Elm və Ali Təhsil üzrə Dövlət Agentliyinin nümayəndələri Biofizika İnstitutunda qonaq olublar
Elm və Ali Təhsil üzrə Dövlət Agentliyinin Elmi müəssisələrlə iş şöbəsinin müdiri, riyaziyyat elmləri doktoru Mübariz Hacıbəyov və həmin şöbənin aparıcı məsləhətçisi, biologiya üzrə fəlsəfə doktoru Babək Əlibəyov Biofizika İnstitutunda qonaq olublar. Onları institutun baş direktoru, AMEA-nın müxbir üzvü Oktay Qasımov, icraçı direktor, biologiya üzrə elmlər doktoru Kərim Qasımov və tibb üzrə fəlsəfə doktoru Azad Əbdürəhimov qarşılayıblar.
Görüş zamanı qonaqlara Biofizika İnstitutunun fəaliyyət istiqamətləri, həyata keçirdiyi elmi araşdırmalar və gələcək planları barədə ətraflı məlumat verilib. Oktay Qasımov institutun əsas tədqiqat sahələrinin xərçəng xəstəlikləri və yaşla bağlı olan neyrodegenerativ xəstəliklər, o cümlədən Alzheymer və Parkinson xəstəlikləri ilə bağlı olduğunu bildirib. O qeyd edib ki, institutda ilk dəfə olaraq süni intellektin tətbiqi ilə ağciyər xərçəngi xəstələrinin qan plazmasının infraqırmızı spektrləri əsasında diaqnostik modellər hazırlanıb. Bu texnologiya vasitəsilə xəstələrin sağlam və ya xəstə olmasını əvvəlcədən müəyyən etmək mümkün olur.
İnstitutda aparılan elmi tədqiqatlar geniş spektri əhatə edir. Buraya neyrodegenerativ xəstəliklərin molekulyar mexanizmlərinin tədqiqi, biomolekulların strukturu və funksiyasının öyrənilməsi, xərçəng və sağlam hüceyrə membranlarının müqayisəli analizi, zülal əsaslı nanozərrəciklərinn hazırlanması və dərman daşıyıcı sistemlərin yaradılması daxildir. Bundan başqa, qan plazmasının infraqırmızı spektrləri əsasında yeni diaqnostik metodların işlənib hazırlanması, anti-xərçəng agentlərin hüceyrə səviyyəsində təsir mexanizmlərinin araşdırılması, xərçəngə səbəb olan gen mutasiyalarının müəyyən edilməsi və xəstəliyin inkişafını proqnozlaşdırmağa imkan verən riyazi modellərin qurulması üzrə araşdırmalar aparılır.
Görüş çərçivəsində qonaqlar institutun laboratoriyaları ilə də tanış olublar. Onlara laboratoriyalarda həyata keçirilən elmi tədqiqatlar, təhlükəsizlik və gigiyena tədbirləri, avadanlıqların texniki vəziyyəti, təcrübə metodologiyası, kimyəvi və bioloji materialların saxlanma qaydaları barədə də ətraflı məlumat verilib.
Sonda qonaqlar Biofizika İnstitutunun rəhbərliyinə və kollektivinə gələcək elmi fəaliyyətlərində uğurlar arzulayıb, institutun tədqiqatlarının Azərbaycan elminin inkişafına mühüm töhfə verdiyini vurğulayıblar.
