Biofizika İnstitutunda növbəti maarifləndirici seminar keçirilib

AR Elm və Təhsil Nazirliyinin Biofizika İnstitutunda “Ölkədaxili və beynəlxalq jurnallarda məqalə və konfrans materiallarının tərtibatı” mövzusunda maarifləndirici seminar keçirilib.

Seminarda institutun Təhsil və beynəlxalq əlaqələr şöbəsinin müdiri, astronomiya üzrə fəlsəfə doktoru, dosent Həmayil Adıgözəlzadə mövzu üzrə təqdimatla çıxış edərək Azərbaycan Respublikasının Prezidenti yanında Ali Attestasiya Komissiyası (AAK) siyahısına daxil olan yerli jurnallara, həmçinin “Scopus” və “Web of Science” bazalarında indeksləşən jurnallara, yerli eləcə də beynəlxalq konfranslara məqalə və tezislərin hazırlanması qaydalarını ətraflı şərh edib. Məruzəçi “Biofizika” ixtisası üzrə AAK-nın tövsiyə etdiyi jurnallar haqqında dolğun məlumat verərək, bu sahə üzrə “Scopus” və “Web of Science” verilənlər bazasına daxil olan bir sıra jurnalların siyahısını tədbir iştirakçılarının diqqətinə çatdırıb.

İnstitutun gənc alim və mütəxəssisləri, o cümlədən müəssisədə istehsalat təcrübəsi keçən Bakı Dövlət Universitetinin tələbələri tərəfindən maraqla qarşılanan məruzənin sonunda mövzu ətrafında geniş müzakirələr aparılıb, suallar cavablandırılıb.

13 Aprel 2023

Paylaş