Qazaxda “Gənc alimlərin yay düşərgəsi” keçirilib
21–26 avqust 2025-ci il tarixlərində “Milli dəyərlərlə rəqəmsal gələcəyə” şüarı altında Qazax Olimpiya İdman Kompleksində gənc alim və tədqiqatçıların iştirakı ilə “Gənc alimlərin yay düşərgəsi” təşkil olunub.
Düşərgə Qazax Rayon İcra Hakimiyyətinin və Qazax-Tovuz Regional Gənclər və İdman İdarəsinin birgə təşkilatçılığı ilə baş tutub. Tədbir çərçivəsində iştirakçılar Qazax rayonuna səfər edib, şəhərin tarixi və mədəniyyət abidələrinə ekskursiya ediblər.
Elm və Təhsil Nazirliyinin Biofizika İnstitutunun əməkdaşı, İnstitutun Gənc Alim və Mütəxəssislər Şurasının sədri Mətanət Baxışova düşərgədə təmsil olunub. O, yaradılan şəraitə görə Azərbaycan Respublikasının Gənclər və İdman Nazirliyinə, xüsusilə Nazirliyin nümayəndəsi Kənan Kərimova, həmçinin AMEA Gənc Alim və Mütəxəssislər Şurasına, şuranın sədri Elmir M. Babayev başda olmaqla bütün idarə heyətinə təşəkkürünü bildirib.
Mətanət Baxışova qeyd edib ki, düşərgə gənclərin elmi biliklərini artırmaq, qarşılıqlı əməkdaşlıq əlaqələrini gücləndirmək, yeni dostluqlar qurmaq baxımından əhəmiyyətli platforma rolunu oynayıb. Tədbirin sonunda iştirakçılara sertifikatlar təqdim olunub.
