Biofizika İnstitutunda Ümummilli Lider Heydər Əliyevin anım gününə həsr olunmuş tədbir keçirilib

Dekabrın 12-də AR ETN Biofizika İnstitutunda Ümummilli Lider Heydər Əliyevin anım gününə həsr olunmuş tədbir keçirilib. Tədbir iştirakçıları əvvəlcə Ulu Öndərin əziz xatirəsini bir dəqiqəlik sükutla yad ediblər.

İnstitutun baş direktoru, AMEA-nın müxbir üzvü Oktay Qasımov giriş nitqi ilə çıxış edərək, Heydər Əliyevin Azərbaycan dövlətçiliyinin möhkəmlənməsi və ölkədə sabitliyin təmin olunması sahəsindəki tarixi xidmətlərindən danışıb. O qeyd edib ki, 90-cı illərin əvvəllərində ölkə ağır iqtisadi və siyasi böhranla üzləşmişdi. Bu çətin dövrdə məhz Heydər Əliyevin müdrik idarəçiliyi sayəsində Azərbaycanda sabitlik bərpa olundu və inkişafın təməli qoyuldu. "Xarici ölkələrin nümayəndələri də vurğulayır ki, Azərbaycandakı sabitlik bir çox Avropa ölkələrində yoxdur. Bu sabitliyin əsası Ulu Öndər tərəfindən qoyulub və hazırda da davam edir," - deyə O. Qasımov qeyd edib. O həmçinin alimləri elmi nailiyyətlərin geniş təbliği istiqamətində də daha fəal olmağa çağırıb.

Tədbirdə İnteqrativ Biologiya laboratoriyasının kiçik elmi işçisi Lalə Məmmədova çıxış edərək, Ümummilli Liderin Azərbaycan xalqının yaddaşında qurucu lider və güclü dövlət xadimi kimi əbədi qaldığını vurğulayıb. O bildirib ki, Heydər Əliyev Azərbaycanın müstəqilliyini möhkəmləndirmiş, ölkəni xaosdan qurtararaq inkişaf yoluna çıxarmış böyük şəxsiyyət idi. Lalə Məmmədova əlavə edib ki, Azərbaycanın beynəlxalq aləmdə mövqeyinin möhkəmlənməsində, iri enerji layihələrinin reallaşdırılmasında Heydər Əliyevin qətiyyətli mövqeyi və uzaqgörən siyasəti mühüm rol oynayıb.

Çıxışlarda həmçinin Heydər Əliyevin Azərbaycanın ictimai-siyasi sabitliyinin bərpası, sosial-iqtisadi inkişaf strategiyasının qurulması, demokratiyanın inkişafı, insan hüquqlarının təminatı və xarici siyasət sahəsindəki xidmətləri geniş müzakirə olunub. Bakı-Tbilisi-Ceyhan neft kəməri, “Əsrin müqaviləsi” və bir çox digər mühüm layihələr Ulu Öndərin uzaqgörənliyinin nəticəsi kimi qeyd edilib.

Tədbirin sonunda Ümummilli Lider Heydər Əliyevə həsr olunmuş sənədli film nümayiş etdirilib. Film iştirakçılar tərəfindən böyük maraqla izlənilib.

Tədbiri yekunlaşdıran Oktay Qasımov bildirib: "Heydər Əliyev Azərbaycan tarixində əvəzolunmaz iz qoyan liderdir. Onun qurduğu dövlətçilik ənənələri, strateji inkişaf konsepsiyası və sabitlik siyasəti gələcək nəsillər üçün əsas yol xəritəsidir. Biz onun irsini qoruyub inkişaf etdirməliyik."

12 Dekabr 2024

Paylaş