Biofizika İnstitutunda Zəfər Günü və Dövlət Bayrağı Günü münasibətilə tədbir keçirilib
Elm və Təhsil Nazirliyinin Biofizika İnstitutunda 8 Noyabr – Zəfər Günü və 9 Noyabr – Dövlət Bayrağı Günü münasibətilə təntənəli tədbir keçirilib.
Tədbiri İnstitutun baş direktoru, AMEA-nın müxbir üzvü, professor Oktay Qasımov açaraq iştirakçıları salamlayıb və hər iki bayramın xalqımız üçün böyük tarixi və mənəvi əhəmiyyət daşıdığını vurğulayıb. O, çıxışının əvvəlində Vətən uğrunda canını fəda etmiş bütün şəhidlərin əziz xatirəsini ehtiramla yad etməyə çağırıb.
Professor Oktay Qasımov çıxışında bildirib ki, Azərbaycan son illərdə dövlətçilik tarixinin ən parlaq və qürurverici mərhələsini yaşayır. Onun sözlərinə görə, bu gün ölkəmiz öz müstəqilliyini, suverenliyini və ərazi bütövlüyünü tam bərpa etmiş qalib dövlət kimi dünya birliyində layiqli yer tutur.
Nitqində Prezident İlham Əliyevin çıxışlarına istinad edən professor qeyd edib ki, Azərbaycanın əldə etdiyi bu Qələbə həm ədalətin, həm də sülhün təntənəsidir:
“Cənab Prezidentin də vurğuladığı kimi, biz bizdən alınanları geri qaytardıq, bizə əlavə heç nə lazım deyil. Başqasının torpağında iddiamız yoxdur. Azərbaycan dövləti sülh və ədalət prinsiplərinə əsaslanan siyasəti həyata keçirir. Əminik ki, yaxın gələcəkdə o torpaqlara tanklarla deyil, dostluq və sülh rəmzi olan minik maşınları ilə, azad və təhlükəsiz yollarla gedəcəyik,” – deyə professor Oktay Qasımov qeyd edib.
Tədbirdə Biofizika İnstitutunun “Biomolekulların strukturu, dinamikası və funksiyası” laboratoriyasının elmi işçisi Arzu Aydəmirova da çıxış edib. O, Azərbaycanın 44 günlük Vətən müharibəsində qazandığı tarixi Zəfərdən, ölkəmizin ərazi bütövlüyünün bərpasından və xalqımızın qəhrəmanlıq salnaməsindən danışıb.
Aydəmirova bildirib ki, 2020-ci ilin 8 noyabrında Şuşanın azad edilməsi ilə Azərbaycanın müasir tarixinə qızıl hərflərlə yazılan Böyük Zəfər gerçəkləşib.
“Bu qələbə xalqımızın birliyinin, Ordumuzun gücünün və Ali Baş Komandanın qətiyyətinin təntənəsidir. 44 günlük müharibə təkcə hərbi qələbə deyil, həm də milli ruhun, Vətən sevgisinin parlaq təzahürüdür. ‘Qarabağ bizimdir! Qarabağ Azərbaycandır!’ – bu, xalqımızın haqq səsi və qalibiyyət simvoludur,” – deyə o, çıxışında qeyd edib.
Sonda professor Oktay Qasımov Arzu Aydəmirovaya çıxışına görə təşəkkür edib və tədbiri yekunlaşdıraraq bildirib:
“Bu qələbə bizim qürur mənbəyimiz, gələcək nəsillər üçün isə vətənpərvərlik nümunəsidir. Allah şəhidlərimizə rəhmət eləsin, Allah Azərbaycanı qorusun.”
