Biofizika İnstitutunda korrupsiyaya qarşı mübarizəyə həsr olunmuş maarifləndirici tədbir keçirilib
Azərbaycan Respublikası Elm və Təhsil Nazirliyinin Biofizika İnstitutunda “Korrupsiyaya qarşı mübarizənin gücləndirilməsinə dair 2022–2026-cı illər üçün Milli Fəaliyyət Planı” çərçivəsində növbəti maarifləndirici tədbir keçirilib.
Tədbiri Biofizika İnstitutunun baş meneceri tibb üzrə fəlsəfə doktoru Azad Əbdürrəhimov açaraq, korrupsiyaya qarşı mübarizənin ölkəmiz üçün prioritet istiqamətlərdən biri olduğunu vurğulayıb. O, bildirib ki, bu cür maarifləndirici tədbirlərin keçirilməsi cəmiyyətdə antikorrupsiya mədəniyyətinin formalaşmasına və ictimai nəzarətin gücləndirilməsinə töhfə verir. Azad Əbdürrəhimov çıxışı zamanı qeyd edib ki, Biofizika İnstitutunda indiyədək korrupsiya xarakterli heç bir hal baş verməyib və institut fəaliyyəti tam şəffaf şəkildə təşkil olunub.
Daha sonra institutun kadrlar şöbəsinin müdiri Mehriban Əhmədova çıxış edərək korrupsiyanın mahiyyəti, növləri və cəmiyyətə təsiri barədə geniş məlumat verib. O, korrupsiyanın iri, məişət, siyasi və biznes formaları barədə danışaraq bu halların qarşısının alınmasında şəffaf idarəçiliyin və hüquqi mexanizmlərin əhəmiyyətini vurğulayıb.
Tədbirdə həmçinin korrupsiyaya qarşı mübarizədə informasiya texnologiyalarının rolu, elektron idarəetmə sistemlərinin tətbiqi və vətəndaş cəmiyyətinin bu proseslərə fəal cəlb edilməsinin vacibliyi müzakirə olunub. Qeyd edilib ki, bu sahədə beynəlxalq təcrübənin öyrənilməsi və yerli şəraitə uyğun tətbiqi korrupsiya ilə mübarizədə mühüm rol oynayır.
Sonda tədbir iştirakçıları arasında interaktiv müzakirələr aparılıb, mövzu üzrə suallar cavablandırılıb. Korrupsiyaya qarşı mübarizənin gücləndirilməsi, hüquqi və etik maarifləndirmənin artırılması və bu cür tədbirlərin davamlı təşkilinin vacibliyi bir daha vurğulanıb.
Biofizika İnstitutunun rəhbərliyi gələcəkdə də bu istiqamətdə tədbirlərin davam etdirilməsini planlaşdırır. Bu kimi tədbirlər, institut daxilində şəffaflığın təmin olunması, ictimai nəzarətin gücləndirilməsi və korrupsiyaya qarşı mübarizədə institut əməkdaşlarının fəal iştirakının təmin olunması baxımından mühüm əhəmiyyət kəsb edir.
