Biofizika İnstitutunda “TiO₂–fibroin kompozitlərində molekulyar və struktur dəyişikliklərinin FTIR analizi” mövzusunda elmi seminar keçirilib
25 iyun 2025-ci il tarixində Azərbaycan Respublikası Elm və Təhsil Nazirliyinin Biofizika İnstitutunda “TiO₂–fibroin kompozitlərində molekulyar və struktur dəyişikliklərinin FTIR analizi” mövzusuna həsr olunmuş elmi seminar keçirilib.
Seminarı giriş sözü ilə açan Biofizika İnstitutunun baş direktoru, AMEA-nın müxbir üzvü Oktay Qasımov tədbir iştirakçılarını salamlayaraq seminarın aktual elmi problemlərin həllinə və biomaterialların inkişafına verdiyi töhfəni xüsusi vurğulayıb. O, çıxışında həmçinin “Biomolekulların strukturu, dinamikası və funksiyası” laboratoriyasının mühəndisi Aytac Məmmədovanı, elmi məqaləsinin istinad sayına görə dünyanın aparıcı elmi bazalarının reytinqinə əsasən ilk 10-luğa daxil olması münasibətilə təbrik edib. Qeyd olunub ki, bu uğur institutun beynəlxalq elmi nüfuzunun və yüksək tədqiqat potensialının bariz göstəricisidir.
Sonra Seminarda “Biomolekulların strukturu, dinamikası və funksiyası” laboratoriyasının elmi işçisi Əfsanə Hüseynova mövzu üzrə ətraflı elmi təqdimatla çıxış edib. O, müasir biomaterial tədqiqatlarında təbii polimerlərin nanomateriallarla modifikasiyasının əhəmiyyətindən bəhs edib. Məruzədə fibroin zülalının yüksək biouyğunluq və biodeqradasiya potensialına malik olması, lakin strukturunun funksional təkmilləşdirilməsinin zəruriliyi qeyd olunub.
Əfsanə Hüseynova tərəfindən təqdim olunan tədqiqatda nano-anatas TiO₂ hissəciklərinin müxtəlif konsentrasiyalarda fibroin matrisinə daxil edilməsi və bu dəyişikliklərin FTIR spektroskopiyası ilə təhlili həyata keçirilib. Tədqiqatın məqsədi TiO₂ əlavəsinin zülalın ikincil strukturuna, molekulyar qarşılıqlı təsirlərinə və funksional xüsusiyyətlərinə təsirini müəyyən etmək olub.
Tədqiqat zamanı FTIR spektroskopiyası, Amid I zolağının dekonvolusiyası və digər analiz metodlarından istifadə olunub. Spektral dəyişikliklər TiO₂-nin fibroinlə qarşılıqlı təsirə girərək hidrogen rabitələrinin, β-təbəqə strukturunun və hidrofilikliyinin dəyişməsinə səbəb olduğunu göstərib. Aşağı konsentrasiyalarda struktur amorflaşaraq funksionallıq artdığı halda, yüksək konsentrasiyalarda hissəcik aqreqasiyası müşahidə edilib.
Seminarda qeyd olunub ki, əldə olunmuş nəticələr TiO₂–fibroin kompozitlərinin toxuma mühəndisliyi, yara örtükləri və dərman daşıyıcı sistemlər kimi biotibbi sahələrdə tətbiqinə geniş imkanlar yaradır.
Sonda vurğulanıb ki, Əfsanə Hüseynova tədqiqat prosesində yüksək məhsuldarlıqla çalışaraq, zaman və dəqiqlik tələb edən mürəkkəb analizləri uğurla yerinə yetirib. Təqdimatdan sonra seminar iştirakçıları mövzu ilə bağlı suallar səsləndiriblər, müzakirələr aparılıb və verilən suallar Əfsanə Hüseynova tərəfindən ətraflı şəkildə cavablandırılıb.
