Biofizika İnstitutunun əməkdaşları “Gənc Tədqiqatçıların IX Beynəlxalq Elmi Konfransı”nda çıxış ediblər
Biophysics.az saytı muallim.edu.az saytına istinadən bildirir ki, 23 may 2025-ci il tarixində Bakı Mühəndislik Universiteti (BMU) və Dövlət Gömrük Komitəsi Akademiyasının birgə təşkilatçılığı ilə Ulu Öndər Heydər Əliyevin anadan olmasının 102-ci ildönümünə həsr olunmuş “Gənc Tədqiqatçıların IX Beynəlxalq Elmi Konfransı” öz işinə başlayıb.
Tədbir şəhidlərin xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb. Konfransın açılış mərasimində BMU-nun elm və innovasiya məsələləri üzrə prorektoru Ağası Məlikov və Dövlət Gömrük Komitəsi Akademiyasının rəis müavini Cəmilə Namazova çıxış edərək tədbirin əhəmiyyətindən, elmin və təhsilin inkişafında gənclərin rolundan danışıblar. Qeyd olunub ki, builki beynəlxalq tədbirə Polşa, Norveç, Gürcüstan, Rusiya və Pakistan da daxil olmaqla müxtəlif ölkələrdən tədqiqatçılar qatılıb. 472 elmi məqalə arasından 357-si seçilərək təqdim olunmaq hüququ qazanıb.
Konfransda AR Elm və Təhsil Nazirliyi Biofizika İnstitutunun əməkdaşları da fəal iştirak ediblər. İnstitutun “Molekulyar və hüceyrə biokimyası” laboratoriyasının kiçik elmi işçisi Fidan Qüdrətova “İnsan BK ion kanalında daxilində yeni funksional quruluş” mövzusunda çıxış edib. Məruzədə ion kanallarının struktur xüsusiyyətləri və onların hüceyrədaxili funksiyalara təsiri tədqiq olunub.
Həmin laboratoriyanın digər əməkdaşı, kiçik elmi işçi Sevda Mahmudova isə “Her2-her3 süd vəzi və ağciyər xərçəngi, beyin metastazlarının terapiyası” mövzusunda təqdimatla çıxış edərək onkoloji xəstəliklərin molekulyar hədəfli müalicə üsulları haqqında məlumat verib.
“Hüceyrə siqnalının ötürülməsi” laboratoriyasının kiçik elmi işçisi Aysel Əliyeva isə “Hemlə idarə olunan bioelektrik siqnallarının ötürülməsi mexanizmi” mövzusunda məruzə ilə çıxış edərək hüceyrədaxili elektrik siqnalının idarə olunmasında hemin molekulunun rolu barədə tədqiqat nəticələrini təqdim edib.
İnstitut əməkdaşlarının çıxışları konfrans iştirakçıları tərəfindən maraqla qarşılanıb, mövzular elmi ictimaiyyət tərəfindən yüksək qiymətləndirilib. Təqdimatlardan sonra iştirakçılara sertifikatlar təqdim olunub.
Biofizika İnstitutu gənc tədqiqatçılarının beynəlxalq səviyyəli elmi platformalarda fəal iştirakı və əldə etdikləri nəticələr institutun elmi potensialının inkişafı və beynəlxalq elmi inteqrasiyası baxımından mühüm əhəmiyyət kəsb edir.
