AMEA Biofizika İnstitutunda YAP təşkilatının təsis iclası keçirildi

22 noyabr 2019-cu il tarixində AMEA Biofizka İstitutunda YAP-ın ilk partiya təşkilatının təsis iclası keçirildi. İclasda YAP Yasamal rayon təşkilatının sədri Tağı Əhmədov, YAP AMEA təşkilatının sədri Xədicə İsgəndərli və institut əməkdaşları iştirak edirdilər.

Tədbiri giriş sözü ilə institutun direktoru, AMEA-nın müxbir üzvü, fizika-riyaziyyat elmləri doktoru, professor Oktay Qasımov açaraq, bildirdi ki, iclasda məqsəd Biofizika İnstitutunda YAP təşkilatını təsis etmək və partiya sıralarına yeni qəbul edilən əməkdaşların siyahısını təqdim etməkdir.

Sonra İnstitutun “İnnovasiya və transfer üzrə” direktor müavini, tibb üzrə fəlsəfə doktoru Azad Əbdürəhimov institut əməkdaşları arasından hazırda partiya üzvü olanları və partiya sıralarına qəbul olmaq istəyənləri təqdim etdi. İclas iştirakçılarının yekdil qərarı ilə İnsitutda YAP-ın ilk partiya təşkilatı yaradıldı, partiya təşkilatının sədri t.ü.f.d. A.Əbdürəhimov seçildi və 5 nəfərdən ibarət İdarə Heyətinin tərkibi təsdiq olundu.

İclası öz çıxışı ilə davam etdirən Yeni Azərbaycan Partiyası Yasamal rayon təşkilatının sədri Tağı Əhmədov YAP-ın yaranması və inkişafı tarixindən söz açdı, partiyanın qurucusu ulu öndər Heydər Əliyevin söylədiyi “Yeni Azərbaycan Partiyası dünənin, bu günün və gələcəyin partiyasıdır” fikri tədbir iştirakçılarının diqqətinə çatdırdı.

Sonda T.Əhmədov institutda yeni yaradılan YAP işçi heyətini təbrik etdi və gələcək fəaliyyətlərində onlara uğurlar arzuladı.

22 Noyabr 2019

Paylaş