berdiməhəmmədovun öl­kəmizə rəsmi səfəri çərçivəsində ikitərəfli əməkdaşlığı özündə ehtiva edən çoxsaylı sənəd­lərin imzalandığını xatırladan R.Əliquliyev AMEA-nın İdarəetmə Sistemləri İnstitutu (İSİ) ilə Türkmənistan Elmlər Akademiyasının Seysmologiya və Atmosfer Fizikası İnstitutu arasında qəbul edilən anlaşma memorandumundan danışıb.

Məsələ ilə bağlı çıxış edən İSİ-nin direktoru, akademik Telman Əliyev qeyd edib ki, bu sənəd əsa­sın­da “Zəlzələnin başlanmasının seysmoakustik nois monitorinqi və onun ocağının zonası ba­rə­də xəbərdarlıq sistemi” adlı layihənin yerinə yetirilməsi nəzərdə tutulub. “Layihəyə əsa­sən,  həm Türkmənistanda, həm də Azərbaycanda bir neçə seysmoakustik stansiya tikil­mə­lidir. Bundan başqa, hər iki ölkənin stansiyalarında monitorinq mərkəzi və qərar qəbuletmə sistemi olmalıdır”, – deyə alim əlavə edib.

Daha sonra Biofizika İnstitutunun direktoru, AMEA-nın müxbir üzvü Ok­tay Qasımov “Hüceyrə texnologiyalarının inkişafı” proqramı haqqında ətraflı məlumat verib. FRTEB-in Elmi şurası AMEA-nın Rəyasət Heyəti qarşısında “Hüceyrə texnologiyalarının inkişafı” proqramı barədə vəsatət qal­dı­rılmasını qərara alıb.

Elmi şuranın üzvləri Rusiya Federasiyasının Dubna şəhərində yerləşən Birləşmiş Nüvə Təd­qiqatları İnstitutu ilə bağlanmış müqaviləyə əsasən, Fizika İnstitutunun böyük elmi işçisi Faiq Əhmədovun və elmi işçisi Nur­lan Abbaslının orada apardıqları birgə elmi təd­qi­qat­­ların davam etdiyi­ni nəzərə alaraq, onların ezamiyyətinin bir il müddətinə uzadılması ba­rədə AMEA-nın Rəyasət He­yəti qarşısında vəsatət qaldırılmasını qərara alıblar.

Onlayn iclasda bir sıra həlli vacib olan məsələlər müzakirə olunub, suallar cavab­lan­dı­rılıb.

Mənbə: www.science.az.

12 iyun, 2020

AMEA-nın Biofizika İnstitutu yenidən dezinfeksiya olunub

İyunun 12-də koronavirus (COVID-19) infeksiyasının yayılmasının qarşısının alınması məqsədilə AMEA Biofizika İnstitutunun iş və laboratoriya otaqlarında yenidən dezinfeksiya işləri aparılıb.

Qeyd edək ki, İnstitutda Nazirlər Kabineti yanında Operativ Qərargahın qaydalarına ciddi riayət edilir, qabaqlayıcı tədbirlər görülür. Belə ki, mövcud profilaktik vəziyyət nəzərə alınaraq qoruyucu tibbi maska və dezinfeksiya vasitələrindən istifadə olunur, müəyyən olunmuş sosial məsafəyə də diqqət yetirilir.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

12 iyun, 2020

“Elm” qəzetinin 7-ci və 8-ci sayları işıq üzü görüb

AMEA Rəyasət Heyətinin mətbu orqanı olan “Elm” qəzetinin 7-ci və 8-ci sayları çapdan çıxıb.

Qəzetin ilk səhifələrində Prezident İlham Əliyevin “2020-ci il üçün Azərbaycan Respublikasının elm sahəsində Dövlət Mükafatının verilməsi haqqında”, “Beşbarmaq dağı” Dövlət Tarix-Mədəniyyət və Təbiət Qoruğunun yaradılması haqqında” sərəncamları və bir sıra fərmanları yer alıb.

Nəşrin növbəti səhifələrində AMEA-nın onlayn Ümumi yığıncağı, həmçinin Rəyasət Heyətinin onlayn iclası, akademiyada ölkə başçısının çağırışlarına əsaslanan sistemli tədqiqatlara başlanılması, Humanitar və İctimai Elmlər Bölməsinin Elmi şurasının onlayn tədbiri, Azərbaycan və Belarus arasında elmi-texniki əməkdaşlıq üzrə İşçi Qrupun onlayn formatda üçüncü iclası, “İnsan genetikası və genetik xəstəliklər: problemlər və inkişaf perspektivləri” mövzusunda onlayn beynəlxalq konfrans və s. barədə materiallar əks olunub.

Bundan əlavə, oxucular qəzetdə “Vətənin qurtuluş savaşına başçılıq edən lider”, “Pandemiya ilə mübarizədə yeni mərhələ: minnətdarlıq və məsuliyyət”, “Pandemiya dövrü Azərbaycan dövlətçiliyinin uğurlu sınağı oldu”, “Postpandemiya, yaxud postamneziya dövrü”, “Pandemiya şəraitində immunitetin təbii üsullarla gücləndirilməsi yolları”, “Nadir şahın qətli üzərindən sirr pərdəsinin götürülməsinə xidmət edən dəyərli nəşr”, “Dördüncü Sənaye İnqilabı”, “Ölkənin ilk veb-portalı Science.az 25 illik yubileyini qeyd edir” adlı məqalələr, həmçinin fındıq qabığından bioekstraktın alınmasına dair müsahibə, region xəbərləri, yeni nəşrlər və s. məlumatlarla tanış ola bilərlər.

24 səhifəlik qəzetdə rus dilində maraqlı məqalələr də yer alıb.

Qeyd edək ki, 1984-cü ildən nəşr olunmağa başlayan “Elm” qəzetinin baş redaktoru İctimaiyyətlə əlaqələr, mətbuat və informasiya şöbəsinin müdiri, filologiya üzrə fəlsəfə doktoru Ağahüseyn Şükürovdur.

Mənbə: www.science.az.

11 iyun, 2020

AMEA-nın onlayn Ümumi yığıncağı keçirilib

İyunun 10-da AMEA-nın 2019-cu ildəki elmi və elmi-təşkilati fəaliyyətinin yekunlarına həsr olunmuş onlayn Ümumi yığıncağı keçirilib.

AMEA-nın prezidenti, akademik Ramiz Mehdiyev Ümumi yığıncağın gündəliyindəki məsələləri tədbir iştirakçılarının diqqətinə çatdırıb.

Tədbirdə Azərbaycan elminin inkişafında xüsusi xidmətləri olan və dünyasını dəyişmiş görkəmli alimlərin xatirələri bir dəqiqəlik sükutla yad edilib.

Sonra akademik Ramiz Mehdiyev giriş nitqi ilə çıxış edərək, 2019-cu ildə elm sahəsində bir sıra uğurların əldə edildiyini və dövlət başçısının hər il olduğu kimi, bu il də Azərbaycan elminin inkişafına xüsusi diqqət yetirdiyini, elm sahəsinin inkişafı ilə bağlı mühüm qərarlar qəbul etdiyini bildirib. O, ölkə Prezidentinin fərman və sərəncamlarını, tapşırıqlarını rəhbər tutaraq, AMEA-nın uğurla fəaliyyət göstərdiyini bildirib. Qeyd edib ki, elmi-texniki potensialın qorunub sax­lanılması və inki­şaf etdirilməsi, yüksəkixtisaslı kadrların hazırlanması, elmi tədqiqatların əlaqələndirilməsi, elmi araşdırmaların ölkənin sosial-iqtisadi və mədəni-mənəvi inkişafına yönəldilməsinin AMEA-da həyata keçirilən işlərin əsasını təşkil etmişdir.

