BDU-da “Fizikada müasir trendlər” mövzusunda IX Beynəlxalq elmi konfrans keçirilir
Bakı Dövlət Universiteti (BDU), Türkiyənin Orta Doğu Texniki Universiteti, Ankara Universiteti, Qazi Universiteti, Ege Universiteti və Kocaeli Universiteti, Çinin Anhui Universiteti, Moldova Dövlət Universitetinin Tətbiqi Fizika İnstitutu, ABŞ-ın “Case Western Reserve” Universiteti, Pakistanın COMSATS Universiteti və Lahor Universiteti, Macarıstanın Zeqed Universiteti və Rumıniyanın Milli Materiallar Fizikası İnstitutunun birgə təşkilatçılığı ilə “Fizikada müasir trendlər” (“Modern Trends in Physics”) mövzusunda IX Beynəlxalq elmi konfrans keçirilir.
Konfransda AR ETN Biofizika İnstitutunun baş direktoru, AMEA-nın müxbir üzvü, fizika üzrə elmlər doktoru Oktay Qasımov və institutun elmi işçisi Mətanət Baxışova plenar iclasda məruzə ilə çıxış ediblər. Məruzələrdə xərçəng xəstəliyinin inkişafında xərçəng ətrafı mühitinin və metabolizmin rolu, həmçinin metabolik dəyişikliklərin morfoloji dəyişikliklərdən əvvəl baş verə bilməsi barədə müasir elmi nəticələr təqdim olunub. Qeyd edilib ki, metabolik profilləndirmənin morfoloji göstəricilərlə birlikdə tətbiqi diaqnostikanın dəqiqliyini artırmağa imkan verir. Çıxışlar iştirakçılar tərəfindən maraqla qarşılanıb və müzakirələrə səbəb olub.
Konfransın bölmə iclaslarında Biofizika İnstitutunun əməkdaşları və magistrantları da fəal iştirak ediblər. Elmi işçi Aidə Məmmədzadə “The role of Congo red in the determination of aggregates in silk fibroin solution”, Aytac Məmmədova “Optical and structural analyses of the sericin–rhodamine 6G interaction”, Mətanət Baxışova isə “The effect of hyperthermia and alkalization on the distribution dynamics of anti-cancer agents in lung cancer” mövzularında çıxış ediblər. Magistrantlar Təhminə Əliyeva “Expression and purification of the cytochrome C-like domain of the human BK channel”, Aytən Sayyablı isə “Interplay between bioelectrical and EGFR signaling pathways as a novel approach in cancer therapy” mövzularında məruzə ediblər. Səsləndirilən məruzələr konfrans iştirakçıları tərəfindən yüksək maraqla qarşılanıb.
