Biofizika İnstitutunun əməkdaşı Tovuzda gənc alimlərin yay düşərgəsində iştirak edib

           2-8 sentyabr 2023-cü il tarixlərində Gənclər və İdman Nazirliyinin və Azərbaycan Milli Elmlər Akademiyasının (AMEA) Gənc Alim va Mütəxəssislər Şurasının birgə təşkilatçılığı ilə Tovuz Olimpiya İdman Kompleksində ölkə üzrə gənc alim və mütəxəssislərin, müxtəlif ali tahsil müəssisələrinin tələbələrinin iştirakı ilə “Gənc alimlərin yay düşərgəsi" keçirilib. Düşərgənin proqramına əsasən gənc alimlərə bir sıra mövzularda təlimlər keçirilib və seminarlar təşkil olunub. Eyni zamanda Biofizika İnstitutunun "Molekulyar və hüceyrə biokimyası laboratoriyası"nın elmi işçisi və institutun Gənc Alim və Mütəxəssislər Şurasının sədri Mətanət Baxışova  "Sağlam və xərçəng hüceyrə membranlar arasındakı fərqlər və bu fərqliliyin xərçəng xəstəliyinin müalicəsindəki rolu" adlı mövzu ilə təlimçi olaraq iştirak edib. Təlim çox böyük maraqla qarşılanıb və mövzu ətrafında elmi diskussiya aparılıb.

         Düşərgənin təşkilində əsas məqsədlərdən biri gənc elm adamlarının bir-biri ilə əlaqələrinin təmin olunması və gələcək işlər üçün fikir mübadiləsinin aparılması idi. Bundan əlavə düşərgə boyunca gənclərin öz asudə vaxtlarını səmərəli keçirmələri üçün müxtəlif intellektual-əyləncəli oyunlar, idman yarışları keçirilib.

Sonda Mətanət Baxışova Gənclər və İdman Nazirliyinə və AMEA-nın Gənc Alim və Mütəxəssislər Şurasının sədri Elmir Babayev başda olmaqla təşkilatçılıqda əməyi olan hər kəsə öz təşəkkürünü bildirib.

12 Sentyabr 2023

Paylaş