Xəbəri tam oxumaq üçün linkə keçid edin: http://www.science.gov.az/news/open/13332

Mənbə: www.science.az.

10 iyun, 2020

Koronavirusun 6 fərqli növü müəyyən edilib

Müxtəlif regionlarda yeni tipli koronavirusun 10 mindən çox nümunəsinin strukturu təhlil edilib və məlum olub ki, hazırda dünyada bu virusun 6 müxtəlif növü yayılmaqdadır.

tass.ru saytı xəbər verir ki, ABŞ-ın Pensilvaniya Universitetinin dosenti Pol Plenetin rəhbərlik etdiyi epidemioloqlar qrupu yeni tipli koronavirusun 10 mindən çox genomunu müqayisə edib. Bu genom nümunələri son 6 ayda dünyanın müxtəlif ölkələrində xəstəliyə yoluxmuş insanların orqanizmindən götürülüb.

Alimlər böyük həcmdə informasiyanı təhlil etmək üçün xüsusi alqoritmdən istifadə ediblər. Bu alqoritm bütün genetik məlumatlar bazasını oxuyur, funksional baxımdan tamamilə üst-üstə düşən və ya identik olan genom hissələrini və fraqmentləri bazadan silir.

Tədqiqatçıların bildirdiyinə görə, yaradılan alqoritm sürətlə yayılan epidemiyaların törədiciləri olan genomları daha tez qruplaşdırmağa imkan verir. Bu metodikadan istifadə etməklə 10,4 min “SARS-CoV-2” ştammı öyrənilərək aydınlaşdırılıb ki, bu virusun 6 klonal qrupu mövcuddur.

Bu araşdırma sayəsində analiz edilən məlumatların həcmini azaltmağa nail olmuş alimlər zülalların və ya siqnal molekullarının strukturunu dəyişən, habelə onların daşıyıcısı olan insanların həyat fəaliyyətinə təsir göstərən bakterial tipli DNT və ya virus tipli RNT variasiyalarını seçiblər. Bu metodikanın köməyi ilə onlar bakteriya və virus ştammlarının oxşar qruplarından ibarət 6 klonal qrup seçiblər.

10 iyun, 2020

Magistraturaya ixtisas seçimi edən bakalavrların sayı açıqlanıb

Dövlət İmtahan Mərkəzi 2020/2021-ci tədris ilində ali təhsil müəssisələrinin və AMEA-nın magistraturalarına ixtisas seçimi ilə bağlı ərizəsi təsdiq edilmiş bakalavrların sayını açıqlayıb.

Bu günə olan məlumata görə, 915 nəfərin (Azərbaycan bölməsi – 841; rus bölməsi – 74) ərizəsi təsdiqlənib.

Qeyd edək ki, bakalavrlar iyunun 18-dək ali təhsil müəssisələrinin və AMEA-nın magistraturalarına qəbul aparılan ixtisaslaşmaların müsabiqəsində iştirak etmək üçün internet vasitəsilə proqram və ixtisaslaşma seçimini aparmalıdırlar.

Müsabiqəyə yalnız müəyyən edilmiş vaxt ərzində “Bakalavrın elektron ixtisaslaşma seçimi ərizəsi”ndə ixtisaslaşmaları seçmiş və təsdiq etmiş bakalavrlar buraxılacaq.

Mənbə: www.science.az.

09 iyun, 2020

Elan

17 iyun 2020-ci il tarixində saat 11:00-da AMEA-nın Biofizika İnstitutunda doktorant və dissertantların attestasiyası keçiriləcək. Tədbir doktorant və dissertantların 2019-cu il ərzində elmi müəssisədə yerinə yetirdikləri elmi-tədqiqat işlərinin  yekunlarına həsr olunacaq.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

09 iyun, 2020

“Magistr” jurnalının 4-cü nömrəsi nəşr olunub

Dövlət İmtahan Mərkəzi tərəfindən “Magistr” jurnalının 4-cü nömrəsi nəşr olunub.

Jurnalın bu nömrəsində 2020/2021-ci tədris ili üçün Azərbaycan Respublikasının ali təhsil müəssisələrinin və AMEA-nın magistraturalarına qəbul üçün ixtisaslaşma seçimi haqqında elan dərc edilib.

Bu nömrədə, həmçinin “Bakalavrın elektron әrizәsi”ndә ixtisaslaşmaların seçimi və təsdiqi üçün təlimat, elektron ərizə formasının nümunəsi, müsabiqə şərtləri, ali təhsil müəssisələrinin və AMEA-nın magistraturalarına qəbul aparılan ixtisaslaşmalar üzrə ümumi qəbul planı və dövlət sifarişi ilə qəbulun proqnozu təqdim olunub.

Bakalavrların nəzərinə çatdırılır ki, həm Azərbaycan, həm də rus bölməsi üzrə qəbul elanı və qəbul planı bir jurnalda – Azərbaycan dilində dərc edilib.

Mənbə: www.science.az.

08 iyun, 2020

AMEA-nın onlayn Ümumi yığıncağı keçiriləcək

10 iyun 2020-ci il tarixində saat 11:00-da Azərbaycan Milli Elmlər Akademiyasının onlayn Ümumi yığıncağı keçiriləcək. Tədbir AMEA-nın 2019-cu ildəki elmi və elmi-təşkilati fəaliyyətinin yekunlarına həsr olunacaq.

Mənbə: www.science.az.

08 iyun, 2020

Akademik İsa Həbibbəyli: “Doktoranturaya qəbulun iyul-avqust aylarında keçirilməsi nəzərdə tutulur”

Doktoranturaya qəbul prosesinin iyul-avqust aylarında keçirilməsi nəzərdə tutulur. Bu barədə AMEA-nın birinci vitse-prezidenti, akademik İsa Həbibbəyli məlumat verib.

Onun sözlərinə görə, ötən ilə qədər doktoranturaya qəbul noyabr-dekabr aylarında aparılıb. Bu isə doktoranturada tədrisin təşkili ilə bağlı müəyyən çətinliklər yaradırdı.

Akademik İ.Həbibbəyli qeyd edib ki, pandemiya dövrü ilə əlaqədar imtahanların keçirilməsində çətinliklər yaranmazsa bu qərar qüvvədə qalacaq.

Birinci vitse-prezident əlavə edib ki, imtahanların keçirilməsi qaydalarında heç bir dəyişiklik edilməyib: “İxtisas fənni üzrə imtahanlar müvafiq institut tərəfindən, fəlsəfə imtahanı AMEA tərəfindən mərkəzləşdirilmiş şəkildə təşkil edilir. Xarici dil fənni üzrə imtahan isə Dövlət İmtahan Mərkəzi tərəfindən aparılır”.

Mənbə: www.science.az.

08 iyun, 2020

Selen COVID-19 və digər virus xəstəliklərinə qarşı effektivdir

AMEA-nın Biofizika İnstitutunun əməkdaşları – b.e.d. Tokay Hüseynov və b.ü.f.d. Ruhiyyə Quliyeva ətraf mühit amillərindən birinin (Selenium statusu) COVID-19 genomunun bir hissəsi olan HİV/AİDS-in inkişafına və patogenliyinə təsiri barədə mövcud tədqiqatlar əsasında araşdırma aparıblar.

