Biofizika İnstitutunda doktorantın attestasiyası keçirilib

02 may 2025-ci il tarixində Azərbaycan Respublikası Elm və Təhsil Nazirliyinin Biofizika İnstitutunda elmlər doktoru hazırlığı üzrə qiyabi doktorant, biologiya üzrə fəlsəfə doktoru, dosent Mürsəl Dadaşovun növbəti attestasiyası keçirilib.

İclası giriş sözü ilə Attestasiya Komissiyasının sədri, biologiya elmləri doktoru Kərim Quli oğlu Qasımov açaraq, iştirakçıları salamlayıb və gündəlik barədə qısa məlumat verib. Daha sonra o, attestasiyanın əsas məqsədini vurğulayaraq elmlər doktoru hazırlığı prosesində əldə olunan nəticələrin və doktorantın elmi fəaliyyətinin qiymətləndirilməsinin vacibliyini qeyd edib. Komissiya sədri çıxışını yekunlaşdıraraq doktorantın illik elmi fəaliyyəti barədə hesabatını təqdim etməsi üçün sözü biologiya üzrə fəlsəfə doktoru, dosent Mürsəl Dadaşova verib.

Mürsəl Dadaşov öz çıxışında hesabat dövrü ərzində gördüyü elmi-tədqiqat işləri, yerli və beynəlxalq elmi nəşrlərdə dərc olunmuş məqalələri, konfranslarda iştirakı, əldə etdiyi nəticələr və qarşıya qoyduğu hədəflər haqqında ətraflı məlumat verib. O, həmçinin aparılan tədqiqatların elmi yeniliyini və Biofizika İnstitutunun elmi istiqamətlərinə uyğunluğunu xüsusi vurğulayıb.

Sonda Attestasiya Komissiyası təqdim olunan hesabatı və müzakirə olunan materialları nəzərə alaraq qərara alıb ki, Azərbaycan Respublikası Elm və Təhsil Nazirliyinin Biofizika İnstitutunun elmlər doktoru hazırlığı üzrə qiyabi doktorantı, biologiya üzrə fəlsəfə doktoru, dosent Mürsəl Dadaşovun 2025-ci il üzrə attestasiyası məqbul hesab edilsin.