Biofizika İnstitutunda 20 Yanvar faciəsinin 33-cü ildönümü ilə əlaqədar tədbir keçirilib

Biofizika İnstitutunda müəssisənin Yeni Azərbaycan Partiyası (YAP) özək təşkilatının və Gənc Alim və Mütəxəssislər Şurasının (GAMŞ) birgə təşkilatçılığı ilə 20 Yanvar faciəsinin 33-cü ildönümünə həsr olunmuş anım tədbiri keçirilib.

Tədbirdə ölkəmizin azadlığı, müstəqilliyi və ərazi bütövlüyü uğrunda həlak olan şəhidlərin xatirəsi bir dəqiqəlik sükutla yad edilib.

Giriş sözü ilə çıxış edən institutun baş direktoru, AMEA-nın müxbir üzvü Oktay Qasımov 20 Yanvar faciəsinin mahiyyətindən söz açaraq qan yaddaşımız ilə bağlı  həqiqətlərin indiki və gələcək nəsillərə çatdırılmasının önəmini vurğulayıb.

Sonra institutun GAMŞ üzvü, Biomolekulların strukturu, dinamikası və funksiyası laboratoriyasının elmi işçisi Aidə Məmmədzadə 20 Yanvar faciəsinə həsr olunmuş təqdimatla çıxış edərək 1990-cı il yanvar ayının 20-də Bakıda törədilmiş qanlı hadisələr haqqında ətraflı məlumat verib. Bildirib ki, Qanlı Yanvar hadisələri həm də millətin azadlıq səsini ucaltdığı, öz suverenliyi uğrunda cəsarət nümayiş etdirdiyi şərəfli bir tarixdir.

Allah bütün şəhidlərimizə rəhmət eləsin!

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

19 Yanvar 2023

Paylaş