Tanınmış alim, biokimyaçı və molekulyar bioloq Kərim Quli oğlu Qasımovun 65 yaşı tamam olur

Noyabr ayının 30-da tanınmış alim, biokimyaçı və molekulyar bioloq, AR Elm və Təhsil Nazirliyinin Biofizika İnstitutunun icraçı direktoru və  “Molekulyar və hüceyrə biokimyası” laboratoriyasının rəhbəri, biologiya elmləri doktoru, Kərim Quli oğlu Qasımovun 65 yaşı tamam olur.

Kərim Qasımov 1958-ci il noyabr ayının 30-da Saatlı rayonun Qaracalar kəndində anadan olmuşdur. 1975-ci ildə orta məktəbi əla qiymətlərlə bitirərək, Azərbaycan Dövlət Universitetinin  Biologiya fakültəsinə daxil olmuşdur.

1981-ci ildə ali məktəbi bitirdikdən sonra Azərbaycan Elmlər Akademiyasının Zoologiya İnstitutunda işləmişdir. 1982-1984-cü illərdə, Moskva şəhərində SSRİ EA İEMEJ-də elmi təcrübə keçmişdir. 1984-cü ildə Moskva şəhərində SSRİ EA, A.N. Bax adına Biokimya İnstitutunun aspiranturasına qəbul olunmuşdur.

1989-cu ildə “Qarğıdalı cücərtilərində 3´,5´-cAMP fosfodiesterazanın fəallığının qırmızı işıq və kalmodulinlə tənzimlənməsi” mövzusu ilə namizədlik, 2009-cu ildə isə “Eukariotlarda siqnalların ötürülməsinin bəzi molekulyar-genetik xüsusiyyətləri: G-zülallar və Jointless-1 transkripsiya faktoru” mövzusu ilə doktorluq dissertasiyasını müdafiə etmişdir.

1992-ci ilin fevral ayına qədər Azərbaycan Elmi Tədqiqat Əkinçilik İnstitutunda kiçik elmi işçi, sonra isə baş elmi işçi vəzifəsində çalışmışdır. 1992-ci ilin fevral ayından etibarən Azərbaycan Elmlər Akademiyasının Botanika İnstitutunda  “Məhsuldarlıq proseslərinin molekulyar-genetik əsasları” şöbəsində baş elmi işçi vəzifəsində işləmişdir. 1996-1997-ci illərdə Yaponiya Elmin İnkişaf Cəmiyyətinin (JSPS) uzunmüddətli qrantını qazanaraq, Yaponiyanın Kobe Universitetində elmi-tədqiqat işləri aparmışdır.

1997-1999, 2006-2010-cu illərdə AMEA Botanika İnstitununun “Məhsuldarlıq proseslərinin molekulyar-genetik əsasları” şöbəsində aparıcı elmi işçi vəzifəsində çalışmışdır. 2000-ci ilin iyul ayından, 2006-cı ilin iyun ayına qədər ABŞ-ın Ayova Universitetində müqavilə ilə NIH və NSE qrantları üzrə tədqiqat işləri aparmışdır. 2010-cu ildə AMEA Botanika İnstitununda yaradılmış “Hüceyrənin tənzimləyici sistemləri” laboratoriyasının müdiri vəzifəsində elmi fəaliyyətini davam etdirmişdir. 2016-cı ildə rəhbərlik etdiyi laboratoriya ilə birlikdə yeni yaradılmış AMEA Molekulyar Biologiya və Biotexnologiya İnstitutuna keçirilmişdir. 2017-ci ilin yanvar ayından etibarən yeni yaradılmış AMEA Biofizika İnstitutunda direktorun elmi işlər üzrə müavini (hal hazırda icraçı direktor) vəzifəsində çalışır.

Kərim Qasımovun əsas elmi fəaliy­yəti Ali bitkilərdə hüceyrə siqnal sistemlərinin təşkili və genetik nəzarəti, Rekombinant zülallardan istifadə edərək quanin nükleotidlərin mübadiləsində GPR motif zülalların rolunun tədqiqi, Rhodopsin reseptoru və transducin G-zülaldan istifadə edən hüceyrə siqnallarının ötürülməsinin molekulyar mexanizmlərinin tədqiqi, İnkişaf zamanı bitki diferensiyasiyasının transkripsiya səviyyəsində tənzimlənməsi nümunəsi kimi, tomat bitkilərində çiçək və yarpaq saplağında düşmə zonasının formalaşmasında MADS domenli transkripsiyası faktoru, Ətraf mühitin abiotik stresslərinə bitki reaksiyalarının transkripsiya səviyyəsində tənzimlənməsi kimi WRKY superailəsi üzvlərinin yuxarı duz qatılığı və su çatışmazlığı kimi abiotik stresslərə qarşı bitkilərin cavab reaksiyalarında rolu ilə bağlıdır.

Hal-hazırda K. Qasımov “Molekulyar və hüceyrə biokimyası” laboratoriyası üzrə xərçəng xəstəliklərinin (xüsusilə də ağciyər, süd vəzi və yoğun bağırsaq karsinomalarının) yaranmasında iştirak edən hüceyrə səth reseptorlarının və siqnal yolunda iştirak edən digər zülalların öyrənilməsi və bunlarda baş verən potensial mutasiyaların araşdırılmasını aparır.

Alim 57 elmi məqalənin (xaricdə çıxmış elmi əsərlərinin sayı 29, beynəlxalq bazalarda referatlaşdırılan və indeksləşdirilən jurnallarda çap olunan məqalələrin sayı 16) müəllifidir.

Kərim Qasımovu 65 illik yubileyi münasibəti ilə səmimi qəlbdən təbrik edirik, ona uzun ömür, möhkəm can sağlığı, Azərbaycan elminin inkişafı yolunda böyük nailiyyətlər arzulayırıq.

30 Noyabr 2023

Paylaş