“Xərçəng kök hüceyrəsi çalışmaları və müasir genetik testlər” mövzusunda elmi seminar keçirilib

Azərbaycan Respublikası Elm və Təhsil Nazirliyinin Biofizika İnstitutunda “Xərçəng kök hüceyrəsi çalışmaları və müasir genetik testlər” mövzusunda elmi seminar keçirilib.

Seminarı giriş sözü ilə açan Biofizika İnstitutunun icraçı direktoru, b.e.d. Kərim Qasımov Türkiyənin Ege Universitetinin postdoktor tədqiqatçısı Ph.D. Günel Muxtarovanı və seminar iştirakçılarını salamlayaraq onkologiya sahəsində bu kimi maarifləndirici tədbirlərin keçirilməsinin əhəmiyyətindən danışıb, beynəlxalq əməkdaşlıq çərçivəsində baş tutan elmi seminarların alim və gənc mütəxəssislərimiz üçün faydalı olduğunu vurğulayıb.

Sonra, Ph.D. Günel Muxtarova çıxış edərək, Xərçəng kök hüceyrəsi (XKH), şiş toxumasında aşkar edilmiş, normal kök hüceyrələrlə bir çox ortaq xüsusiyyətləri paylaşan kiçik hüceyrə yarım populyasiyası ilə xərçəng xəstələrində ənənəvi müalicəyə qarşı müqavimətin inkişafı, xəstəliyin təkrarlanması və metastaz arasındakı əlaqə, fərdiləşdirilmiş genetik testlər barədə maraqlı elmi məlumatlar verib. XKH-lərin müvəffəqiyyətlə hədəflənməsi və aradan qaldırılması xərçəng xəstəliyinin müalicəsinin əsas problemlərindən olduğunu və bu problemi aradan qaldırmaq üçün XKH-ləri düzgün müəyyənləşdirməyin və xarakterizə etməyin, mümkün XKH biomarkerlərini yaratmağın və yeni hədəf terapiya strategiyalarını hazırlamağın vacibliyini vurğulayıb.

Məruzə dinlənildikdən sonra Biofizika İnstitutunun baş direktoru, AMEA-nın müxbir üzvü Oktay Qasımov, icraçı direktoru, biologiya elmləri doktoru Kərim Qasımov, Milli Onkologiya Mərkəzinin laboratoriya müdiri, biologiya üzrə fəlsəfə doktoru Leylaxanım Məlikova, f.r.e.n., dos. İbrahim Abbasov (ADNSU), b.e.n., dos. Gülnar Sultanova (AR ETN Botanika İnstitutu), Hafiz Osmanov (Azərbaycan Tibb Universiteti, Biokimya kafedrası, k.e.i.), Hüseyn Abıyev (Azərbaycan Tibb Universiteti, Tibbi və bioloji fizika kafedrasının professoru), Aleksandra Quliyeva (AR Milli Onkologiya Mərkəzi, Molekulyar Onkologiya laboratoriyasında stajor) və digərləri çıxış edərək mövzu ilə bağlı sual və fikirlərini bildiriblər.

Sonda seminara yekun vuran professor Oktay Qasımov maraqlı və məzmunlu məruzəyə görə Ph.D. Günel Muxtarovaya iştirakçılar və institut rəhbərliyi adından təşəkkür edib.

06 Sentyabr 2023

Paylaş