Biofizika İnstitutunda 27 Sentyabr — Anım Gününə həsr olunmuş tədbir keçirilib
Tədbirin əvvəlində hər iki Qarabağ müharibəsində Vətən uğrunda canından keçən şəhidlərin xatirəsi bir dəqiqəlik sükutla yad edilib. Daha sonra çıxış edən İnstitutun baş direktoru, AMEA-nın müxbir üzvü, professor Oktay Qasımov şəhidlərin əziz xatirəsinin xalqımızın yaddaşında əbədi yaşayacağını vurğulayıb:
“İkinci Qarabağ müharibəsi xalqımızın tarixi zəfəri kimi yaddaşlara həkk olunub. Azərbaycanın suverenliyi ərazi bütövlüyü tam şəkildə bərpa olunub və biz artıq yeni inkişaf mərhələsinə qədəm qoymuşuq. Bu gün ölkəmiz dünyanın ən nüfuzlu maliyyə və investisiya qurumları ilə əməkdaşlıq edir, böyük layihələrə imza atır. Əgər bu qələbə olunmasaydı, bu imkanların heç biri reallaşmazdı. Biz həmin müharibədə yalnız torpaqlarımızı deyil, həm də milli kimliyimizi, dövlətçiliyimizi qorumuşuq. Bu, xalqımızın Vətənə bağlılığını, torpaqlar uğrunda fədakarlığını bütün dünyaya göstərib. Bu zəfər gələcək nəsillərə ən böyük motivasiya, ən güclü örnək olub.”
Daha sonra institutun “Biomolekulların strukturu, dinamikası və funksiyası laboratoriyası”nın elmi işçisi Ləman Süleymanova çıxış edib. O, 27 Sentyabrın Azərbaycan tarixində dönüş nöqtəsi olduğunu vurğulayaraq bildirib:
“Bu gün yalnız matəm günü deyil, həm də qəhrəmanlıq günüdür. 27 sentyabr 2020-ci ildə başlayan Vətən müharibəsi Azərbaycan xalqının 30 illik həsrətinə son qoydu. 44 günlük zəfər yürüşündə torpaqlarımız azad edildi, Qarabağda Azərbaycanın suverenliyi bərpa olundu. Bu qələbə şəhidlərimizin qanı, qazilərimizin fədakarlığı, xalqımızın birliyi və Müzəffər Ali Baş Komandan İlham Əliyevin qətiyyətli rəhbərliyi hesabına qazanıldı. Bu gün isə Qarabağda həyat yenidən qurulur – yollar, məktəblər, xəstəxanalar, ağıllı şəhərlər salınır. Bu da bir müharibədir – bərpa müharibəsi və Azərbaycan xalqı bu müharibəni də qazanacaq”.
Çıxışlarda qeyd olunub ki, 27 Sentyabr həm qəhrəmanlıq, həm də milli həmrəylik günüdür. Bu tarix Azərbaycan gəncliyi üçün vətən sevgisinin, birlik və bərabərliyin simvolu kimi hər zaman xatırlanacaq.
Tədbirin sonunda 27 Sentyabr — Anım Gününə həsr olunmuş videoçarx nümayiş etdirilib. Videoçarxda müharibə xronikası, şəhidlərimizin şərəfli həyat yoluna dair görüntülər və Qarabağda qazanılmış tarixi zəfəri əks etdirən kadrlar tədbir iştirakçılarına dərin emosiyalar yaşadıb.
