Kaliforniya Universitetinin əməkdaşı Biofizika İnstitutunun seminarında məruzə ilə çıxış edib

AR Elm və Təhsil Nazirliyinin Biofizika İnstitutunda elmi seminar keçirilib. Los Anceles şəhərindəki Kaliforniya Universitetinin (UCLA) əməkdaşı, Ph.D Novruz Əhmədov “ZBED4 çatışmamazlığı hüceyrə morfologiyasını, PNR itirilməsi isə sayını dəyişir. Həqiqət yoxsa uydurma?” mövzusunda məruzəsi ilə çıxış edib. Açıq dialoq və maraqlı diskussiya formatında keçən seminarda məruzəçi mövzu ilə bağlı çoxsaylı misallar göstərərək elmi tədqiqatın növləri, xüsusiyyətləri, elmi-praktiki əhəmiyyəti və tərkib hissələri barədə ətraflı məlumat verib.

Məruzəçi qeyd edib ki, ZBED4, Zn-barmaq zülalların BED subsinfinin üzvüdür. Onun ardıcıllığında dörd DNT birləşmə domeni və dimerləşmə sahəsi vardır.

İnsanın torluqişasında ZBED4 kolbacıqların nüvə, daxili seqment və ayaqcıqlarında (pedicles), habelə, Müller hüceyrə ayaqaltında (endfeet) məskunlaşır.

Yetkin siçan torluqişasında ZBED4 yalnız Müller hüceyrələrinin ayaqaltı və çıxıntılarında (processes) aşkar edilmişdir.

ZBED4 hər iki DNT VƏ RNT mənşəli və ən azı ardıcıl 5G olan oligonükleotidlərlə birləşir.

Hüceyrədə dimerlər yaradır.

Lusiferaza təhlil sisteminin tətbiqi göstərir ki, ZBED4 transkripsiyanı aktivləşdirmə keyfiyyətinə malikdir.

Məruzə dinlənildikdən sonra AMEA-nın müxbir üzvü, biologiya elmləri doktoru, professor İlham Şahmuradov, biologiya elmləri doktoru, professor Tokay Hüseynov, biologiya elmləri namizədi Taleh Yusifov, Milli Onkologiya Mərkəzinin laboratoriya müdiri, biologiya üzrə fəlsəfə doktoru Leylaxanım Məlikova və digərləri çıxış edərək mövzu ilə bağlı sual və fikirlərini bildiriblər.

Seminarın sonunda institutun baş direktoru, AMEA-nın müxbir üzvü Oktay Qasımov maraqlı və məzmunlu məruzəyə görə Ph.D Novruz Əhmədova iştirakçılar və institut rəhbərliyi adından təşəkkür edib.