AZE    RUS    ENG

03.03.2020 15:00

Gənc alim və mütəxəssislərin II beynəlxalq elmi konfransı işə başlayıb

Martın 3-də AMEA-nın Əsas binasında Gənc Alim və Mütəxəssislər Şurasının (GAMŞ) təşkilatçılığı ilə “Fundamental və tətbiqi elmlərin müasir problemlərinin həllində multidissiplinar yanaşmalar” mövzusunda II beynəlxalq elmi konfrans öz işinə başlayıb.

SOCAR-ın Elm Fondunun maliyyə dəstəyi ilə baş tutan tədbir AMEA-nın 75 illiyinə həsr olunub.

Beynəlxalq konfransda AMEA-nın birinci vitse-prezidenti, akademik İbrahim Quliyev, AMEA-nın vitse-prezidenti, akademik İradə Hüseynova, AMEA-nın akademik-katibi, AMEA-nın müxbir üzvü Əminağa Sadıqov, akademiyanın elmi müəssisə və təşkilatlarının direktorları, həmçinin 12 ölkədən 300-dən çox gənc alim iştirak edib.

Konfransı Ə.Sadıqov açaraq tədbir iştirakçılarını akademiyanın prezidenti, akademik Ramiz Mehdiyevin adından salamlayıb. O, son illərdə ölkəmizdə aparılan gənclər siyasətindən, onların inkişafı, cəmiyyətin bütün sahələrində fəal iştirakı istiqamətində qəbul edilən qərarlardan danışıb. Qeyd edib ki, ölkə başçısının müvafiq Sərəncamı ilə təsdiq edilən “2015-2025-ci illərdə Azərbaycan gənclərinin İnkişaf Strategiyası”, həmçinin “Azərbaycan gəncliyi 2017-2021-ci illərdə” Dövlət Proqramı mühüm əhəmiyyət daşıyır və bu gün keçirilən konfrans respublikada gənclər siyasətinə dair aparılan tədbirlərin tərkib hissəsindən biridir. 2011-ci ildə AMEA ilə SOCAR arasında memorandumun imzalandığını xatırladan Ə.Sadıqov sözügedən sənəddən irəli gələrək Elm Fondunun yaradıldığını, ötən müddər ərzində təşkilat tərəfindən 5 müsabiqənin həyata keçirildiyini və 160-a yaxın layihənin maliyyələşdirildiyini diqqətə çatdırıb.

Konfransın mövzusuna da toxunan Ə.Sadıqov müasir dövrdə multidissiplinar yanaşmaların ciddi elmi nəticələr əldə edilməsində mühüm rol oynadığını deyib, məhz buna görə də bir neçə sahəni birləşdirən alimlər qrupu tərəfindən tədqiqatlar aparmağın zəruriliyini vurğulayıb. O, tədbirin gənc alimlərin öz elmi nəticələrini ictimaiyyətə təqdim etmələrinə, həmçinin gələcək fəaliyyətləri üçün önəm kəsb edən beynəlxalq əlaqələr qurmalarına töhfə verəcəyini söyləyib.

Sonra SOCAR-ın Elm və texnika şöbəsinin müdiri, professor Nazim Vəliyev çıxış edərək təmsil etdiyi qurum barədə tədbir iştirakçılarına məlumat verib. Bildirib ki, SOCAR respublikanın bütün ərazisində, o cümlədən quru və dəniz ərazilərində neft və qaz yataqlarının axtarışı, kəşfiyyatı və işlənməsi, neftin, qazın, qaz kondensatının hazırlanması, emalı və nəqli, həmçinin onlardan alınan məhsulların daxili və xarici bazarlarda satışı ilə məşğul olur. O, həmçinin şirkət tərəfindən böyük həcmdə elmi-tədqiqat və layihə işlərinin yerinə yetirildiyini, kadr hazırlığına xüsusi önəm verildiyini, beynəlxalq standartlara uyğun ən müasir tədris proqramları və tədris texnologiyaları ilə təchiz olunmuş Bakı Ali Neft Məktəbinin fəaliyyət göstərdiyini diqqətə çatdırıb.

2014-cü ildə bu mövzuda keçirilmiş ilk tədbirin Neftçilər Gününə həsr olunduğunu xatırladan N.Vəliyev gənclərin elmə cəlb edilməsi və onların stimullaşdırılması istiqamətində birgə fəaliyyətin bundan sonra da davam etdiriləciyini deyib, konfransın işinə uğurlar arzulayıb.

Daha sonra çıxış edən AMEA GAMŞ-ın sədri, fizika-riyaziyyat üzrə fəlsəfə doktoru Famin Salmanov Azərbaycanda elmin koordinasiyası, inkişafı və gələcək perspektivlərinin müəyyənləşdirilməsi baxımından AMEA-nın müqayisəedilməz rola malik olduğunu söyləyib. Qeyd edib ki, 75 il öncə əsası qoyulan akademiya Azərbaycan elminin dünya elminə inteqrasiyası ilə əlaqədar bir sıra ümdə hədəflər müəyyənləşdirib və onların gerçəkləşməsi istiqamətində böyük irəliləyişlər əldə edib. Bu gün AMEA-nın gənc alimlərinin beynəlxalq həmkarları ilə birgə tədqiqatlar apardığını deyən F.Salmanov qlobal miqyaslı tədbirlərin təşkilinin yeni yanaşma və metodologiyaların mənimsənilməsi baxımından əhəmiyyət kəsb etdiyini diqqətə çatdırıb.

