Biofizika İnstitutunda “TiO₂-fibroin kompozitlərində molekulyar və struktur dəyişikliklərin FTIR analizi” mövzusunda elmi seminar keçiriləcək
25 iyun 2025-ci il tarixində saat 11:30-da Azərbaycan Respublikası Elm və Təhsil Nazirliyi Biofizika İnstitutunda “TiO₂-fibroin kompozitlərində molekulyar və struktur dəyişikliklərin FTIR analizi” mövzusunda elmi seminar keçiriləcək.
Seminarda “Biomolekulların strukturu, dinamikası və funksiyası” laboratoriyasının elmi işçisi Əfsanə Hüseynova çıxış edəcək.
Xahiş edirəm seminarda iştirak edəsiniz.
Qısa məlumat:
Nanostrukturlaşdırılmış titan dioksidin (TiO₂) fibroin əsaslı biomateriallara inteqrasiyası onların struktur və funksional xüsusiyyətlərinin yaxşılaşdırılması üçün perspektivli bir strategiya təqdim edir. Bu tədqiqatda Bombyx mori ipəkqurdunun baramalarından ekstraksiya edilmiş fibroin, 5 nm ölçülü və 480–650 m²/g spesifik səth sahəsinə malik nano-anatas TiO₂ ilə müxtəlif konsentrasiyalarda (0.1%–10%) birləşdirilərək TiO₂-fibroin kompozitləri hazırlanmışdır. Molekulyar qarşılıqlı təsirləri və struktur dəyişiklikləri təhlil etmək üçün Fourier Transform Infrared (FTIR) Spektroskopiyası tətbiq edilmişdir. FTIR spektrlərində Amid I (1650 sm⁻¹ → 1620 sm⁻¹) və Amid II (1515 sm⁻¹) zolaqlarında əhəmiyyətli yerdəyişmələr müşahidə edilmiş, bu da xüsusilə aşağı TiO₂ konsentrasiyalarında güclü TiO₂-fibroin qarşılıqlı təsirinə işarə etmişdir. N–H gərilmə vibrasiyasının (3280 sm⁻¹ → 3240 sm⁻¹) yerdəyişməsi hidrogen rabitələri və β-struktur sabitliyində dəyişiklikləri göstərmiş, 820 sm⁻¹-də müşahidə olunan Ti–O–Ti vibrasiyaları isə TiO₂-nin fibroin matrisinə uğurlu daxil edilməsini təsdiq etmişdir. Artırılmış hidrofillik və struktur dəyişikliklər TiO₂-fibroin kompozitlərinin biotibbi materiallar, yara sağalması və dərman daşıma sahələrində tətbiq potensialını göstərir. Bu nəticələr, TiO₂-fibroin kompozitlərinin tənzimlənə bilən xüsusiyyətlərə malik olduğunu nümayiş etdirir.
