“Rəqəmsal tibb 4.0: problemlər, imkanlar və perspektivlər” respublika elmi-praktiki konfransı keçirilib
Elm və Təhsil Nazirliyinin İnformasiya Texnologiyaları İnstitutunda Səhiyyə Nazirliyi, Milli Məclisin Səhiyyə Komitəsi, Milli Onkologiya Mərkəzi, Azərbaycan Tibb Universiteti, Azərbaycan Texniki Universiteti, Biofizika İnstitutu və digər qurumların təşkilatçılığı ilə “Rəqəmsal tibb 4.0: problemlər, imkanlar və perspektivlər” adlı II respublika elmi-praktiki konfrans baş tutub. Tədbirdə dövlət qurumlarının rəhbərləri, elmi müəssisə və ali təhsil ocaqlarının alim və mütəxəssisləri, KİV nümayəndələri iştirak ediblər.
Konfransın məqsədi rəqəmsal transformasiya şəraitində Azərbaycanda generasiya olunan tibbi məlumatların toplanması, emalı, süni intellekt texnologiyalarına əsaslanan informasiya sistemlərinin yaradılması və Sənaye 4.0 çağırışları fonunda səhiyyə infrastrukturunun inkişafı məsələlərinin müzakirəsidir.
Açılışda çıxış edən AMEA-nın vitse-prezidenti, ETN İnformasiya Texnologiyaları İnstitutunun baş direktoru, akademik Rasim Əliquliyev konfransın əhəmiyyətini vurğulayaraq, rəqəmsal səhiyyə ilə bağlı tədqiqatların aktuallığını və ölkədə həyata keçirilən layihələrin bu kontekstdə mühüm rol oynadığını qeyd edib.
Səhiyyə nazirinin müavini dosent Nadir Zeynalov rəqəmsal həllərin tibbdə geniş imkanlar açdığını, qərarların qəbuluna dəstək verdiyini və toplanan tibbi məlumatların böyük verilənlər (Big Data) kimi gələcək nəsillər üçün resursa çevriləcəyini bildirib.
AMEA-nın vitse-prezidenti, akademik İradə Hüseynova rəqəmsal texnologiyaların bioinformatika, genomika və molekulyar mühəndisliklə inteqrasiyasının vacibliyini qeyd edib, pasiyent məlumatlarının toplandığı sistemlərin yaradılmasının aktuallığını vurğulayıb.
Konfransda çıxış edən Səhiyyə Nazirliyinin müşaviri Rüfət Hacıəlibəyov, professorlar Nazim Qasımov, Nazim Pənahov, Nurəli Yusifbəyli və digər alimlər rəqəmsal tibbin inkişafı, təhsildə və elmdə tətbiqi, süni intellekt və kibertəhlükəsizlik məsələlərinə dair məruzələrlə çıxış ediblər.
Biofizika İnstitutunun baş direktoru, AMEA-nın müxbir üzvü Oktay Qasımov tədbirdə tibbi-bioloji istiqamətdə rəqəmsal texnologiyaların tətbiqi, multidissiplinar yanaşmanın əhəmiyyəti və yüksəkixtisaslı kadrların hazırlanması ilə bağlı fikirlərini bölüşüb.
Bağlanış mərasimində çıxış edən AMEA-nın vitse-prezidenti, ETN İnformasiya Texnologiyaları İnstitutunun direktoru, akademik Rasim Əliquliyev seksiya iclaslarında tibbi kiber-fiziki sistemlərin kiberdayanıqlılığı, tibbi şəbəkə infrastrukturunun arxitekturası, tibb elmlərinin bibliometrik analizi, tibbi diaqnostikada süni intellekt texnologiyalarının tətbiqi, rəqəmsal tibbi terminoloji sistemin formalaşması və s. kimi mövzuları əhatə edən çıxışlara münasibətini bildirib. Alim rəqəmsal tibbin aktual elmi problemlərinə həsr olunmuş məruzələri yüksək qiymətləndirərək konfransın rəqəmsal tibbin elmi-nəzəri və praktiki problemlərinin həllinə öz töhfəsini verəcəyinə əminliyini ifadə edib.
Akademik R.Alıquliyev gələcəkdə bu istiqamətdə fəaliyyət göstərən qurumlarla birgə əməkdaşlıq əlaqələrinin daha da gücləndirilməsi, yüksəkixtisaslı kadrların yetişdirilməsinə dəstək verilməsi, rəqəmsal tibb problemlərinin müzakirəsi məqsədilə müxtəlif səpkili görüşlərin keçirilməsinin böyük səmərə verəcəyinə inamını vurğulayıb.
Mənbə: ict.az
