BDU-nun tələbələrinin Biofizika İnstitutunun laboratoriyalarına tanışlıq səfəri
06–08 may 2025-ci il tarixlərində Bakı Dövlət Universitetinin Biologiya fakültəsinin Biotexnologiya ixtisası üzrə təhsil alan IV kurs tələbələri Azərbaycan Respublikası Elm və Təhsil Nazirliyinin Biofizika İnstitutuna tanışlıq səfəri edirlər.
Səfərin məqsədi tələbələrin fundamental və tətbiqi elmi-tədqiqat sahələri ilə yaxından tanış olmaları, institutun müasir elmi avadanlıqlarla təchiz olunmuş laboratoriyalarında aparılan tədqiqat prosesi, metodologiyalar və elmi istiqamətlər barədə əyani məlumat əldə etmələridir.
Səfər çərçivəsində tələbələr institutun müxtəlif laboratoriyalarında aparılan işlərlə yaxından tanış olacaq, elmi işçilərin fəaliyyəti, istifadə olunan avadanlıqlar və tədqiqat mövzuları barədə ətraflı məlumat alacaqlar. Onlara, həmçinin biofizika elminin aktual istiqamətləri və bu sahədəki interdisiplinar yanaşmalarla bağlı təqdimatlar təqdim ediləcək.
Bu cür səfərlərin tələbələrin nəzəri biliklərini praktik mühitdə müşahidə etməsinə və gələcək elmi fəaliyyətlərinə maraq formalaşdırmasına xidmət edəcəyi gözlənilir. Biofizika İnstitutu ali təhsil müəssisələri ilə əməkdaşlıq çərçivəsində tələbələrlə elmi-maarifləndirici əlaqələri davam etdirməyi qarşıya məqsəd qoyur.
