Biofizika İnstitutunun Elmi şurasının növbəti iclasında laboratoriyaların 2025-ci il üzrə hesabatı dinlənilib

25 noyabr 2025-ci il tarixində Elm və Təhsil Nazirliyinin Biofizika İnstitutunda Elmi Şuranın növbəti iclası keçirilib. İclasa institutun baş direktoru, AMEA-nın müxbir üzvü, professor Oktay Qasımov sədrlik edib.

İlk olaraq Biomolekulların strukturu, dinamikası və funksiyası laboratoriyasının 2025-ci il üzrə hesabatı təqdim olunub. Laboratoriyanın elmi işçisi Mətanət Baxışova il ərzində xüsusi sintez olunmuş anti-xərçəng C16-EQRPR lipopeptidinin struktur-funksional xüsusiyyətlərinin öyrənilməsi, insanın qan plazmasının zülal nanozərrəciklərinin dərman daşıyıcı kimi tətbiqi imkanlarının araşdırılması, zülal aqreqasiyasının kinetik təhlili və müxtəlif mənşəli lipid nümunələrinin fiziki-kimyəvi xüsusiyyətlərinin müqayisəsi üzrə aparılmış tədqiqatlar barədə məlumat verib. O, həmçinin sağlam və xərçəngli donorların qan plazmasından lipidlərin ekstraksiyası və onların FÇİQ spektrlərinin ilkin emalı üzrə görülən işləri də diqqətə çatdırıb. Mövzunun və işlərin elmi rəhbərliyini AMEA-nın müxbir üzvü Oktay Qasımov həyata keçirib.

Daha sonra Molekulyar və hüceyrə biokimyası laboratoriyasının hesabatı laboratoriya müdiri b.e.d. Kərim Qasımov tərəfindən təqdim olunub. Hesabatda EGFR siqnal yolunun komponentləri olan HER1, HER2 və RAS genlərinin plazmid vektor sisteminə klonlaşdırılması və hüceyrələrə transformasiyası ilə bağlı görülən işlər, HER1 geninin pET-20b(+) vektoruna keçirilməsi və E. coli ştammlarında ekspressiya üçün hazırlanması kimi mərhələlər barədə məlumat verilib. O, həmçinin müxtəlif plazmid vektorların amplifikasiyası, ErbB2 və ErbB3 reseptorlarının alternativ epitop sahələrinin müəyyənləşdirilməsi və bu hədəflərin HER2-HER3-pozitiv xərçənglərin terapiyasında perspektivləri barədə əldə olunan nəticələri təqdim edib.

İclas davamında Molekulyar və hüceyrə onkologiyası laboratoriyasının 2025-ci il hesabatı laboratoriyanın həm-rəhbəri b.ü.f.d. Leylaxanım Məlikova tərəfindən təqdim olunub. O, sağlam və ağciyər karsinoması olan şəxslərin qan plazmasına əsaslanan statistik modelin təkmilləşdirilməsi, verilənlər bazasının genişləndirilməsi və karsinoma hüceyrələrinin membran xüsusiyyətlərinin müqayisəli tədqiqi istiqamətlərində aparılan işlərlə bağlı məlumat verib.

Daha sonra Biofizika İnstitutunun Gənc Alim və Mütəxəssislər Şurasının 2025-ci il üzrə fəaliyyət hesabatı dinlənilib. Hesabatı Şura sədri, e.i. Mətanət Baxışova təqdim edərək gənc tədqiqatçılar üçün təşkil olunmuş tədbirlər, həyata keçirilən layihələr, əldə olunan elmi nəticələr, beynəlxalq təcrübə proqramlarında iştirak, seminar və konfranslarda çıxışlar, elmi işlərin nəşri və KİV-də maarifləndirici fəaliyyət barədə məlumat verib. Gənclərin elmi fəaliyyətə cəlb olunması və yeni imkanların yaradılması ilə bağlı təkliflər müzakirə olunub.

Hesabatlarla bağlı suallar cavablandırıldıqdan sonra professor Oktay Qasımov təqdim olunan illik fəaliyyət sənədlərinin təsdiqi üçün səsvermə keçirib. Elmi Şura üzvləri laboratoriyaların və Gənc Alim və Mütəxəssislər Şurasının hesabatlarını yekdilliklə məqbul hesab ediblər.