Çoxsaylı tədqiqatların nəticələri göstərib ki, kimyəvi elementlərdən biri olan Selenin (Se) insan qidasında çatışmazlığı, dövrümüzün ən çox yayılmış virus xəstəliklərinin inkişafına səbəb ola bilər.

Hantavirus kimi təhlükəli virus xəstəlikləri, ürək-damar sisteminə ciddi zərər vuran Coxsackie (Hantavirus), quş qripi və Ebola tipli digər viruslar COVID-19-a bənzər simptomlara malikdir. Ürək əzələsinin zədələnməsi, diabet xəstələri üçün təhlükə hesab edilən qanın sistematik hiperkoaqulyasiyası, həmçinin qəfil tənəffüs dayanmasına səbəb olan trombositlərin sıxılması və s. xüsusilə təhlükəlidir. Bütün hallarda xəstələrin orqanizmində Selenin çatışmazlığı müşahidə olunur.

Selenin dərman kimi istifadə edilməsi (əsasən natrium selenit şəklində) xəstələrin vəziyyətinin əhəmiyyətli dərəcədə yaxşılaşmasına, hətta tam sağalmasına (Koksaki virusu – Keshan əyaləti, Çin) səbəb olmuşdur. HİV/QİÇS infeksiyasının mənfi təsirinə ən çox məruz qalan ölkələrdə isə (Cənubi Qərbi Afrika), yoluxmanın HİV vəziyyətindən QİÇS vəziyyətinə keçməsinin qarşısını alan ən əhəmiyyətli dərmanlardan biri məhz Selen olmuşdur.

Aparılan tədqiqatlar nəticəsində müəyyən olunmuşdur ki, COVID-19 üzrə ölüm hallarının əsas səbəbini ürəyin və ürək-damar sisteminin zədələnməsi təşkil edir. Ölüm hallarının 50%-dən çoxu miokardın zədələnməsi (Koksaki virusunun aktivləşməsinin başlıca əlaməti) və hipoksiya və ya asfiksiya ilə nəticələnən qanın sistemli qlobal laxtalanması ilə əlaqədardır. Bu sahədə aparılan tədqiqat işlərinin analizi əsasında belə nəticəyə gəlmək olar ki, H1N1 qripinin yayıldığı dövrdə qanda Selenin miqdarı və qlütationperoksidaza fəallığı normal səviyyədə olan pasiyentlər bu xəstəliyi daha yüngül formada keçirmişdir. Aparılan model təcrübələri (siçanlar üzərində təcrübələr) zamanı analoji nəticələr əldə olunmuş, Selen qəbul edən siçanlarda ölüm halları digərlərindən 3 dəfə az müşahidə olunmuşdur. Sonradan А(H3N2) qrip virusu üçün də eyni nəticələr əldə edilmişdir. Çində aparılan son epidemioloji tədqiqatlar göstərir ki, saçda olan Selenin miqdarı ilə sağalma arasında aşkar korrelyativ əlaqə mövcuddur. Selen statusunun aşağı olduğu hallarla müqayisədə, sağalmanın 3 dəfə artması müşahidə edilir. Bu zaman xəstəliyin gedişatının yumşalması ən vacib göstərici hesab olunur.

Hazırda Selenin (natrium selenit) COVID-19 virusundan müdafiəsinin bir neçə mümkün mexanizmi mövcuddur. Natrium selenit izomerazanın zülal disulfidinin bərpa olunma reaksiyasını inhibasiya edir. Onun PD1 enzimi qlikozülal ilə “sahib” hüceyrənin membranının əlaqəsini təmin edir. Həmin hüceyrə üzərindən virusun RNT-si “sahib” hüceyrəyə nüfuz edir.

Müəyyən olunmuşdur ki, selenenzim tioredoksin reduktazaya (TPrx) malik olan virus RNT-si DNT nüsxəsini çıxarmaq yolu ilə virusun mRNT-si “sahib” hüceyrəyə nüfuz edir, endogen selen ehtiyatlarını azaldır, bu isə orqanizmin immunitetinə faciəvi təsir göstərir. Selen zülalların, xüsusən də TPrx-in funksiyasını dəstəkləmək üçün əlavə Selen tələb olunur. Bu, COVID-19 virusuna yoluxmuş transgen siçanlar üzərində aparılan təcrübələrdə aşkar edilmişdir.

Həmçinin COVID-19 virusuna yoluxma zamanı NF-kB faktorunun ─ nüvə kappının fəallaşması baş verir, bu da apoptozun inkişafını şərtləndirir, halbuki selen NF-kB faktorunun fəallığını ingibirləşdirən vasitələrdən biridir. Bu eyni zamanda COVID-19 virusuna yoluxmuş siçanlar üzərində aparılan təcrübələrdə müşahidə olunmuşdur.

COVID-19 virusunun faciəvi nəticələri əsasən qan laxtalanması ilə əlaqəlidir, natrium selenit isə tromboksanın əmələ gəlməsini ingibirləşdirən, tromb yaranması əleyhinə olan xassəyə malikdir. Eyni zamanda müəyyən olunmuşdur ki, COVID-19 virusuna yoluxma zamanı insultun inkişafı ilə birbaşa əlaqəli olan trombopeniya baş verir.

Bütün bunlar isə onu deməyə əsas verir ki, COVID-19 virusuna qarşı həssaslıq və onun fəsadları orqanizmin Selenlə təmin olunma dərəcəsindən ciddi şəkildə asılıdır. Natrium selenitin özü isə bu xəstəliyin müalicəsi zamanı səmərəli ola bilər.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

02 iyun, 2020

Akademik İsa Həbibbəyli: “AMEA işçiləri üçün növbəli iş rejiminin tətbiqinə başlanılıb”

Pandemiya ilə əlaqədar AMEA işçiləri üçün növbəli iş rejimi tətbiq olunmağa başlayıb.

Bu barədə AMEA-nın birinci vitse-prezidenti, akademik İsa Həbibbəyli məlumat verib. Onun sözlərinə görə, akademiyada əməkdaşların hamısının eyni gündə işə gəlməsi sosial məsafənin gözlənilməsi tələbini qorumağı çətinləşdirir. Bu səbəbdən yaşı 60-dan çox olan akademiya işçilərinin həftənin cüt günlərində – çərşənbə axşamı və cümə axşamları, qalan heyətin isə həftənin tək günlərində işə gəlməsi qərara alınıb: “Bu halda iş yerində sosial məsafəni qorumaq mümkün olacaq. Müdiriyyət zəruri hallarda tək günlərdə işə çıxan əməkdaşları həftənin cüt günlərində də işə dəvət edə bilər”.

İsa Həbibbəyli işçilərin xüsusi karantin rejimi dövründə, yəni iyunun 15-dək növbəli iş sistemində çalışacaqlarını söyləyib.

Mənbə: www.science.az.

22 may, 2020

Biofizika İnstitutunun Elmi şurasının iclası keçirilib

Mayın 22-də AMEA-nın Biofizika İnstitutunda Elmi şuranın növbəti iclası keçirilib.

