Biofizika İnstitutunda akademik Zərifə Əliyevanın 100 illik yubileyinə həsr olunmuş tədbir keçirilib

Elm və Təhsil Nazirliyinin Biofizika İnstitutunda görkəmli oftalmoloq alim, akademik Zərifə Əliyevanın anadan olmasının 100 illik yubileyinə həsr edilmiş tədbir keçirilib.

Tədbirdə Zərifə xanım Əliyevanın əziz xatirəsi bir dəqiqəlik sükutla yad edildikdən sonra institutun baş meneceri, t.ü.f.d. Azad Əbdürəhimov görkəmli alimin zəngin və mənalı ömür yolu ilə bağlı fikirlərini bölüşüb. Bildirib ki, Azarbaycan ziyalı qadınının ən gözəl nümunələrini özündə birləşdirən elm xadimi Zərifə Əliyeva hər zaman yaddaşlarda vətənpərvər alim, xeyirxah insan, qayğıkeş ana, sədaqətli ömür-gün yoldaşı kimi əbədi olaraq yaşayacaq.

Sonra institutun Molekulyar və hüceyrə biokimyası laboratoriyasının kiçik elmi işçisi Sevda Mahmudova çıxış edərək Əməkdar elm xadimi, Azərbaycan Milli Elmlər Akademiyasının həqiqi üzvü Zərifə Əziz qızı Əliyevanın pedaqoji və həkimlik fəaliyyətindən danışıb, oftalmologiya sahəsindəki misilsiz xidmətləri barədə tədbir iştırakçılarına məlumat verib.

Tədbirdə, həmçinin institutun Ekoloji biofizika laboratoriyasının müdiri, biologiya elmləri doktoru, professor Tokay Hüseynov çıxış edərək Zərifə xanım Əliyevanın  oftalmologiyanın inkişafına verdiyi töhfələrdən danışıb, eyni zamanda görkəmli alimlə bağlı xatirələrini bölüşüb.

Sonda akademik Zərifə Əliyevanın 100 illiyinə həsr olunmuş videoçarx nümayiş etdirilib.

28 Aprel 2023

Paylaş