Biofizika İnstitutunun dissertantı Arzu Aydəmirovanın Fizika İnstitutunda dissertasiya işinin ilkin müzakirəsi keçirilib

Elm və Təhsil Nazirliyi Biofizika İnstitutunun dissertantı Arzu Aydəmirovanın elmi işinin ilkin müzakirəsi Fizika İnstitutunda təşkil olunub. Tədbirdə Bioifizika və Fizika institutunun alim və mütəxəssisləri iştirak edərək tədqiqatın aktuallığını və əhəmiyyətini müzakirə ediblər.

Müzakirədə Arzu Aydəmirova çıxış edərək dissertasiya işinin əsas məqsədləri və əldə olunan nəticələri barədə məlumat verib. O qeyd edib ki, dissertasiya işi müxtəlif nano-quruluşlu metal səthlər üzərində zülal modeli kimi ipək fibroini zülalının və insanın qan nümunələrinin SERS (Raman Yayılan Səth Gücləndirilmiş Spektroskopiyası) metodu ilə tədqiqinə, sağlam və ağciyər karsinoması qruplarına aid olan qan plazması nümunələrinin infraqırmızı (FTIR) spektrlərinə əsaslanaraq süni intellekt vasitəsilə klassifikasiyasına həsr olunub.

Dissertasiya işində vurğulanıb ki, xərçəng xəstəliklərinin əksər hallarda son mərhələdə aşkar olunması və bu səbəbdən ölüm hallarının artması xəstəliyin vaxtında diaqnostikasını təmin edəcək ucuz, sürətli və minimal invaziv metodların inkişafını zəruri edir. Təklif edilən metod, xəstəliyin ilkin mərhələlərdə aşkarlanmasına və müalicə şansının artırılmasına şərait yaradır.

Tədqiqatda həmçinin xərçəng xəstələrində hüceyrə-lipid tərkibindəki dəyişikliklərə diqqət yetirilib. Bu dəyişikliklər qan plazmasının lipid komponentlərində də müşahidə oluna bilər. Lipid fraksiyalarından əldə olunan FTIR spektrləri üzrə nəticələr xəstəliyin diaqnozunda istifadə olunaraq tədqiqatın dəqiqliyini artırır və klassifikasiyanın daha effektiv həyata keçirilməsinə imkan yaradır.

Tədbir iştirakçıları tədqiqatın nəticələrini yüksək qiymətləndirərək, dissertasiya işinin elmi yeniliklərini və onun gələcək tətbiq imkanlarını təqdir ediblər.