İclasda koronavirus (COVID-19) infeksiyasının ölkəmizdə yayılmasının qarşısının alınması istiqamətində görülən tibbi-profilaktiki tədbirlər, tətbiq edilən xüsusi karantin rejimi, mövcud olan müasir səhiyyə infrastrukturu, yenicə istifadəyə verilmiş tibb mərkəzləri, tibbi maskaların istehsalı, eləcə də bu sahədə həyata keçirilən beynəlxalq əməkdaşlıq barədə məlumat verilib.

Bildirilib ki, Azərbaycan dövləti koronavirusa qarşı bütün qabaqlayıcı tədbirləri zamanında həyata keçirməklə yarana biləcək ciddi təhlükənin qarşısını almağa nail oldu. Prezident İlham Əliyevin bu sahədə gördüyü işlər xalqımızın sağlamlığının qorunmasının qarantına çevrildi. İndiki ağır və mürəkkəb şəraitdə dövlətimiz vətəndaşlarımızın sosial problemlərinin həlli üçün lazım olan bütün zəruri işləri görür.

Daha sonra iclasda institutun elmi işçilərinin 2020-ci il üçün təsdiq olunmuş fəaliyyət planı üzrə I yarımildə görülmüş işlərə dair hesabat müzakirə olunub.

Tədbirdə postpandemiya dövründə Biofizika İnstitutunun qarşısında duran vəzifələrə dair təkliflərin hazırlanaraq AMEA-nın Fizika-Riyaziyyat və Texnika Elmləri Bölməsinə təqdim olunması diqqətə çatdırılıb. Bildirilib ki, bu təkliflərin sırasında hüceyrə texnologiyası, xüsusən hibridomanın yaradılması, eləcə də oliqonukleotid praymer sintezinin təşkili kimi məsələlərin olması zəruridir.

Sonda müəssisənin elmi katibi, biologiya üzrə fəlsəfə doktoru Florida Mehrəliyeva AMEA prezidentinin akademiya magistrantları üçün distant tədrisin təşkili barədə müvafiq sərəncamından irəli gələn vəzifələrin icrasını təmin etmək məqsədilə institutda aprelin 3-dən etibarən magistrantlar üçün dərslərin distant qaydada tədris olunduğunu bildirib. Qeyd edib ki, institutun birinci kurs magistrantları üçün dərslər müvafiq cədvələ uyğun olaraq onlayn formada həyata keçirilir. İkinci kurs magistrantlar isə elmi rəhbərlərinin iştirakı ilə distant olaraq elmi-pedaqoji təcrübə keçirlər.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

20 may, 2020

AMEA-nın magistraturasına 2020/2021-ci tədris ili üçün qəbul planı təsdiqlənib

Azərbaycan Respublikasının Nazirlər Kabineti tərəfindən 2020/2021-ci tədris ili üçün Azərbaycan Milli Elmlər Akademiyasının magistraturasına 15 ixtisas 43 ixtisaslaşma üzrə 59 plan yeri təsdiq edilib. Ayrılan bütün plan yerləri dövlət sifarişlidir.

Magistraturaya qəbul imtahanındakı nəticələri müsabiqə şərtlərini ödəyən bakalavrlar AMEA-nın magistraturasına ayrılan plan yerlərində göstərilən ixtisaslaşmaları seçmək imkanı əldə edəcəklər.

Mənbə: www.science.az.

18 may, 2020

Elmi Şuranın növbəti iclası keçiriləcək

22 may 2020-ci il tarixində saat 10:00-da AMEA Biofizika İnstitutunun Elmi Şurasının növbəti iclası keçiriləcək.

İclasda aşağıdakı məsələlərə baxılacaq:

1. Biofizika İnstitutunun nəzdindəki laboratoriyaların elmi və elmi-təşkilati fəaliyyəti ilə bağlı 2020-ci ilin I yarısı üzrə hesabatının müzakirəsi və təsdiqi.

2. Karantin dövründə (SARS-GoV-2 Pandemiya ilə bağlı) Biofizika İnstitutunun qarşısında duran əsas vəzifələr ətrafında təkliflərin müzakirəsi.

3. AMEA-nın magistratura səviyyəsində təhsil alan tələbələrə distant formada təşkil edilən dərslərin hazırkı vəziyyətinin müzakirəsi.

4. Cari məsələlər.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

18 may, 2020

“Elm” qəzetinin yeni sayında maraqlı məqalələr yer alıb

AMEA Rəyasət Heyətinin mətbu orqanı olan “Elm” qəzetinin yeni sayı çapdan çıxıb.

Qəzetin ilk səhifəsində “Elm haqqında” və “Peşə təhsili haqqında” Azərbaycan Respublikasının qanunlarında dəyişiklik edilməsi barədə AR Qanunu, həmçinin ölkə başçısının 2014-cü il 11 dekabr tarixli Fərmanı ilə təsdiq edilmiş “AMEA-nın Nizamnaməsi”ndə dəyişiklik edilməsi haqqında AR Prezidentinin Fərmanı yer alıb.

Mətbu orqanın növbəti səhifələrində akademik Ramiz Mehdiyevin AMEA Rəyasət Heyətinin üzvləri adından Prezident İlham Əliyevə məktub ünvanlaması, AMEA prezidentinin postpandemiya dövründə Azərbaycan elminin qarşısında duran vəzifələrlə bağlı açıqlaması, o cümlədən akademiya əməkdaşlarının işə davamiyyətinin tənzimlənməsi haqqında sərəncam və AMEA-nın onlayn müşavirəsi barədə materiallar əks olunub.

Bundan əlavə, oxucular qəzetdə “Ümummilli liderlik: təcəssümü və təntənəsi”, “Heydər Əliyev mövqeyi”, “Milli birlik və vətəndaş həmrəyliyi”, “Koronavirus pandemiyası ilə mübarizə və xalq təbabəti” adlı məqalələr, “Heydər Əliyevin dövlətçilik təlimi və müasir dövr” mövzusunda beynəlxalq onlayn konfrans, Azərbaycan alimlərinin COVID-19 pandemiyasına dair apardığı tədqiqatlar, bitki yağlarından biodizelin alınması barədə müsahibə, yeni nəşrlər və s. məlumatlarla tanış ola bilərlər.

20 səhifəlik qəzetdə rus dilində maraqlı məqalələr də yer alıb.

Qeyd edək ki, 1984-cü ildən nəşr olunmağa başlayan “Elm” qəzetinin baş redaktoru İctimaiyyətlə əlaqələr, mətbuat və informasiya şöbəsinin müdiri, filologiya üzrə fəlsəfə doktoru Ağahüseyn Şükürovdur.

Mənbə: www.science.az.

04 may, 2020

Alimlərin beynəlxalq layihələrdə fəal iştirakına dair müzakirələr aparılıb

AMEA Rəyasət Heyəti aparatının Xarici əlaqələr idarəsi tərəfindən AMEA-nın elmi müəssisələrinin xarici əlaqələr şöbələri və məsul şəxsləri ilə 5 saata yaxın onlayn toplantı keçirilib.

İdarənin rəisi, biologiya üzrə fəlsəfə doktoru Esmira Əlirzayeva AMEA tərəfindən müxtəlif ölkələrin elmi təşkilatları ilə birlikdə elan edilən ikitərəfli layihə müsabiqələri və “Horizon 2020” üzrə hazırkı vəziyyət, son illərdə əldə edilmiş nailiyyətlər və hələ də mövcud olan problemlər haqqında ətraflı məlumat verib, həmkarlarını beynəlxalq layihə və proqramlarda daha fəal iştiraka təşviq edib.

