Biləsuvarlı məktəblilərin elmi uğuru: Biofizika İnstitutunda görüş və təşəkkür mərasimi
Azərbaycan Respublikası Elm və Təhsil Nazirliyinin Biofizika İnstitutunda “Sabahın Alimləri” Respublika Müsabiqəsində qızıl medal qazanan şagirdlərlə görüş keçirilib. Görüşdə Biofizika İnstitutunun baş direktoru, AMEA-nın müxbir üzvü, professor Oktay Qasımov, institutun bir sıra əməkdaşları, eləcə də Mübariz İbrahimov adına Biləsuvar Bağça-Məktəb-Lisey Təhsil Kompleksinin icraçı direktoru Aqşin Bağırov, qalib gələn X sinif şagirdləri – Leyla Əlizadə və Gülay Quluzadə iştirak ediblər.
Tədbiri açan professor Oktay Qasımov qonaqları salamlayaraq bildirib:
“Bu cür uğurlar Azərbaycan elminin gələcəyi baxımından olduqca sevindiricidir. Milli Qəhrəman Mübariz İbrahimov adına kompleksin adından çıxış edərək birincilik qazanmanız böyük məsuliyyət və eyni zamanda qürurverici haldır. Siz artıq bir addım ataraq özünüzü elmi mühitdə sınamısınız. Bu başlanğıcdır, davamı isə sizdən asılıdır. Əsas məsələ daim irəliləmək, elmə maraqlı olmaq və istiqamətinizi düzgün seçməkdir. Gənc yaşınızda belə nailiyyətlər əldə etməyiniz alqışa layiqdir. Harada olursunuzsa olun, azərbaycanlı olduğunuzu unutmayın. ‘Elmin vətəni yoxdur, alimin vətəni var’ fikri bu baxımdan çox dərin məna daşıyır.”
Tədbirdə çıxış edən “Fiziki-kimyəvi stress faktorlarının biofizikası” laboratoriyasının müdiri, b.ü.f.d., dosent Sevinc Cəfərova da şagirdləri təbrik edərək öz ürək sözlərini bölüşüb:
“Şagirdlərimizin beynəlxalq səviyyəli layihələrdə iştirak etməsi və orada uğur qazanması çox sevindiricidir. Bu layihələr vasitəsilə onlar tədqiqatın mahiyyətini dərk edir, elmi yanaşma və analiz bacarıqları qazanırlar. Bu uğurda pay sahibi olmaq mənim üçün də böyük qürurdur.”
Tədbirdə iştirak edən t.ü.f.d. Azad Ramiz oğlu Əbdürahimov isə vurğulayıb:
“Siz artıq ora – beynəlxalq müsabiqəyə getmək hüququ əldə etmisiniz. Bu, özü-özlüyündə böyük bir nailiyyətdir. Azərbaycan adının belə bir yarışmada səslənməsi artıq bir qələbədir. Mən sizinlə fəxr edirəm. İnanıram ki, bu ilk uğurunuzdur və gələcəkdə daha böyük zirvələri fəth edəcəksiniz. Valideynlərinizi və müəllimlərinizi də təbrik edirəm.”
Mübariz İbrahimov adına Biləsuvar Bağça-Məktəb-Lisey Təhsil Kompleksinin icraçı direktoru Aqşin Bağırov da çıxış edərək təşəkkürünü bildirib:
“Sizin həyat və elmi təcrübəniz o qədər zəngindir ki, şagirdlərimizin sizinlə görüşmək istəyi təbiidir. Mən ilk dəfə Biofizika İnstitutuna gələndə burada çox isti münasibət gördüm. Ən əsas məsələ isə budur ki, siz bizə dəstək göstərməyə razı oldunuz. Burada yaradılmış elmi mühit, kollektivin savadı və səmimiyyəti, praktiki işə yanaşması əsl nümunədir. Sevinc xanıma xüsusi təşəkkür edirəm – o, həm rəhbərlik etdiyi laboratoriyada, həm də bu layihənin ərsəyə gəlməsində çox böyük əmək sərf edib. Sizin tələbkarlığınız və diqqətiniz uşaqlarda elmi araşdırmalara marağı daha da artırdı. Bu, çox önəmlidir.”
Qeyd edək ki, “Sabahın Alimləri” Respublika Müsabiqəsində qızıl medal qazanan iki komanda ABŞ-da keçiriləcək “Regeneron ISEF” (International Science and Engineering Fair) beynəlxalq müsabiqəsinə vəsiqə qazanıb. Həmin komandaların tərkibində Mübariz İbrahimov adına Biləsuvar Bağça-Məktəb-Lisey Təhsil Kompleksinin X sinif şagirdləri Əlizadə Leyla və Quluzadə Gülay da yer alır. Onlar Biofizika İnstitutunun “Fiziki-kimyəvi stress faktorlarının biofizikası” laboratoriyasında b.ü.f.d., dos. Sevinc Cəfərovanın rəhbərliyi ilə “İnsulin rezistentliyi fonunda Metformin, Sulfonil sidik cövhəri və Galega Officinalisin eritrositlərdə baş verən oksidativ proseslərin inkişafına təsirinin tədqiqi” mövzusunda layihə hazırlamış və Tibb və sağlamlıq nominasiyası üzrə I yerə layiq görülərək qızıl medalla təltif olunmuşlar.
Sonda Mübariz İbrahimov adına Biləsuvar Bağça-Məktəb-Lisey Təhsil Kompleksinin icraçı direktoru Aqşin Bağırov Biofizika İnstitutunun baş direktoru, AMEA-nın müxbir üzvü, professor Oktay Qasımova və “Fiziki-kimyəvi stress faktorlarının biofizikası” laboratoriyasının müdiri, b.ü.f.d., dos. Sevinc Cəfərovaya dərin təşəkkürünü bildirərək onlara rəsmi təşəkkürnamə təqdim edib.
