Biofizika İnstitutunun 2022-ci ildəki elmi və elmi-təşkilati fəaliyyəti FRTEB-in elmi nailiyyətlər sərgisində nümayiş olunub

Yanvarın 18-də AMEA-nın Rəyasət Heyətinin Fizika-Riyaziyyat və Texnika Elmləri Bölməsinin (FRTEB) 2022-ci il üçün illik hesabatının müzakirəsinə həsr olunmuş səyyar iclası keçirilib.

İnformasiya Texnologiyaları İnstitutunda keçirilən tədbirdə öncə FRTEB üzrə elmi müəssisələrin nailiyyətlərinə həsr olunmuş sərgiyə baxış keçirilib. Sərgidə Biofizika İnstitutunun da 2022-ci ildəki elmi nailiyyətləri nümayiş olunub.

Belə ki, 2022-ci ildə Biofizika İnstitutunda elmi-tədqiqat işləri “Bioloji sistemlərin fiziki-kimyəvi əsasları” istiqamətində 1 problem, 2 mövzu, 5 iş üzrə aparılıb. İnstitutda yerinə yetirilmiş elmi-tədqiqat işləri üzrə 6 mühüm elmi nəticə əldə olunub.

İnstitutda çalışan 61 işçidən 24-ü elmi işçi, 4-ü elmlər doktoru, o cümlədən 2-si AMEA-nın müxbir üzvü və 6-sı fəlsəfə doktorudur. İnstitutun elmlər doktoru hazırlığı üzrə 3 doktorantı, fəlsəfə doktoru hazırlığı üzrə 4 dissertantı və 9 magistrantı var.

Hesabat ilində institut alimlərinin 8-i xaricdə olmaqla, 13 məqaləsi, 10-u xaricdə olmaqla, 19 tezisi, 2 elmi populyar nəşri dərc olunub. Məqalələrin 5-i yüksək impakt farktorlu “Web of Science” və “Scopus” bazalarında indeksləşən beynəlxalq jurnallarda dərc edilib. Çapdan çıxan elmi əsərlərə il ərzində 281 istinad verilib.

2022-ci ildə Türkiyə Elmi və Texnoloji Tədqiqat Şurası (TÜBİTAK), Milli Onkologiya Mərkəzi və Bakı Dövlət Universitetindən olan alimlərlə aparılan birgə tədqiqatlar nəticəsində Molekulyar dokinq metodunu tətbiq etməklə EQRPR pentapetidinin anti-xərçəng təsirinin mexanizmi verilib. Göstərilib ki, bu peptid eyni zamanda xərçəngin inkişafını təmin edən iki müxtəlif zülalı bloklaya bilər. Tədqiqat zamanı, həmçinin EQRPR peptidinin yüksək farmakoloji xüsusiyyətləri qiymətləndirilib. Layihə üzrə alınan mühüm nəticələr 5.235 impakt faktoruna malik Q1 kvartil kateqoriyalı “Biomolecular Structure and Dynamics” jurnalında dərc edilib.

Bundan başqa, Fransanın Monpelye Universitetinin mütəxəssisləri ilə də müştərək tədqiqatlar aparılıb. Əldə olunan nəticələr göstərib ki, kanonik zülallarla müqayisədə, izoformalarda siqnal peptidlərinə, transmembran nahiyyələrinə və tandem təkrarlara daha az rast gəlinir ki, bu da onların funksiyasını və ya hüceyrə lokalizasiyasını dəyişdirə bilir. Həmçinin araşdırmalar nəticəsində müəyyən olub ki, izoformalarla müqayisədə, kanonik zülallar daha tez deqradasiyaya  meyllidirlər. Birgə tədqiqatların nəticələri impakt faktoru 6.064 olan Q2 kateqoriyalı “Biomolecules” jurnalında çap olunub.

Hesabat ilində Biofizika İnstitutunun təşkilatçılığı ilə 3 beynəlxalq elmi seminar keçirilib. Türkiyə, Fransa və İtaliyadan dəvət olunan mütəxəssislərin məruzələri dinlənilib. İnstitutda 2 beynəlxalq-müştərək və 1 yerli qrant layihəsi üzrə elmi tədqiqat işləri davam etdirilib, 1 yerli layihə isə başa çatıb. Bundan əlavə, müəssisədə ixtisaslı kadrların hazırlanması, məktəblilər arasında elmin təbliği və istedadlı gənclərin elmə cəlb olunması istiqamətində müvafiq işlər aparılıb.

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

20 Yanvar 2023

Paylaş