Şagirdlərin “BioNanoÖrtük” elmi layihəsi “Sabahın alimləri” müsabiqəsində bürünc medal qazanıb
Azərbaycan Respublikası Elm və Təhsil Nazirliyinin tabeliyində fəaliyyət göstərən Ağdam rayon Qaradağlı kənd A. Abbasov adına tam orta ümumitəhsil məktəbinin bir qrup şagirdi Azərbaycan Respublikası Elm və Təhsil Nazirliyinin Molekulyar Biologiya İnstitutunun elmi işçisi Aysel Əliyeva ilə birlikdə “Azərbaycan zəfəranının nano-strukturundan ilhamlanan antibakterial və özünütəmizlənmə xüsusiyyətlərinin bioloji tədqiqi (BioNanoÖrtük)” adlı elmi layihə üzrə tədqiqat işləri aparıb.
Biomimikriya və nanotexnologiya prinsiplərinə əsaslanan layihə çərçivəsində Azərbaycan zəfəranının fitokimyəvi xüsusiyyətləri və nano-morfoloji strukturu araşdırılıb. Aparılan tədqiqatlar əsasında antibakterial və özünütəmizlənmə xüsusiyyətlərinə malik bio-nano örtük konsepsiyası öyrənilib və bu sahədə elmi nəticələr əldə edilib.
Layihə çərçivəsində zəfəran fitokimyəvilərinin bakterial fermentlərlə qarşılıqlı təsirinin nəzəri əsaslandırılması məqsədilə bioinformatik molekulyar docking analizi aparılıb. Bu analiz zəfəran tərkibli bioaktiv maddələrin bakterial hədəf fermentlərin aktiv mərkəzləri ilə bağlanma potensialını qiymətləndirmək üçün istifadə olunub. Molekulyar docking tədqiqatı Molekulyar Biologiya İnstitutunun (əvvəlki Biofizika İnstitutu) elmi işçisi Aysel Əliyeva tərəfindən həyata keçirilib.
Aparılan analizlər nəticəsində zəfəran fitokimyəvi maddələrinin bakterial fermentlərlə stabil qarşılıqlı təsir göstərə bildiyi və əldə olunan eksperimental antibakterial nəticələri nəzəri baxımdan dəstəklədiyi müəyyən olunub.
Qeyd edək ki, layihə “Sabahın alimləri” XV Respublika Layihə Müsabiqəsində təqdim olunub və innovativ yanaşma, multidissiplinar tədqiqat metodları, eləcə də əldə olunan nəticələrə görə bürünc medal ilə təltif olunub.