İdarənin Layihələrin idarə edilməsi şöbəsinin müdiri, siyasi elmlər üzrə fəlsəfə doktoru Ruslan Qasımov və şöbə müdirinin müavini Aytən Hüseynova AMEA-nın elmi müəssisələri ilə müştərək fəaliyyətin gücləndirilməsi və akademiya alimlərinin beynəlxalq elmi proqramlara qoşulması imkanlarının genişləndirilməsi üzrə təkliflərlə çıxış ediblər. İdarənin Xarici əməkdaşlıq şöbəsinin müdir müavini Orxan Məmmədov təşkilatlar arasında imzalanan əməkdaşlıq sənədlərinin qaydaları və onlara qoyulan tələblər haqqında məlumat verib. Şöbənin baş mütəxəssisləri Məlahət Qurbanova və Yeganə Əliyeva müxtəlif ölkələrin elmi qurumları ilə mövcud əməkdaşlıq əlaqələrinin səmərəliyinin artırılması üzrə monitorinq mexanizminlərini təqdim ediblər.

Toplantıda elmi müəssisələrin xarici əlaqələrə məsul nümayəndələri – Fizika İnstitutundan Dünyamalı Məmmədov, İdarəetmə Sistemləri İnstitutundan Tofiq Babayev, Riyaziyyat və Mexanika İnstitutundan Eldar Abbasov, İnformasiya Texnologiyaları İnstitutundan Babək Nəbiyev, Biofizika İnstitutundan Sevinc Hüseynova, akademik Yusif Məmmədəliyev adına Neft-Kimya Prosesləri İnstitutundan Yengibar Əliyev, akademik Murtuza Nağıyev adına Kataliz və Qeyri-üzvi Kimya İnstitutundan Ülviyyə Məmmədova, Polimer Materialları İnstitutundan Esmira İmanova, Neft və Qaz İnstitutundan Şəlalə Hüseynova, akademik Həsən Əliyev adına Coğrafiya İnstitutundan Turanə Hüseynova, Respublika Seysmoloji Xidmət Mərkəzindən Telman Cəfərov, Botanika İnstitutundan Elnarə Orucova, Zoologiya İnstitutundan Elyanə Tahirova, akademik Abdulla Qarayev adına Fiziologiya İnstitutundan Fərhad Rüstəmov, Dendrologiya İnstitutundan Rəşad Xəlilov, Genetik Ehtiyatlar İnstitutundan Ayaz Məmmədov, Məhəmməd Füzuli adına Əlyazmalar İnstitutundan Nigar Babaxanova, Nizami Gəncəvi adına Milli Azərbaycan Ədəbiyyatı Muzeyindən Nailə Əliyeva, Hüseyn Cavidin Ev Muzeyindən Aytən Cəfərli, Arxeologiya və Etnoqrafiya İnstitutundan Səfər Aşurov, Fəlsəfə İnstitutundan Zöhrə Əliyeva, Qafqazşünaslıq İnstitutundan Günay Feyziyeva, Milli Azərbaycan Tarixi Muzeyindən Emin Dadaşov, Abbasqulu Ağa Bakıxanov adına Tarix İnstitutundan Lamiyə Qafarzadə çıxış ediblər. Məsul şəxslər təmsil etdikləri təşkilatlarda müvafiq sahə üzrə əldə edilmiş nailiyyətlər, iştirak etdikləri beynəlxalq proqram və layihələr, əməkdaşlıq istiqamətləri, mövcud çətinliklər haqqında məlumat verib, beynəlxalq əməkdaşlıq istiqamətində daha böyük uğurlar əldə etmək üçün təkliflərini irəli sürüblər.

Toplantı zamanı layihələrin beynəlxalq standartlara uyğun hazırlanmasına həsr edilmiş vebinar və təlimlərin, həmçinin təcrübə mübadiləsinin təşkili üzrə razılıq əldə edilib.

Mənbə: www.science.az.

29 aprel, 2020

Biofizika İnstitutu xüsusi karantin rejimi dövründə bir sıra prioritet istiqamətləri müzakirə etməyi təklif edir

Koronavirusun yeni forması, COVID-19, demək olar ki, dünyanın bütün ölkələrində yayılıb və öz təsirini göstərməkdədir. Bu pandemiyanın qarşısının alınmasında ən böyük çətinlik onun ölüm faizinin yuxarı olması deyil. Əksinə, COVID-19-da ölüm faizi əvvələr qeydə alınmış digər koronavirus MERS-CoV-dan qat-qat aşağıdır. Əsas çətinlik virusun sürətlə yayılması və ona görə də yoluxanların sayının əvvəlki göstəricilərlə müqayisə olunmaz dərəcədə yuxarı olmasıdır.

Dünya ölkələri, hətta iqtisadi cəhətdən inkişaf etmiş ölkələr belə bu virusa yoluxmuş külli miqdarda insanlara xidmət etməyə hazır deyillər. Açığını demək lazımdır ki, yoluxmanın qarşısının alınması üçün ən effektiv mübarizə üsulu, Çin Xalq Respublikasının misalında göründüyü kimi, insanları bir-birindən təcrid etməkdir. Ona görə də, Azərbaycan dövlətinin qabaqlayıcı radikal addımları labüd və vaxtında atılmış addım idi. Bu addım cəmiyyət tərəfindən dəstəklənir və dəstəklənməlidir də. Bu addımlar nəticəsində neçə-neçə insanların həyatının saxlanmasının statistikasını aparmaq çox da çətin deyil. Ən yaxşı ssenari üzrə Azərbaycanda 20-30 mindən yuxarı insan öz həyatını itirməli idi. Bu rəqəmin həqiqətə yaxın olmasını göstərmək üçün bir misal çəkim. Əhalisinin sayı Azərbaycan Respulkasından az olan Nyu-York şəhərində (8.4 milyon) bu gün (aprelin 26-a olan məlumat) COVID-19-a yoluxanların sayı 155 000, ölənlərin sayı isə 11 817-dir. Nəzərə alın ki, Nyu-York hələ pik həddini keçməyib. ABŞ həm iqtisadi, həm də tibb sahəsində dünyanın ən qüdrətli dövləti olsa belə vaxtında qabaqlayıcı tədbir görməməsi çoxsaylı insan həyatının itkisinə səbəb olub və bu hələ davam edəcək. Azərbaycan dövlətin sosialyönümlü siyasəti, insan həyatını birinci dərəcəli sərvət hesab etməsi, böyük iqtisadi itkilər hesabına atdığı addımlar hər gün çoxlu sayda insanın həyatını xilas etməkdədir. Digər tərəfdən dövlətimizin son zamanlar atdığı çevik addımlar (bir çox xətəxanaların profillərinin genişləndirilməsi, yeni modul tipli xəstəxanaların yaradılması, tibbi maskaların istehsalı və s.) koronavirusla mübarizədə öz töhfəsini verməkdədir.

Şübhəsiz hamıya aydındır ki, bu situasiya axırıncı olmayacaq. Bu gün biz indiki vəziyyətdən nəticə çıxarmalıyıq və gələcəkdə gözlənilə bilən, bundan da təhlükəli ola bilən digər epidemiyalara hazır olmalıyıq. Bütün müəssisələrdə mülki müdafiə sistemi xətti ilə hər bir işçi üçün bir neçə aylıq birdəfəlik tibbi maskaların, fərdi dezinfeksiyaedici vasitələrin və s. ehtiyatları hazırlanmalıdır. Digər tərəfdən yeni situasiya AMEA qarşısına da yeni tələblər qoyur və bu haqda indi, karantində olduğumuz vaxtda fikirləşməli, müzakirə etməli və öz təkliflərimizi verməliyik.

