Biofizika İnstitutunun əməkdaşları Türkiyədə elmi ezamiyyətdə olublar

Biofizika İnstitutunun Biomolekulların strukturu, dinamikası və funksiyası laboratoriyasının aparıcı elmi işçisi, fizika-riyaziyyat üzrə fəlsəfə doktoru, dosent Rasim Aslanov və Molekulyar və hüceyrə biokimyası laboratoriyasının elmi işçisi Mətanət Baxışova Türkiyənin İstanbul Universitetində elmi ezamiyyətdə olublar.

Ezamiyyənin məqsədi Azərbaycan Milli Elmlər Akademiyası (AMEA) və Türkiyə Elmi və Texnoloji Tədqiqat Şurası (TÜBİTAK) arasında imzalanmış Əməkdaşlıq Sazişi üzrə Müştərək Proqram çərçivəsində yerinə yetirilən “Konformasiya dəyişkənliyinin və D-amin turşusu əvəzlənməsinin düyü kəpək pentapeptidinin anti-xərçəng aktivliyinə təsirinin qiymətləndirilməsi: Anti-xərçəng dərman tapılması üçün göstərişlər” ikitərəfli layihə üzrə görülən işlərin son nəticələrinin müzakirəsi və AMEA ilə TÜBİTAK arasında 4-cü layihə müsabiqəsinə təqdim olunacaq mövzu üzrə fikir mübadiləsinin aparılması olub.

İnstitutun əməkdaşları ezamiyyət çərçivəsində İstanbul Universitetinin Fizika departamentinin əməkdaşları, professor Ayşen Özel, dosent Sefa Çelik və sözügedən müəssisənin Astronomiya və Kosmos Elmləri Fakültəsinin dekanı, professor Dr. Tansel Ak ilə görüşərək TÜBİTAK-AMEA (TUBİTAK-118F445) layihəsi zamanı əldə olunan nəticələr ətrafında müzakirələr aparıblar. Keçirilən seminarda alınmış elmi nəticələrin təqdimatını gənc alim Mətanət Baxışova edib. Görüş zamanı, həmçinin 15 sentyabr tarixində elan olunmuş yeni TÜBİTAK-AMEA layihəsinə təqdim olunacaq mövzu üzrə fikir mübadiləsi aparılıb və gələcək əməkdaşlıq perspektivlərinin bundan sonra da uğurla davam etdiriləcəyinə əminlik ifadə olunub.

01 Noyabr 2022

Paylaş