ETN-nin Biofizika İnstitutu və AR SN Milli Onkologiya Mərkəzinin birgə tədqiqatları beynəlxalq jurnalda çap olunub

Elm və Təhsil Nazirliyinin Biofizika İnstitutunun və Azərbaycan Respublikası Səhiyyə Nazirliyinin Milli Onkologiya Mərkəzinin alimləri ilə birgə apardığı iş yüksək impakt faktorlu “Acta Naturae” jurnalında çap olunub. O. K. Gasymov, M. J. Bakhishova, R. B. Aslanov, L. A. Melikova, J. A. Aliyev, Membrane Partitioning of TEMPO Discriminates Human Lung Cancer from Neighboring Normal Cells, ACTA NATURAE, 2023, v15(59), 111-119.

      Məqalədə 2,2,6,6-tetramethylpiperidine-1-oxyl (TEMPO) spin zondunun insan ağciyər normal və karsinoma hüceyrələrində paylanmasını tədqiq edərək, lipid kompozisiyasının hüceyrəyə təsiri qiymətləndirilmişdir. Məqsəd membran xüsusiyyətlərinə əsaslanaraq xərçəng xəstəliyinin müalicəsi üçün potensial strategiyaları aşkar etmək idi. Tədqiqat normal və xərçəng hüceyrələrinin mikromühitlərinə uyğun olaraq pH-ın 7.3 və 6.2 qiymətlərində aparılmışdır. Kimya terapiyasında istifadə edilən yerli hipertermiyanın effektivliyini aşkar etmək üçün TEMPO-nun paylanması  283K-317K temperatur intervalında təyin edilmişdir. Nəticələr göstərir ki, insan ağciyər xərçəngi hüceyrələrinin membranları üçün TEMPO-nun membrana daxil olma əmsalı qonşu normal hüceyrələrlə müqayisədə xeyli yüksəkdir. C12SL (laurik turşunun spin-nişanlı analoqu) ilə əldə edilən nəticələr göstərir ki, xərçəng hüceyrələrinin nisbi yüksək membran dinamikası onlarda müşahidə olunan yüksək TEMPO paylanması üçün mümkün mexanizm ola bilər. TEMPO və onun törəmələri xərçəng tədqiqatlarında teranostik agent kimi qəbul edilir. Məqalədə göstərilir ki, TEMPO törəmələrindən istifadə etməklə, xərçəng xəstələrinə tətbiq edilən standart kimya terapiyası üçün tamamlayıcı alkalizasiya və hipertermiyanın effektivliyini əvvəlcədən yoxlamaq olar. Bu iş xərçəng xəstəliklərinin müalicəsində fərdi yanaşmanı təmin edən faktorlardan biridir.

26 Dekabr 2023

Paylaş