Azərbaycan kiçik dövlət deyil!

Bir çox hallarda elmdən söhbət düşəndə bəzi alimlərimiz (alim olmayanlar da belə) qeyd edirlər ki, Azərbaycan kiçik dövlətdir və elmin bütün istiqamətləri ilə məşğul ola bilməz. Onlara sübut etmək olar ki, əhalisi Azərbaycan əhalisindən az olan dövlətlər elmdə mühüm nailiyyətlər qazanmışlar. Etiraf etmək lazımdır ki, yaranan yeni situasiya üçün müəyyən uğurlara baxmayaq, Həyat elmləri üzrə (biofizika, biokimya, molekular biologiya, biofiziki və bioloji texnologiyalar, tibb) aparılan tədqiqatlar və bu sahələr üzrə mövcud maddi texniki baza bu günün tələblərinə cavab vermir. Biz tez bir zamanda molekulyar, hüceyrə, toxuma və model sistemlər üzrə texnologiyaları yaratmalı və bu sahələrdə ciddi tədqiqatlara başlamalı, dünya elminə inteqrasiya etməliyik. Bu gün AMEA institutlarının bəzilərində xaricdə işləyən tanınmış alimlərimizin laboratoriyaları yaradılıb və onlar Azərbaycanda aparılan elmi tədqiqatlara kənardan uğurla dəstək verirlər. Lakin bu azdır. Elmi tədqiqatları Azərbaycanda yerləşən institutlarda təşkil edilməli və Azərbaycanda aparılmalıdır. Əlbəttə, bu keçidə müəyyən vaxt lazımdır. Mənim sadaladıqlarım tənqid deyil, bu işin məntiqli davamı olan arzudur. Sevindirici haldır ki, bu istiqamətdə işlər gedir və bu daha da sürətlənməlidir. Bizim bu işləri görməyə potensialımız var və biz buna hazırıq. Biz istər monoklonal anticisimləri (bu hazırki COVID-19 yoluxmasına qarşı aparıla bilən mübarizə yolunun mühüm bir istiqamətidir), istərsə də digər xüsusi əhəmiyyət kəsb edən zülalları ekspressiya etməyi, müxtəlif hüceyrə xətləri üzrə və heyvan modelləri ilə işləməyi bacarmalıyıq.

Son illər AMEA-da multidissiplinar tədqiqatlara böyük diqqət yetirilir və bu işlərə dəstək verilir. Nano-texnologiyanın bütün elmi istiqamətlərə tətbiqinə xüsusi önəm verilir. Bu gün təkcə elmimiz yox, alimlərimiz də multidissiplinar biliklərə malik olmalıdır. Qeyd etmək istərdim ki, bu fikri AMEA Rəyasət Heyətinin iclaslarının birində AMEA-nın vitse-prezidenti, akademik Rasim Əliquliyev səsləndirmişdir. Kadr hazırlanması istiqamətində magistratura və dissertantura təhsilinə xüsusi fikir verilməlidir. Son zamanlarda COVID-19 virusuyla bağlı yaranan vəziyyət göstərir ki, həkimlərimiz də multidissiplinar olmalıdır. Bu gün koronavirusa yoluxan xəstələri müalicə edən həkimlər infeksionist olmaqla yanaşı, daha çox pulmanoloq olmalıdır. Digər tərəfdən virusun fəsadı olan ağ ciyərin pnevmoniyası nəticəsində yaranan trombosis və onun vaxtında qaşısının alıması və s. artıq başqa istiqamətlərdir.

Hazırda COVID-19-un bütün dünyada yayılması, onunla bağlı problemləri qabartmışdır. Lakin bizim başqa mühüm problemlərimiz hələ qabaqdadır. Statistikaya əsasən bütün dünyada olduğu kimi, Azərbaycanda da insanlar ildən-ilə daha uzun ömür sürürlər. Bu da tədricən xərçəng və yaşla əlaqəli xəstəliklərin (Alzeymer, Parkinson və s.) sayının artması deməkdir. Bu gün bəzi xərçəng xəstəliklərində istifadə olunan hədəfli dərman preparatları çox bahadır və hamının təlabatını ödəyə bilməyəcək. Ona görə də biz özümüz bu işlərə tez bir zamanda başlamalıyıq və bunu etməsək böyük maddi xərclərlə üzləşəcəyik.

Biofizika İnstitutunun formulası

Yeni yaradılan Biofizika İnstitutu maddi-texniki bazasının məhdud olmasına baxmayaraq, müəyyən uğurlar qazanmışdır. İnstitutun əsas elmi istiqaməti xərçəng və yaşla bağlı olan amiloid xəstəlikləri üzrə tədqiqatların aparılmasıdır. Böyük məmnuniyyət hissi ilə qeyd etmək istəyirəm ki, Biofizika İnstitutu Milli Onkologiya Mərkəzi ilə birgə uğurlu elmi tədqiqatlar aparır və bunun nəticəsi kimi “Molekulyar və Hüceyrə Onkologiyası” adlı birgə laboratoriya yaradılmışdır. Artıq ictimaiyyətə bəllidir ki, birgə tədqiqatların nəticəsi kimi qan plazmasının spektrosopiyası ilə gələcəkdə skrininq üçün yararlı ola bilən “Süni İntellekt” sitemi hazırlamışdır. Digər tərəfdən xərçəng və normal hüceyrə membranlarını bir-birindən fərqləndirən prinsipial faktorlar, bu hüceyrələrin ətraf mühitin müxtəlif faktorlarına həssalığı tədqiq edilmiş və hazırda bu istiqamətdə tədqiqatlar davam etdirilir.

Bu gün istifadə olunan dərmanların təsirinin effekliyini ağ ciyər xərçəngi xəstələrindən götürülmüş biopsiya nümunələrində ölçə və dərmanın təsiri ilə hüceyrənin dağılmasını zaman etibarı ilə müşahidə edə bilirik. Bu istiqamətdə apardığımız işlər hər bir fərdə uyğun dərman seçimini təmin edə biləcək. Aldığımız nəticələr yaxın gələcəkdə elmi jurnallarda çap olunacaq və ictimaiyyət bu barədə məlumatlandırılacaq. İşimizin böyük əhəmiyyəti ondan ibarətdir ki, bu işlər hansısa model sistemlərdə deyil, məhz insan toxumasından götürülmüş nümunələrdə aparılıb. İnsan toxuması ilə işləmək bizim üzərimizə böyük məsuliyyət qoyur və biz bu nümunələrdən maksimum yararlanmalıyıq.

Xüsusi qeyd etmək istərdim ki, bu işlər AMEA Rəyasət Heyətinin dəstəyi ilə Biofizika İnstitutu ilə Milli Onkologiya Mərkəzinə ayrılan qrant əsasında aparılır. Rəyasət Heyətində aparılan müzakirələr zamanı AMEA-nın prezidenti, akademik Ramiz Mehdiyev bu tədqiqatları bəyənmiş, Biofizika İnstutunun “hüceyrə texnologiyaları” modulunun yaradılmasını dəstəkləmişdir. Fürsətdən istifadə edərək akademik Cəmil Əliyevə kollektivimiz adından öz dərin minnətdarlığımı bildirmək itəyirəm. Cəmil müəllim ilk gündən birgə aparılan işləri dəstəkləmiş, istər elmi baxımdan, istərsə də təşkilatı baxımdan bizə yaxından köməklik göstərmişdir. O, təşkilatı işlərin çoxluğuna baxmayaraq, elmi işləri prioritet tutmuş və alınmış elmi nəticələri dəfələrlə birgə müzakirə etmişdir. Bütün kollektivimiz adından Cəmil müəllimi akademik Nikolay Trapeznikov adına medalla mükafatlandırılmasına görə təbrik edir ona elmi-təşkilati işində yeni uğurlar arzulayırıq.

