Biofizika İnstitutunda Elm gününə həsr olunmuş seminar keçirilib

AR Elm və Təhsil Nazirliyinin Biofizika İnstitutunda Elm gününə həsr olunmuş elmi seminar keçirilib.

Öncə 31 Mart soyqırımı qurbanlarının, vətənimizin müstəqilliyi və ərazi bütövlüyü uğrunda həlak olmuş şəhidlərin əziz xatirəsi bir dəqiqəlik sükutla yad edilib.

Sonra institutun İnteqrativ biologiya laboratoriyasının müdüri, AMEA-nın müxbir üzvü İlham Şahmuradov “Elmi tədqiqatlarınızın fundamental və ya praktiki əhəmiyyəti nədir? Çox vaxt başqalarına ünvanladığımız bu “sadə” suala özümüz necə cavab verərdik?” mövzusunda məruzəsini təqdim edib. Açıq dialoq və maraqlı diskussiya formatında keçən seminarda məruzəçi mövzu ilə bağlı çoxsaylı misallar göstərərək elmi tədqiqatın növləri, xüsusiyyətləri, elmi-praktiki əhəmiyyəti və tərkib hissələri barədə ətraflı məlumat verib.

Seminarın sonunda institutun baş direktoru, AMEA-nın müxbir üzvü Oktay Qasımov bu kimi tədbirlərin davamlı təşkil olunmasının vacibliyini vurğulayaraq İlham Şahmuradova elmi məruzəyə görə öz təşəkkürünü bildirib.

31 Mart 2023

Paylaş