Biofizika İnstitutunda Xocalı faciəsinin 33-cü ildönümünə həsr olunmuş anım tədbiri keçirilib
AR ETN Biofizika İnstitutunda Xocalı faciəsinin 33-cü ildönümünə həsr olunmuş anım tədbiri keçirilib.
Əvvəlcə Xocalı soyqırımı qurbanlarının və bütün şəhidlərimizin əziz xatirəsi bir dəqiqəlik sükutla yad edilib.
Tədbirdə çıxış edən Biofizika İnstitutunun baş direktoru, AMEA-nın müxbir üzvü Oktay Qasımov Xocalı faciəsinin Azərbaycan tarixinə qanlı bir səhifə kimi həkk olunduğunu vurğulayıb. O, bu dəhşətli hadisənin təkcə Azərbaycan xalqına qarşı deyil, bütövlükdə bəşəriyyətə qarşı törədilmiş ağır cinayət olduğunu qeyd edib. Oktay Qasımov Xocalı soyqırımının beynəlxalq səviyyədə tanınmasının vacibliyini diqqətə çatdıraraq, bu istiqamətdə Azərbaycan dövlətinin və diaspor təşkilatlarının mühüm işlər gördüyünü bildirib. O, həmçinin faciənin dünyaya çatdırılmasında görkəmli jurnalist mərhum Çingiz Mustafayevin əvəzsiz rolunu qeyd edərək, onun çəkdiyi unikal görüntülərin Xocalı soyqırımının dünya ictimaiyyətinə tanıdılmasında mühüm əhəmiyyət kəsb etdiyini vurğulayıb.
Daha sonra institutun Gənc Alim və Mütəxəssislər Şurasının üzvü, İnteqrativ Biologiya laboratoriyasının kiçik elmi işçisi Aysel Əliyeva “Xocalı Soyqırımı: Tarixin Qara Bir Səhifəsi və Xocalının Yeni Siması” mövzusunda məruzə ilə çıxış edib. O, 1992-ci il fevralın 25-dən 26-na keçən gecə erməni silahlı qüvvələri və 366-cı motoatıcı alayın iştirakı ilə Xocalıya hücum edildiyini, şəhərin tam mühasirəyə alındığını və dinc əhaliyə qarşı misli görünməmiş qəddarlıqla soyqırım törədildiyini bildirib.
Aysel Əliyeva Xocalı faciəsinin acı nəticələri barədə danışaraq, 613 nəfərin şəhid olduğunu, onlardan 63-nün uşaq, 106-nın qadın, 70-nin isə yaşlı insan olduğunu vurğulayıb. O, 487 nəfərin ağır yaralandığını, 1275 nəfərin əsir götürüldüyünü və 150 nəfərin itkin düşdüyünü qeyd edərək, bu dəhşətli cinayətin insanlığa qarşı törədilmiş bir soyqırım olduğunu diqqətə çatdırıb. O, həmçinin faciənin Türkiyə, Pakistan, Meksika, Kolumbiya, Çexiya, Bosniya və Herseqovina və digər ölkələr tərəfindən rəsmi olaraq soyqırım kimi tanındığını bildirib.
Aysel Əliyeva məruzəsində Xocalının yeni siması barədə də danışıb. O, 2020-ci il Vətən müharibəsindən sonra Xocalının da daxil olduğu işğaldan azad edilən ərazilərdə genişmiqyaslı yenidənqurma işlərinin aparıldığını, Böyük Qayıdış proqramı çərçivəsində soyqırım qurbanlarının ailələrinin doğma torpaqlarına qayıtmağa başladığını qeyd edib.
Daha sonra çıxış edən tibb üzrə fəlsəfə doktoru Azad Əbdürəhimov Aysel Əliyevaya maraqlı məruzəsinə görə təşəkkür edərək, Xocalının yalnız faciə şəhəri kimi deyil, həm də dirçəlişin və gələcəyə nikbin baxışın simvolu kimi yenidən qurulduğunu bildirib. O, hər il Xocalı faciəsini anmağın və eyni zamanda gələcəyə ümidlə baxmağın vacibliyini vurğulayıb.
Tədbirin sonunda Xocalı faciəsinə həsr olunmuş videoçarx nümayiş etdirilib.