Şura sədri II beynəlxalq elmi konfransın çoxşaxəli tədqiqatların fundamental və tətbiqi aspektlərini əhatə edən mühüm elmi yığıncaq olduğunu vurğulayıb, tədbirin təşkilinə görə AMEA rəhbərliyinə və SOCAR-ın Elm Fonduna öz minnətdarlığını bildirib.

Qeyd edək ki, martın 6-dək davam edəcək konfrans çərçivəsində “İntellektual sistemlər və texnologiyalar, “Molekulyar biotexnologiya və gen mühəndisliyi”, “Yer elmlərinin nəzəri və tətbiqi problemləri”, “Nanotexnologiya və materialşünaslıq”, “Tətbiqi kimyanın müasir problemləri”, “Xəzər dənizinin çoxşaxəli elmi və nəzəri problemləri”, “Bugünkü sosial və humanitar problemlər” və “Elmdə ilk addımlar (istedadlı şagirdlər üçün xüsusi bölmə)” istiqamətləri üzrə çıxış və təqdimatlar təşkil olunacaq.

Mənbə: www.science.az

14.03.2019 12:49

“Mənim ilk təqaüdüm” adlı maarifləndirici seminar keçirildi

14 mart 2019-cu il tarixində AMEA-nın Biofizika İnstitutunda gənc mütəxəssislər üçün maarifləndirici seminar keçirildi.

İnstitutun və Mərkəzi Nəbatat Bağının Gənc Alim və Mütəxəssislər Şurasının birgə təşkilatçılığı ilə baş tutan seminarda AMEA Mərkəzi Nəbatat Bağının GAMŞ-nın sədri, doktorant Fərid Seyfullayevın “Mənim ilk təqaüdüm” mövzusunda məruzəsi dinlənildi.

Qarşılıqlı fikir mübadiləsi əsasında keçən seminarda F.Seyfullayev gənc mütəxəssislərə mövzu üzrə öz təcrübəsindən danışdı, gənclərin maraq göstərdiyi və daim araşdırmalar apardığı təqaüd proqramlarında tələb olunan sənədlərin tərtibi və onların tələbləri, qeydiyyat üsulları, xaricdə necə ödənişsiz təhsil almaq olar kimi məsələlər haqqında ətraflı məlumat verdi.

Seminarda institutda təcrübə keçən Baki Dövlət Universitetinin SABAH qrupunun tələbələri, gənc alimlər, magistrantlar və doktorantlar iştirak edirdilər.

 

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

07.02.2019 16:39

Biofizika İnstitutunun gənc alimləri AMEA-nın Yüksək Texnologiyalar Parkında olublar

7 fevral 2019-cu il tarixində akademiyanın elmi müəssisə və təşkilatlarının gənc alimləri, həmçinin AMEA Biofizika İnstitutunun əməkdaşları b.ü.f.d. Ruhiyyə Quliyeva, Sevil Məhərrəmova və Zərifə Osmanlı AMEA-nın Yüksək Texnologiyalar Parkını (YT Park) ziyarət ediblər.

Gənc alimlər YT Parkın yeni yaradılan Strateji Elmi Analitik Sınaq Mərkəzinə (SEASM) baş çəkib, müasir standartlara cavab verən laboratoriyalara baxış keçiriblər. Daha sonra Yüksək Texnologiyalar Parkının rəhbərliyi  gənclərlə görüş keçirib və onları mütəmadi əməkdaşlığa dəvət edib.

 

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.

20.11.2018 16:05

Gənc alimlər və mütəxəssislər şurasının sədri məruzə ilə çıxış etdi

2018-ci il noyabrın 20-də Azərbaycan Milli Elmlər Akademiyasının Biofizika İnstitutunda növbəti seminar keçirildi.

Seminarı giriş sözü ilə institutun direktoru, AMEA-nın müxbir üzvü, fizika- riyaziyyat elmləri doktoru, professor Oktay Qasımov açdı.

Seminarda Biofizika İnstitutunun əməkdaşı, Gənc alimlər və mütəxəssislər şurasının sədri, “Ekoloji biofizika” laboratoriyasının böyük elmi işçisi, biologiya üzrə fəlsəfə doktoru Ruhiyyə Tahirağa qızı Quliyevanın “Azərbaycanda yayılmış irsi hematoloji xəstəliklər və onların inkişafında təbii antioksidantların iştirakı” mövzusunda məruzəsi dinlənildi.

Hüceyrələri və bütövlükdə orqanizmi müdafiə edən antioksidant faktorların içərisində selenin xüsusi rola malik olduğunu söyləyən R. Quliyeva bu baxımdan onun təsir mexanizminin öyrənilməsinin nəyinki Azərbaycanda, həm də bütün Dünyada aktual olduğunu bildirdi.

Baş tutan tədbirdə Biofizika İnstitutunun əməkdaşları, professorları, doktorant və dissertantları iştirak etdilər.

Seminar sual-cavab sessiyası ilə yekunlaşdı.

 

© Bütün hüquqlar qorunur. Xəbərlərdən istifadə edərkən www.biophysics.az saytına istinad zəruridir.