Biofizika İnstitutunun Elmi şurasının növbəti iclasında laboratoriyaların 2023-cü il üzrə hesabatı dinlənilib

AR Elm və Təhsil Nazirliyinin Biofizika İnstitutunun Elmi şurasının növbəti iclası keçirilib.

İnstitutun baş direktoru, AMEA-nın müxbir üzvü Oktay Qasımovun sədrliyi ilə baş tutan tədbirdə Biofizika İnstitutunda fəaliyyət göstərən laboratoriyaların 2023-cü ildəki elmi-təşkilati fəaliyyətinin yekunlarına dair laboratoriya rəhbərlərinin və icraçıların hesabatları dinlənilib.

İclasda institutun Molekulyar və hüceyrə biokimyası, İnteqrativ biologiya, Biomolekulların strukturu, dinamikası və funksiyası, Ekoloji biofizika, Molekulyar və hüceyrə onkologiyası laboratoriyalarının müdirləri, b.e.d. Kərim Qasımov, AMEA-nın müxbir üzvü İlham Şahmuradov, professor Tokay Hüseynov, b.ü.f.d. Leylaxanım Məlikova və müvafiq elmi işlər üzrə icraçılar dosentlər Rasim Aslanov, Mürsəl Dadaşov, Sevinc Cəfərova, k.e.i. Zərifə Osmanlı təqdimatla çıxış edərək elmi müəssisənin laboratoriyalarında 2023-cü ildə aparılan elmi tədqiqat işlərinin mühüm nəticələri, onların elmi və praktiki əhəmiyyəti, beynəlxalq indeksli jurnallarda dərc edilmiş elmi məqalələr, qrant layihələri, kadr hazırlığı, elmlə təhsilin inteqrasiyası, konfranslarda iştirak, beynəlxalq elmi əlaqələr və əməkdaşlıq haqqında hesabat veriblər.

Sonra çıxışlar ətrafında geniş müzakirələr aparıldı, təkliflər səsləndirildi.

Sədr, prof. Oktay Qasımov laboratoriyaların elmi və elmi-təşkilati fəaliyyətləri haqqında illik hesabatlarının qəbul edilməsi məsələsini səsverməyə çıxardı. Elmi Şuranın üzvləri laboratoriyaların elmi və elmi-təşkilati fəaliyyətləri haqqında illik hesabatlarını açıq səsvermə yolu ilə qəbul etdilər.

Sonra Elmi Şuranın sədri, AMEA-nın müxbir üzvü Oktay Qasımovun sədrliyi ilə keçirilən iclasda AR ETN-nin 16 noyabr 2023-cü il tarixli 3-29/2-7719/2023 nömrəli məktubu müzakirə edilərək, tapşırıqlar verildi.

Daha sonra AR ETN Biofizika İnstitutunun elmlər doktoru hazırlığı üzrə doktorantı, b.ü.f.d. L.Ə. Məlikovanın attestasiyasının nəticəsi müzakirə edilərək, təsdiq edildi.

Sonda AR ETN Biofizika İnstitutunun əməkdaşlarının Qərbi Kaspi Universiteti ilə əməkdaşlıq imkanları haqqında məlumat müzakirəsi aparıldı və qeyd olundu ki, İnstitutun PhD və ED əməkdaşları könüllü şəkildə onlarla əməkdaşlığa qoşula bilərlər.