Biofizika İnstitutunda Ümummilli Lider Heydər Əliyevin anım gününə həsr olunmuş tədbir keçirilib

Dekabrın 12-də Azərbaycan Respublikası Elm və Təhsil Nazirliyi Biofizika İnstitutunda Ümummilli Lider Heydər Əliyevin anım gününə həsr olunmuş xatirə tədbiri təşkil edilib. Tədbir iştirakçıları əvvəlcə Ulu Öndərin əziz xatirəsini bir dəqiqəlik sükutla yad ediblər.

İnstitutun baş direktoru, AMEA-nın müxbir üzvü Oktay Qasımov giriş nitqi ilə çıxış edərək, Heydər Əliyevin Azərbaycan dövlətçiliyinin möhkəmlənməsi, ölkədə sabitliyin təmin olunması və inkişafın təməl prinsiplərinin qoyulmasındakı misilsiz xidmətlərindən danışıb. O. Qasımov vurğulayıb ki, 1990-cı illərin əvvəllərində ölkəmiz ciddi iqtisadi və siyasi çətinliklər qarşısında qalmışdı. Bu ağır dövrdə Ulu Öndərin müdrik siyasəti və uzaqgörən idarəçiliyi sayəsində sabitlik bərpa olunmuş, Azərbaycan inkişaf yoluna qədəm qoymuşdur. "Xarici müşahidəçilər də bildirirlər ki, Azərbaycandakı sabitlik bir çox Avropa ölkələrində mövcud deyil. Bu sabitliyin əsası Heydər Əliyev tərəfindən qoyulub və bu gün də davam edir," - deyə O. Qasımov qeyd edib. O həmçinin institut əməkdaşlarını qazanılmış elmi nailiyyətləri geniş ictimaiyyətə çatdırmaq və ölkənin elmi potensialını daha da tanıtmaq istiqamətində fəal olmağa çağırıb.

Tədbirdə çıxış edən Biomolekulların strukturu, dinamikası və funksiyası laboratoriyasının elmi işçisi Aidə Məmmədzadə, Heydər Əliyevin həyat və fəaliyyət yolunu ətraflı təqdim edib. O bildirib ki, Heydər Əliyev 1923-cü il mayın 10-da Naxçıvan şəhərində dəmiryolçu ailəsində dünyaya gəlmiş, 1939-cu ildə Naxçıvan Pedaqoji Texnikumunu bitirmişdir. Daha sonra Azərbaycan Sənaye İnstitutunda memarlıq təhsili almış, lakin II Dünya müharibəsi onun təhsilini yarımçıq qoymuşdur. 1949–1950-ci illərdə Dövlət Təhlükəsizliyi Komitəsinin Leninqrad şəhərində yerləşən Rəhbər Kadrların Hazırlığı Məktəbini bitirmiş, 1950-ci ildə Azərbaycan SSR Dövlət Təhlükəsizliyi Komitəsində bölmə rəisi vəzifəsinə təyin edilmişdir.

Aidə Məmmədzadə qeyd edib ki, Heydər Əliyev yalnız siyasi lider yox, həm də Azərbaycan xalqının milli-mənəvi dəyərlərinin qorunmasına, mədəniyyətin inkişafına və gənc nəsillərin əxlaqi dəyərləri əsasında tərbiyə olunmasına xüsusi önəm verən nadir şəxsiyyət olmuşdur. Ulu Öndər həmişə təhsilə xüsusi diqqət yetirmiş, bu sahədə strateji və uzunmüddətli islahatlar həyata keçirmişdir. Onun təhsil siyasəti yalnız savadlı və bacarıqlı nəsillərin yetişdirilməsini deyil, həm də milli-mənəvi dəyərlərin qorunmasını, tarixi-mədəni irsin yaşadılmasını hədəfləyirdi.

Aidə Məmmədzadə həmçinin vurğulayıb ki, Heydər Əliyevin rəhbərliyi dövründə ölkədə sabitlik bərpa edilmiş, iqtisadiyyat və sosial sahələrdə inkişafın əsasları qoyulmuşdur. Ulu Öndər Azərbaycanın müstəqillik mübarizəsində, dövlətçilik ənənələrinin qorunmasında və gücləndirilməsində misilsiz xidmətlər göstərmiş, xalqın etimadını qazanmışdır.

Tədbirin yekununda Oktay Qasımov çıxış edərək bildirib:
"Heydər Əliyev Azərbaycan tarixində əvəzolunmaz iz qoymuş böyük liderdir. Onun qurduğu dövlətçilik ənənələri, strateji inkişaf konsepsiyası və sabitlik siyasəti gələcək nəsillərə yol göstərəcək dəyərli mirasdır. Biz bu mirası qoruyub saxlamaq, eləcə də inkişaf etdirmək məsuliyyətini daşıyırıq. Ulu Öndərin ideyaları və həyat yolu hər zaman bizi birləşdirən və istiqamətləndirən nümunə olacaqdır."

Tədbirdə Heydər Əliyevin xatirəsinə dərin ehtiram ifadə olunub və iştirakçılar onun həyat və fəaliyyətindən alınacaq dərslərin vacibliyini vurğulayıblar.

Allah rəhmət eləsin!