Biofizika İnstitutunda elmlər doktoru və fəlsəfə doktoru hazırlığı üzrə doktorant və dissertantların növbəti attestasiyası keçirilib

15 oktyabr 2025-ci il tarixində Azərbaycan Respublikası Elm və Təhsil Nazirliyinin Biofizika İnstitutunda elmlər doktoru və fəlsəfə doktoru hazırlığı üzrə doktorant və dissertantların növbəti attestasiyası keçirilib.

İclası Attestasiya Komissiyasının sədri, biologiya elmləri doktoru Kərim Quli oğlu Qasımov açaraq iştirakçıları salamlayıb və attestasiyanın məqsədi, vəzifələri barədə məlumat verib. O, çıxışında institutda aparılan elmi tədqiqatların yüksək səviyyədə həyata keçirilməsinin, doktorant və dissertantların elmi fəaliyyətinin səmərəliliyinin artırılmasının, həmçinin əldə olunan nəticələrin ölkənin elmi inkişafına töhfə verməsinin vacibliyini qeyd edib. Kərim Qasımov elmi kadr hazırlığının keyfiyyətinə xüsusi diqqət yetirilməsinin, gənc tədqiqatçıların beynəlxalq elmi mühitə inteqrasiyasının əhəmiyyətini vurğulayıb.

Daha sonra elmlər doktoru (qiyabi) hazırlığı üzrə doktorantlar b.ü.f.d., dosent Taleh Yusifov, b.ü.f.d. Leylaxanım Məlikova, b.ü.f.d., dosent Ruhiyyə Quliyeva, eləcə də fəlsəfə doktoru hazırlığı üzrə (qiyabi) doktorant Cəfər Nərminə və fəlsəfə doktoru hazırlığı üzrə dissertant Sevil Rəhmanova attestasiyada iştirak edərək öz elmi-tədqiqat işləri barədə ətraflı hesabat təqdim ediblər.

Hesabatlar dinlənildikdən, elmi tədqiqatların nəticələri müzakirə olunduqdan və doktorantlara verilən suallar cavablandırıldıqdan sonra Attestasiya Komissiyası yekun qərar qəbul edib.

Qərara əsasən, Azərbaycan Respublikası Elm və Təhsil Nazirliyinin Biofizika İnstitutunun elmlər doktoru və fəlsəfə doktoru hazırlığı üzrə doktorant və dissertantlarının 2025-ci il üzrə attestasiyası məqbul hesab edilib.