Sonda bildirmək istərdim ki, təbiət elmləri ilə tibbi elmlər bir-birini tamamlayan elmi-prioritet istiqamətləri təyin edib, ciddi şəkildə bu işlərə başlamalıdırlar. Bu işləri həyata keçirmək üçün dövlət yardımına ciddi ehtiyac var.

AMEA-nın Biofizika İnstitutunun direktoru, AMEA-nın müxbir üzvü Oktay Qasımov

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

27 aprel, 2020

AMEA əməkdaşlarının məzuniyyət müddəti uzadılır

AMEA-nın prezidenti, akademik Ramiz Mehdiyev “Azərbaycan Respublikasının ərazisində xüsusi karantin rejiminin uzadılması ilə əlaqədar akademiya əməkdaşlarının işə davamiyyətinin tənzimlənməsi haqqında” Sərəncam imzalayıb.

Sərəncama əsasən, Azərbaycan Respublikası Nazirlər Kabinetinin 31 mart 2020-ci il tarixli Qərarına müvafiq olaraq əməkhaqqı saxlanılmaqla AMEA əməkdaşlarının işə davamiyyəti 28 aprel tarixindən 4 may 2020-ci il saat 00:00-dək təxirə salınır.

Bundan əlavə, AMEA-nın fasiləsiz iş rejimində fəaliyyət göstərən bəzi müəssisə, təşkilat və xidmətlərində təxirə salınması mümkün olmayan işlərin xüsusi əmək rejiminin qaydalarına riayət edilməklə yerinə yetirilməsi tövsiyə olunub.

Xatırladaq ki, Azərbaycan Respublikası Nazirlər Kabinetinin 18 aprel 2020-ci il tarixli qərarına əsasən ölkə ərazisində xüsusi karantin rejimi 2020-ci il 4 may saat 00:00-dək uzadılıb, həmçinin xüsusi karantin rejimi ilə əlaqədar Azərbaycan Respublikasının Nazirlər Kabineti və Azərbaycan Respublikasının Nazirlər Kabineti yanında Operativ Qərargah tərəfindən daha əvvəl müəyyən edilmiş bütün məhdudiyyətlər, tələblər və rejimlər həmin müddət ərzində qüvvədə saxlanılıb.

Mənbə: www.science.az.

20 aprel, 2020

AMEA-da distant təhsilin hazırkı vəziyyəti

Azərbaycan Respublikasının ərazisində yeni növ koronavirus (COVID-19) pandemiyasının yayılmasının qarşısının alınması məqsədilə 2020-ci il mart ayının 3-dən bütün təhsil müəssisələrində, o cümlədən AMEA-nın magistraturasında tədris prosesi müvəqqəti dayandırılıb.

AMEA-nın prezidenti, akademik Ramiz Mehdiyevin “AMEA-nın magistrantları üçün distant (məsafədən) təhsilin təşkil edilməsi haqqında” sərəncamına uyğun olaraq tədris prosesində yeni yanaşmanın tətbiqinə başlanılıb. Hazırda AMEA-nın magistraturasında distant tədris prosesi tam təmin edilib.

Bu barədə AMEA Rəyasət Heyəti aparatının Elm və təhsil idarəsinin rəisi, iqtisad elmləri üzrə fəlsəfə doktoru Fail Kazımov məlumat verib.

O, bildirib ki, hazırda AMEA-nın magistraturasında 188 magistrant təhsil alır. Bu da ümumilikdə 25 ixtisas üzrə 84 ixtisaslaşmanı əhatə edir. AMEA-da tədris prosesinə 217 nəfərlik professor-müəllim heyəti cəlb olunub ki, onların hər biri distant təhsil prosesində uğurla iştirak edir.

Dünya təcrübəsində distant təhsil müxtəlif üsul və vasitələrdən istifadə edilməklə həyata keçirilir. AMEA-da əsasən “sinxron” distant təhsilə üstünlük verilir. Çünki bu, davamlı təhsil üçün ən çox istifadə edilən öyrənmə üsuludur. Bu yolla müəllim və magistrantlar arasında təmas virtual auditoriyalarda onlayn (canlı) telekonfrans və ya vebinarlar şəklində həyata keçirilir. AMEA-nın professor-müəllim heyəti dərslərini əsasən dünyada ən çox istifadə olunan onlayn təhsil platformalarından istifadə etməklə həyata keçirirlər. Müəllimlər tərəfindən tədris planlarına və pedaqoji tələblərə uyğun olaraq magistrantlar üçün distant məsləhət saatları müəyyənləşdirilib və bu saatlarda fənlərin mənimsənilməsinə, həmçinin dissertasiya işlərinin yerinə yetirilməsinə metodiki dəstək verilir.

Qeyd edilib ki, ən çox “Zoom”, “GoTomeeting”, “Vebex”, “Skype” proqramlarından istifadə edilir. Bunlar mobil qurğular, masaüstü kompüterlər, smartfonlar arasında video və audiokonfrans, əməkdaşlıq, müzakirə və vebinarlar üçün asan, etibarlı bulud (cloud) platforması olan müasir rabitə proqramlarıdır. Tədrisin yüksək səviyyədə təşkil olunmasına baxmayaraq bir sıra dərslərin distant yolla keçirilməsi o qədər də əlverişli deyil. Belə ki, tədris planlarında nəzərdə tutulmuş laboratoriya dərslərinin həyata keçirilməsi üçün müvafiq laboratoriya şəraitinin olması vacibdir. Nəzərə alsaq ki, AMEA-nın magistraturası elm tutumlu magistraturadır, bu baxımdan laboratoriya dərslərinin yüksək səviyyədə tədrisi magistrantlar üçün xüsusi önəm daşıyır. Bunu nəzərə alaraq, laboratoriya dərslərinin tədris ilinin sonunda keçirilməsi planlaşdırılır.

Təqdirəlayiq haldır ki, dərslərin distant yolla davam etdirilməsi II kurs magistrantların pedaqoji təcrübə keçmələri üçün stimul olub. Məlumdur ki, elmi-pedaqoji təcrübənin məqsədi pedaqogikanın təcrübi əsaslarının mənimsənilməsidir. Elmi-pedaqoji təcrübənin əhəmiyyətini nəzərə alaraq II kurs magistrantlar təcrübə rəhbərlərinin müşayiətilə distant yolla təcrübə keçməyə cəlb olunub, onlayn dərslərdə iştirak etməklə yanaşı, minimum 2 sınaq dərsi də keçiblər. Artıq onlar elmi-pedaqoji təcrübə mərhələsini bitirmək üzrədirlər.

