Biofizika İnstitutunun Elmi Şurasının iclası keçirilib

İyun ayının 16-da  AR Elm və Təhsil Nazirliyinin Biofizika İnstitutunun Elmi Şurasının növbəti iclası keçirilib.

İnstitutun baş direktoru, AMEA-nın müxbir üzvü Oktay Qasımovun sədrliyi ilə keçirilən iclasda AR ETN Biofizika İnstitutunun “Molekulyar və hüceyrə immunologiyası” laboratoriyasının adının “Hüceyrə siqnalının ötürülməsi” laboratoriyası kimi dəyişdirilməsi və “Hüceyrə siqnalının ötürülməsi” laboratoriyasına müsabiqə keçirilənə qədər b.e.n. Taleh Yusifovun laboratoriya rəhbəri vəzifəsini icra edən təyin edilməsi müzakirə olunub.

Daha sonra bir sıra cari məsələlər ətrafında fikir mübadiləsi aparılıb. Qeyd olunub ki, AR ETN Biofizika İnstitutunun “Molekulyar və hüceyrə biokimyası” laboratoriyasının elmi işçisi Mətanət Baxışova və kiçik elmi işçisi Günay Əliyeva 14 iyun 2023-cü il tarixində “Bayramlı Group”un təşkilatçılığı ilə Bakının Hilton hotelində keçirilmiş “Decoding the dPCR Landscape: Diagnostics and Life Science Applications” adlı konfransında iştirak etmişlər. M. Baxışova bildirdi ki, konfrans zamanı Digital PCR və Digital Droplet PCR-ın klassik və real taym PCR metodlarından fərqi və nə kimi üstünlüklərinin olduğu izah edildi, həmçinin yeni nəsil PCR-ların bitki patogenlərinin, GMO-nun təyinində və qida təhlükəsizliyində, zoonotik xəstəliklərin aşkar edilməsində və onkologiyada tətbiqindən danışıldı.

QƏRARA ALINDI:

1. AR Elm və Təhsil Nazirliyinin Biofizika İnstitutunun “Molekulyar və hüceyrə immunologiyası” laboratoriyasının adı “Hüceyrə siqnalının ötürülməsi” laboratoriyası kimi dəyişdirilsin.

2. Biologiya elmləri namizədi Taleh Nəsib oğlu Yusifov “Hüceyrə siqnalının ötürülməsi” laboratoriyasına müsabiqə keçirilənə qədər laboratoriya rəhbəri vəzifəsini icra edən təyin edilsin.

16 İyun 2023

Paylaş