"Strateji kommunikasiya" mövzusunda təlim keçirilib
Elm və Təhsil Nazirliyi (ETN) və Elm və Ali Təhsil üzrə Dövlət Agentliyinin (EATDA) təşkilatçılığı ilə elm və ali təhsil üzrə ictimaiyyətlə əlaqələr və kommunikasiya işinin təşkilinə dair "Strateji kommunikasiya" mövzusunda təlim keçirilib.
Təlimin açılış nitqi ilə çıxış edən ETN-nin aparat rəhbəri Mətin Kərimli elm, ali və orta ixtisas təhsil müəssisələrində çalışan əməkdaşlar üçün bu cür təlimlərin əhəmiyyəti, daxili kommunikasiyanın qurulması və böhran kommunikasiyasının düzgün təşkilinin önəmini vurğulayıb.
EATDA-nın direktoru Ülkər Səttarova elm və təhsil müəssisələrinin media ilə iş və ictimaiyyətlə əlaqələr sahəsində prioritet istiqamətləri barədə danışıb və iştirakçıların suallarını cavablandırıb.
Təlimdə ictimaiyyətlə əlaqələr üzrə ekspertlər Vəli Əlibəyov və Emin Hüseynzadə iştirakçılara daxili kommunikasiyanın təşkili, effektiv mesaj hazırlamaq, əks əlaqənin təşkili, eləcə də hədəf kütləsi üçün təsirli hekayənin hazırlanması mövzusunda məlumat veriblər.
Növbəti sessiyalarda media və kommunikasiya üzrə ekspert Vüqar Zifəroğlu KİV ilə münasibətlər, media üçün kontentin hazırlanması, media vasitəsilə xidməti məlumatların çatdırılması formaları mövzusunda, vizual kommunikasiyalar üzrə ekspert Fərid Rzazadə isə vizual elementlərin hekayəyə daxil edilməsi barədə təlim keçiblər. Rəqəmsal media üzrə ekspert Şəfəq Mehrəliyeva isə kommunikasiya planının hazırlanması mövzularında çıxış edib.
Təlimdə həmçinin Biofizika İnstitutunun Elmi-texniki informasiya və ictimaiyyətlə əlaqələr şöbəsinin müdiri Toğrul Eminov iştirak edib. O, təlimin elm və ali təhsil sahəsində kommunikasiya işinin təşkilində mühüm rol oynayacağını və əldə edilən biliklərin bu sahədə fəaliyyətin daha da təkmilləşdirilməsinə töhfə verəcəyini vurğulayıb.
Təlim iştirakçıları mövzu üzrə yeni yanaşmalar öyrənmək və təcrübə mübadiləsi aparmaq fürsəti əldə ediblər.
