Biofizika İnstitutunda Elmi Şuranın növbəti iclası keçirilib

24 aprel 2025-ci il tarixində Azərbaycan Respublikası Elm və Təhsil Nazirliyinin Biofizika İnstitutunda Elmi Şuranın növbəti iclası keçirilib. İclas institutun baş direktoru, AMEA-nın müxbir üzvü Oktay Qasımovun sədrliyi ilə baş tutub.

İclasda ilk olaraq, Bakı Dövlət Universitetinin Maddə quruluşu kafedrasının professoru, fizika-riyaziyyat elmləri doktoru, Eldar Məsimovun “Su əsaslı ikifazalı sistemlər və onların tətbiq perspektivləri” mövzusunda təqdim edəcəyi məruzə haqqında məlumat verilib. Mövzunun fundamental və tətbiqi elmlər baxımından əhəmiyyəti vurğulanıb, xüsusilə biologiya və biotexnologiya sahələrində yeni imkanlar açan yanaşmaların ətraflı izahının gözlənildiyi bildirilib.

Daha sonra Biofizika İnstitutunun Hüceyrə siqnalının ötürülməsi laboratoriyasının müdiri, biologiya üzrə fəlsəfə doktoru, dosent Taleh Yusifovun Kaliforniya Universitetinə (ABŞ) 15 yanvar–14 aprel 2025-ci il tarixlərini əhatə edən elmi ezamiyyəti ilə bağlı hesabatı dinlənilib. Eyni zamanda, Kaliforniya Universitetinin Molekulyar Tibb bölməsinin Anesteziologiya və Fiziologiya üzrə professoru Rikkardo Olsisin 9 aprel 2025-ci il tarixli məktubu ilə bağlı fikir mübadiləsi aparılıb.

Taleh Yusifov çıxışında Kaliforniya Universiteti ilə Biofizika İnstitutu arasında mövcud olan qarşılıqlı əlaqə proqramının uğurla davam etdirildiyini vurğulayıb. O qeyd edib ki, ion kanalları və onların yaratdığı bioelektrik siqnallarının onkoloji tədqiqatlar sahəsində əhəmiyyəti xüsusilə artmaqdadır. Həmin laboratoriyada uzun illərdir aparılan elektrofizioloji tədqiqatların, mühüm elmi kəşflərin və yeni texniki vasitələrin hazırlanmasında böyük rol oynadığını bildirib. Olsisin laboratoriyasında işləmək təcrübəsinin onun üçün həm elmi, həm də peşəkar baxımdan olduqca dəyərli olduğunu qeyd edən Yusifov, bu imkanı yaratdığı üçün Biofizika institutunun rəhbərliyinə təşəkkürünü bildirib. O, həmçinin Azərbaycan elmini beynəlxalq səviyyədə təmsil etməkdən qürur duyduğunu ifadə edib.

İclasın sonunda gündəlikdəki cari məsələlər müzakirə olunub və müvafiq qərarlar qəbul edilib.