Biofizika İnstitutunun yarımillik fəaliyyəti müzakirə olunub

İyulun 8-də AMEA Biofizika İnstitutunun Elmi Şurasının növbəti iclası keçirilib.

İclası institutun baş direktoru, AMEA-nın müxbir üzvü Oktay Qasımov açaraq, 7 iyul 2022-ci il tarixində AMEA Rəyasət Heyəti üzvlərinin elmi müəssisə və təşkilatların rəhbərləri ilə “Açıq mikrofon” formatında keçirilən görüşündən irəli gələn tapşırıqları şura üzvlərinin diqqətinə çatdırıb.

Daha sonra iclasda institutun elmi işçilərinin 2022-ci il üçün təsdiq olunmuş fəaliyyət planı üzrə I yarımildə gördükləri işlərə dair hesabat müzakirə edilib və Elmi şura üzvlərinin yekdil qərarı təsdiq olunub.

Sonda şura üzvləri  Biofizika İnstitutunda “Biofizika”, “Bioloji sistemlər fizikası” və “Genetika” ixtisasları üzrə təhsil alan magistrantların 2021/2022-ci tədris ilinin yay imtahan sessiyasının və attestasiyasının  nəticələri ilə tanış olublar. Elmi rəhbərlər magistrantların cari il ərzində dərslərə davamiyyəti, verilən tapşırıqların icrası və dissertasiya işlərinin tərtibatı məsələləri ətrafında çıxış edərək irad və təkliflərini bildiriblər. Müzakirələrə yekun vuran Şura sədri O.Qasımov növbəti tədris ilində mövcud nöqsanların aradan qaldırılması ilə bağlı müvafiq tövsiyyə və tapşırıqlarını verib.

08 İyul 2022

Paylaş