AR Elm və Təhsil Nazirliyi Biofizika İnstitutunda Elmi Şuranın növbəti iclası keçirilib

AR Elm və Təhsil Nazirliyi Biofizika İnstitutunda Elmi Şuranın növbəti iclası baş tutub. Toplantıya institutun baş direktoru, AMEA-nın müxbir üzvü, professor Oktay Qasımov sədrlik edib.

İclasın gündəliyinə daxil edilən məsələlər ətrafında geniş müzakirələr aparılıb.

Əvvəlcə Azərbaycan Respublikası Nazirlər Kabinetinin 02 may 2025-ci il tarixli 275s nömrəli sərəncamına uyğun olaraq fəlsəfə doktoru proqramı üzrə doktoranturaya qəbul məsələsi nəzərdən keçirilib. Səsvermənin nəticələrinə əsasən qərara alınıb ki, Fidan Rəhim qızı Qüdrətova “Biofizika” ixtisası üzrə qiyabi doktoranturaya, Əlislam Ehtibar oğlu Həşimov isə “Biokimya” ixtisası üzrə əyani doktoranturaya qəbul edilsin.

Sonrakı müzakirə mövzusu institutda elmlər doktoru hazırlığı üzrə doktorantların tədqiqat istiqamətləri ilə bağlı olub. İştirakçıların təklif və rəyləri nəzərə alınaraq doktorantların bəzilərinin dissertasiya mövzularında dəqiqləşdirmələr və qismən dəyişikliklər aparılması məqsədəuyğun hesab edilib və bununla bağlı müvafiq qərarlar qəbul olunub.

İclasın sonunda cari məsələlər ətrafında fikir mübadiləsi aparılıb. İnstitutun elmi fəaliyyətinin səmərəliliyinin artırılması, təşkilati işlərin təkmilləşdirilməsi və gələcək planlarla bağlı bir sıra təkliflər irəli sürülüb, onların icrası üçün konkret tapşırıqlar verilib.