Magistrant və gənc tədqiqatçıların iştirakı ilə “Fizika və astronomiyanın aktual məsələləri” mövzusunda elmi konfrans keçirilib
15 may 2025-ci il tarixində Bakı Dövlət Universitetinin (BDU) Fizika fakültəsi və Fizika Problemləri Elmi-Tədqiqat İnstitutunun təşkilatçılığı ilə “Konstitusiya və Suverenlik İli” çərçivəsində magistrantların və gənc tədqiqatçıların iştirakı ilə “Fizika və astronomiyanın aktual problemləri” adlı XXV Respublika elmi konfransı baş tutub.
Tədbirdə Elmi fəaliyyətin təşkili və innovasiya mərkəzinin direktoru Mais Süleymanov çıxış edərək iştirakçılara fizika və astronomiya sahəsindəki inkişaf istiqamətləri, bu sahədəki əsas elmi problemlər və universitetdə həyata keçirilən layihələr barədə məlumat verib.
Fizika fakültəsinin dekanı professor Bəxtiyar Paşayev müasir elmi nailiyyətlərin fizika və astronomiyada yeni mərhələnin əsasını qoyduğunu bildirib. O, fundamental elmlərin cəmiyyətin inkişafındakı rolunu vurğulayaraq, süni intellekt və qabaqcıl texnologiyalar fonunda fizikanın imkanları və çağırışları haqqında fikirlərini bölüşüb. Gənc tədqiqatçıların bu sahələrə marağının artırılmasının vacibliyi qeyd olunub.
Konfransın açılış mərasimində çıxış edən BDU-nun Fizika Problemləri Elmi-Tədqiqat İnstitutunun direktoru professor Sədiyar Rəhimov tədbirdə Elm və Təhsil Nazirliyinin Fizika İnstitutu, Radiasiya Problemləri İnstitutu, Biofizika İnstitutu, N.Tusi adına Şamaxı Astrofizika Rəsədxanası, eləcə də müxtəlif universitetlərin nümayəndələrinin iştirak etdiyini bildirib. O, ümumilikdə 108 elmi tezisin qəbul edildiyini diqqətə çatdırıb.
Biofizika İnstitutunun baş direktoru, professor Oktay Qasımov çıxışında institutda aparılan tədqiqat işləri barədə məlumat verib, gənc alimlər üçün yaradılan belə platformaların əhəmiyyətini vurğulayıb və təşkilatçılara təşəkkürünü bildirib.
Konfrans plenar iclaslarla davam edib və daha sonra iştirakçılar beş bölmə üzrə elmi müzakirələrə cəlb olunublar.
Tədbirdə Elm və Təhsil Nazirliyinin Biofizika İnstitutunun əməkdaşları da fəal iştirak ediblər. İnstitutun “Molekulyar və hüceyrə biokimyası” laboratoriyasının kiçik elmi işçisi Fidan Qüdrətova “BK ion kanalında yeni funksional quruluşların öyrənilməsi”, “Hüceyrə siqnal ötürülməsi” laboratoriyasının kiçik elmi işçisi Aysel Əliyeva isə “İon kanallarının hem vasitəsilə tənzimlənmə mexanizmləri” mövzusunda elmi məruzə ilə çıxış ediblər. Onların təqdimatları konfrans iştirakçıları tərəfindən maraqla qarşılanıb.
Konfransın sonunda iştirakçılara xatirə sertifikatları təqdim olunub.
