AMEA Biofizika İnstitutunda Xocalı soyqırımına həsr olunmuş anım tədbiri keçirildi

AMEA Biofizika İnstitutunda Xocalı faciəsinin 28-ci ildönümü ilə əlaqədar tədbir keçirildi.

Tədbirdə giriş sözü ilə çıxış edən İnstitutun direktoru, AMEA-nın müxbir üzvü Oktay Qasımov Xocalı soyqırımının XX əsrin Azərbaycan xalqına qarşı yönəldilmiş ən dəhşətli cinayətlərindən biri olduğunu bildirdi. Qeyd etdi ki, bu faciənin geniş ictimaiyyətə çatdırılmasında və məsələyə  düzgün siyasi qiymət verilməsində ulu öndər Heydər Əliyevin böyük əməyi olub.

Sonra İnstitutun Gənc alimlər və mütəxəssislər şurasının sədri, “Ekoloji biofizika” laboratoriyasının böyük elmi işçisi, biologiya üzrə fəlsəfə doktoru Ruhiyyə Quliyeva çıxış edərək ermənilərin Xocalıda törətdikləri qanlı cinayətlərdən, Xocalı soyqırımının təfərrüatlarından, bu soyqırımın dünyada tanıdılması istiqamətində görülən işlərdən danışdı.

Tədbirdə  digər çıxış edənlər Xocalı soyqırımını bütün bəşəriyyətə qarşı törədilmiş cinayət adlandıraraq, bu faciənin dünya ictimaiyyətinə çatdırılmasında gənclərimizin daha çox fəallıq göstərməsinin vacibliyini vurğuladılar.

Sonda Xocalı faciəsi qurbanlarının xatirəsi bir dəqiqəlik sükutla yad edildi.

25 Fevral 2020

Paylaş