AR ETN Biofizika İnstitutunun Həmkarlar İttifaqı Komitəsinin 2017-2023-cü illəri əhatə edən hesabat-seçki yığıncağı keçirilib

Elm və Təhsil Nazirliyinin Biofizika İnstitutunun Həmkarlar İttifaqı Komitəsinin 2017-2023-cü illəri əhatə edən hesabat-seçki yığıncağı keçirilib.

İclasda AMEA-nın Azad Həmkarlar İttifaqının (AHİ) Rəyasət Heyətinin üzvü, AR ETN Fizika İnstitutunun Həmkarlar Komitəsinin sədri, fizika üzrə fəlsəfə doktoru Sitarə Bağırova iştirak edib.

Tədbiri giriş sözü ilə açan Biofizika İnstitutunun HİK sədri, dosent Rasim Aslanov gündəlikdə duran məsələlər haqqında məlumat verib. O, hesabat dövrü ərzində Biofizika İnstitutu əməkdaşlarının əmək haqlarından toplanan məbləği, əməkdaşlar tərəfindən istifadə olunan göndərişləri, müalicə məqsədi ilə müraciət edən əməkdaşlar və onlara göstərilən maddi yardımın məbləği, onların nahar fasiləsi və digər asudə vaxtlarının səmərəli keçirilməsi üçün alınan idman avadanlıqlarına sərf olunan vəsaiti, hər il əməkdaşların körpə uşaqlarının sayına görə “Yeni il” şənliklərinə aid biletlərin, “Novruz bayramı” ilə əlaqədar “Bazarstore” mağazalar şirkətindən alınan kuponun dəyəri haqqında məlumatları çatdırıb. Həmçinin,  o, II Qarabağ müharibəsinə dəstək proqramı çərçivəsində və “YAŞAT” fonduna köçürülən vəsait haqqında da məlumat verib. 

R.B.Aslanov, 2018-2023-cü illər ərzində əməkdaşların istirahəti üçün N.Tusi adına Şamaxı Astrofizika Rəsədxanasına Astro-turizm xidmətləri, Akademik Milli Teatrda “Dantenin Yubileyi” tamaşasına biletlərin əldə edilməsi ilə əlaqədar xərclərdən danışıb.

Sonra o, Biofizika İnstitutunun rəhbərliyi ilə birlikdə həmkarlar təşkilatının hər il “Qanlı 20 yanvar” şəhidlərinin xatirəsinə, “COVID19” pandemiyasına, “II Qarabağ” müharibəsinə, “Zəfər Günü”-nə, Ulu Öndər Heydər Əliyevin və akademik Zərifə Əliyevanın anadan olmasının 100 illiyinə həsr olunmuş tədbirlər və seminarlardan danışıb.

 Daha sonra institutun baş direktoru, AMEA-nın müxbir üzvü, prof. Oktay Qasımov çıxışı yekunlaşdıraraq  bildirib ki, Həmkarlar İttifaqının sədri Rasim Aslanovun 2018-2023-cü illər ərzində gördüyü işlər müsbət qiymətləndirilir və  qənaətbəxşdir.

Prof. Oktay Qasımov Yeni Həmkarlar Təşkilatının Komitə üzvlərinin bu il əvvəlki illərdən fərqli olaraq gənc kadrlardan təşkil olunacağını söyləyib.

Sonda səsvermə yolu ilə dosent Rasim Aslanov təşkilata yenidən sədr seçilib. İclasda Həmkarlar Komitəsinin yeni İdarə Heyətinin tərkibi də formalaşdırılıb.

6 nəfər (dos. Rasim Aslanov - sədr, müh. Aytac Məmmədova, k.e.i. Sevil Məhərrəmova, k.e.i. Günay Əliyeva, k.e.i. Banu Ağamalıyeva, k.e.i. Aysel Əliyeva) komitə üzvləri seçilib. 3 nəfər (mühasib Lamiyə Əmirova – sədr, b.mütəxəssis Südabə Səlimova, kadr üzrə mütəxəssis Könül Aslanova – üzvlər) təftiş komissiyasına, 2 nəfər isə (dos. Rasim Aslanov - sədr, k.e.i. Günay Əliyeva - üzv) konfrans nümayəndələri olaraq təyin edilib. Onların siyahısı oxunub və səsvermə ilə yekdilliklə qəbul olunub.

11 Mart 2024

Paylaş