Biofizika İnstitutunda İnsan Hüquqları Gününə həsr olunmuş tədbir keçirilib

Biofizika İnstitutunda Həmkarlar İttifaqı Komitəsinin təşkilatçılığı ilə 18 iyun - Azərbaycan Respublikasında İnsan Hüquqları Gününə həsr olunmuş tədbir keçirilib.

          Tədbiri giriş sözü ilə açan Biofizika İnstitutunun Həmkarlar İttifaqı Komitəsinin sədri dosent Rasim Aslanov bildirib ki, Ümummilli lider Heydər Əliyev tərəfindən 1998-ci ilin 18 iyun tarixində təsdiq edilən ilk strateji sənəd olan “İnsan hüquqlarının müdafiəsinə dair Dövlət Proqramı”nın qəbul olunması, insan hüquqlarının müdafiəsi sahəsində böyük əhəmiyyət kəsb edir. Prezident İlham Əliyevin 18 iyun 2007-ci il tarixli Sərəncamı ilə bu Dövlət Proqramının qəbul edildiyi gün, yəni 18 iyun, Azərbaycanda İnsan Hüquqları Günü olaraq qeyd olunmağa başlanmışdır. Azərbaycan Respublikasının İnsan Hüquqları üzrə Müvəkkili ənənəyə uyğun olaraq cari ildə də 18 may – 18 iyun tarixlərini “İnsan Hüquqları Aylığı” elan etmişdir. Qarşıdan gələn 18 iyun – Azərbaycan Respublikasında İnsan Hüquqları Günü münasibətilə bu tədbiri təşkil etdik.

          Sonra, R.Aslanov Elm haqqında Azərbaycan Respublikasının Qanununda "müəlliflik hüququnun pozulması – elmi plagiat" ilə əlaqədar maddələri qeyd edərək, xüsusilə bu maddələrin bəzi bəndlərini təhlil edib. Qeyd edib ki, Azərbaycan Respublikasında əqli mülkiyyət hüququnun qorunması “Patent haqqında”, “Müəlliflik hüququ və əlaqəli hüquqlar haqqında”, “Əqli mülkiyyət hüquqlarının təminatı və piratçılığa qarşı mübarizə haqqında” Azərbaycan Respublikasının qanunları və bu Qanunla tənzimlənir. Nəticənin tədqiqat prosesinə uyğun olmaması, alınan nəticənin əsassız olaraq dəyişdirilməsi və ya təhrif edilməsi, başqasına məxsus mətnin və ya elmi məhsulun icazəsiz və ya yazılı istinadsız istifadəsi, eyni mətnin digər adla təkrar nəşri, müəlliflərin dəyişdirilməsi və ya şərikli müəlliflik hüququnun pozulması, müəlliflik hüququnun pozulması – elmi plagiat, elmi əsərin icazəsiz istifadəsi (qeyri-kommersiya məqsədləri istisna olmaqla) elmi etika və elmi nəticələrlə bağlı hüquqların pozulması hallarına aiddir. Elmi etikaya riayət edilməli, əqli mülkiyyət hüquqlarını pozma cinayət, inzibati və mülki məsuliyyətə səbəb olduğunu R.Aslanov vurğulayıb.

          Daha sonra, dos. Rasim Aslanov elmi işçilərin hüquqları, vəzifələri və sosial müdafiəsindən bəhs edib. Onların vəzifələrinin, elmi etikaya riayət etmək, plagiata yol verməmək, yaradıcı, ləyaqətli, məsuliyyətli, müstəqil və təşəbbüskar olmağını vurğulayıb. Elmi dərəcələr və elmi adların, ömürlük verildiyini, elmi etikanın və müdafiə prosedurunun pozulması və elmi plagiat aşkar edildiyi hallarda məhrumetmə həyata keçirildiyini qeyd edib.

      Sonda tədbir iştirakçıları həm bu mövzu üzrə, həm də ümumiyyətlə Azərbaycan Respublikasının İnsan hüquqları üzrə müvəkkili (ombudsman) haqqında Azərbaycan Respublikasının Konstitusiya Qanununda olan maddələr üzrə çıxış edib öz fikirlərini bildiriblər.

13 İyun 2024

Paylaş