F.Kazımov bildirib ki, distant təhsil prosesində mühüm məsələlərdən biri də dərslərin keyfiyyətinə nəzarətin həyata keçirilməsidir. İstifadə olunan proqramların texniki xüsusiyyətləri distant yolla keçirilən dərslərə nəzarət etməyə imkan verir. AMEA Rəyasət Heyəti aparatının Elm və təhsil idarəsinin və müvafiq institutların təhsil şöbələrinin əməkdaşları müəyyən olunmuş qrafik üzrə keçirilən dərslərə qoşularaq prosesə nəzarət edir, eyni zamanda, tədrisin təşkilində fəal iştirak edirlər.

“AMEA-nın əsas prioritetlərindən biri doktorantura və dissertantura yolu ilə yüksəkixtisaslı elmi kadrlar hazırlanmasıdır. Məlumdur ki, 2019-cu il üçün fəlsəfə doktoru və elmlər doktoru proqramı üzrə doktoranturaya və dissertanturya qəbul prosesi başa çatıb. Müsabiqələrdən müvəffəqiyyətlə keçmiş doktorant və dissertantların müvafiq ixtisaslar üzrə aktual problemlər istiqamətində dissertasiya mövzuları bölmələrin elmi şuralarının müzakirəsinə verilib. Müzakirələr müvafiq ixtisaslar üzrə mövcud vəziyyətə uyğun olaraq şura üzvləri arasında onlayn rejimdə həyata keçirilir. Bununla yanaşı, əvvəlki illərin doktorant və dissertantları öz elmi rəhbərləri və məsləhətçiləri ilə onlayn əlaqə saxlayaraq tədqiqat işlərini davam etdirirlər”, – deyə F.Kazımov qeyd edib.

Mənbə: www.science.az.

16 aprel, 2020

AMEA-nın Biofizika İnstitutu fəaliyyətini distant şəkildə davam etdirir

Azərbaycan Respublikası Nazirlər Kabineti yanında Operativ Qərargahın ölkə ərazisində bəzi sosial təcrid tədbirləri barədə 2020-ci il 14 mart tarixli qərarına əsasən respublikanın bütün elmi-tədqiqat müəssisələri iş fəaliyyətlərinin eksperimetal hissəsini müvəqqəti dayandırıb.

Məlum qərarla bağlı AMEA Biofizika İnstitutunun kollektivi elmi fəaliyyətlərini sosial izolyasiya və xüsusi karantin rejiminin şərtlərinə əməl etməklə davam etdirirlər. Belə ki, qurumun elmi işçiləri tərəfindən 2020-ci ilin Fəaliyyət planında nəzərdə tutulan elmi-tədqiqat işlərinin müəyyən hissəsi yanvar-mart ayları ərzində yerinə yetirilib. Hazırda bu tədqiqatların nəticələri əsasında məqalələr yazılır, çapa hazırlanacaq materialların redaktəsi üzərində işlər görülür.  Artıq 5-dən çox məqalə “Azərbaycan kimya jurnalı”,  “Международный журнал прикладных и фундаментальных исследований”, “Биомедицина” kimi elmi-tədqiqat jurnallarına çapa qəbul edilmişdir. Həmçinin institutun İnteqrativ Biologiya laboratoriyasında müxtəlif koronavirusların genomlarının təşkili və zülallarının müqayisəli analizi üzrə elmi tədqiqat işləri başlanmışdır.

Bundan başqa, elmi müəssisədə 4 beynəlxalq və 2 ölkədaxili olmaqla, 6 birgə qrant layihələri üzrə elmi tədqiqat işləri davam etdirilməkdədir. Bunun üçün xüsusi karantin rejiminə qədərki müddətdə (yanvar-mart ayları ərzində) layihələr üzrə aparılmış  tədqiqatlar müzakirə olunur, alınmış nəticələr analiz olunaraq yekunlaşdırılır və bunların əsasında məqalələr çapa hazırlanır.

Qeyd edək ki, karantin rejimi müddətində AMEA və İtaliya Milli Tədqiqatlar Şurası (CNR) arasında imzalanmış elmi əməkdaşlıq sazişi üzrə müştərək proqram çərçivəsində 2020-2021-ci illər üçün elan edilmiş müsabiqənin nəticələrinə görə AMEA Biofizika Institutu ilə İtaliyanın Makromalekulyar Tədqiqatlar İnstitutunun “Funksional amilodlərin agregasiya modulyatorları: İpək fibroini Alzeymer xəstəliyi patogenezinin tədqiqi üçün ucuz model kimi” adlı birgə qrant layihəsi qalib seçilmişdir. Bu layihə üzrə birgə məqalə artıq çapa hazırlanıb.

Qeyd olunanlarla yanaşı, AMEA-nın prezidenti, akademik Ramiz Mehdiyevin müvafiq sərəncamına uyğun olaraq 3 aprel 2020-ci il tarixindən etibarən AMEA-nın magistrantları üçün başlanan distant tədris prosesi institutun professor-müəllim heyəti tərəfindən  uğurla davam etdirilməkdədir.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

03 aprel, 2020

AMEA Biofizika İnstitutunda magistrantlar üçün distant dərslərə başlanılıb

Hal-hazırda ölkədə və dünyada geniş miqyas almış koronavirus (COVİD-19) pandemiyası ilə əlaqədar AMEA magistrantları üçün təhsil prosesinin müəyyən olunmuş qaydada keçirilməsini, tədris olunan fənlərin nəzərdə tutulmuş həcmdə mənimsənilməsini təmin etmək məqsədilə AMEA-nın prezidenti, akademik Ramiz Mehdiyev “AMEA-nın magistrantları üçün distant (məsafədən) tədrisin təşkil edilməsi haqqında” Sərəncam imzalayıb. Sərəncamının icrasını təmin etmək məqsədilə 3 aprel 2020-ci il tarixindən AMEA-nın Biofizika İnstitutunda təhsil alan magistrantlar üçün dərslərin distant formada tədrisinə başlanılıb.

Hazırda institutun tədris prosesinə cəlb edilmiş professor-müəllim heyəti tərəfindən “Bioloji sistemlər fizikası” və “Biofizika” ixtisasları üzrə  təhsil alan I kurs magistrantlara tədris planlarında nəzərdə tutulan fənlər üzrə dərslər keçirilir.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

02 aprel, 2020

AMEA və İtaliya Milli Tədqiqatlar Şurasının təşkil etdiyi müsabiqənin nəticələri açıqlanıb

AMEA və İtaliya Milli Tədqiqatlar Şurası (CNR) arasında imzalanmış elmi əməkdaşlıq sazişi üzrə müştərək proqram çərçivəsində 2020-2021-ci illər üçün elan edilmiş müsabiqəyə təqdim olunan 16 layihədən 10-u texniki ekspertizadan uğurla keçib.

AMEA və CNR tərəfindən elmi ekspertizaya göndərilmiş layihələr arasından hər iki tərəfin ekspertləri tərəfindən yüksək qiymətləndirilmiş 4 layihə müsabiqənin qalibi seçilib.

Layihələr müvafiq olaraq AMEA-nın Molekulyar Biologiya və Biotexnologiyalar İnstitutu ilə İtaliyanın Bitki Genetikası İnstitutu, AMEA-nın Biofizika İnstitutu ilə İtaliyanın Makromalekulyar Tədqiqatlar İnstitutu, AMEA-nın Neft və Qaz İnstitutu ilə İtaliyanın Dəniz Elmləri İnstitutu, eləcə də akademiyanın Coğrafiya İnstitutu ilə İtaliyanın Dəniz Mühəndisliyi İnstitutu arasında icra olunacaq.

Mənbə: www.science.az.

Səhifələr  1  2  3  4   5