BİOFİZİKA İNSTİTUTU
AZƏRBAYCAN RESPUBLİKASI ELM VƏ TƏHSİL NAZİRLİYİ
Bu anım tədbiri Vətən uğrunda canlarını fəda edən qəhrəman şəhidlərimizin əziz xatirəsini yad etmək məqsədi daşıyırdı. Tədbirin rəsmi açılışını edən İnstitutun baş direktoru, AMEA-nın müxbir üzvü, professor Oktay Qasımov çıxışında, öncə tədbir iştirakçılarını salamlayaraq bu xüsusi günün əhəmiyyətinə toxunub. O, Azərbaycanın işğal altında olan torpaqlarının azad edilməsində qəhrəmanlıq göstərən, xalqımızın tarixi qələbəsinə imza atan və bu uğur yolunda həyatlarını fəda edən igid şəhidlərimizə Allahdan rəhmət diləyib. Oktay Qasımov vurğulayıb ki, Vətən yolunda canından keçən hər bir şəhid xalqımızın yaddaşında əbədi olaraq yaşayacaq və onların göstərdiyi qəhrəmanlıq hər zaman böyük qürurla xatırlanacaq.
Sonra o, bütün iştirakçıları bu müqəddəs amal uğrunda həyatlarını qurban verən şəhidlərimizin ruhunu ehtiramla anmaq üçün bir dəqiqəlik sükut etməyə dəvət edib. Sükutla başlayan tədbir, şəhidlərimizin mübarizəsi, xalqımızın birlik və həmrəyliyi haqqında dərin fikirlərin bildirildiyi, həmçinin qələbənin qazanılmasında fədakarlıq göstərən hər bir vətəndaşın rolunun vurğulandığı çıxışlarla davam edib. Tədbirdə Vətən müharibəsi qəhrəmanlarının, qazilərimizin və şəhid ailələrinin də şücaətindən geniş bəhs olunub, onların fədakarlığına xüsusi hörmət ifadə edilib.
Daha sonra institutun Gənc Alim və Mütəxəssislər Şurasının üzvü, Molekulyar və Hüceyrə Biokimyası laboratoriyasının kiçik elmi işçisi Fidan Qüdrətova geniş məruzə ilə çıxış edib. O, çıxışında 44 günlük Vətən müharibəsi zamanı xalqımızın nümayiş etdirdiyi misilsiz birlikdən bəhs edib. Fidan Qüdrətova qeyd edib ki, cəmiyyətin bütün təbəqələri bu çətin günlərdə vahid məqsəd ətrafında birləşərək vətən uğrunda mübarizəyə hazır olduqlarını göstərdilər. O, xüsusi olaraq müharibə zamanı igid əsgərlərimizin göstərdiyi qəhrəmanlıq və fədakarlığa toxunaraq, onların cəsarət və vətənpərvərlik ruhunun tariximizin şanlı səhifələrinə qızıl hərflərlə yazıldığını vurğulayıb.
Məruzəçi, Azərbaycanın ərazi bütövlüyünün bərpasında və düşmən işğalından torpaqlarımızın azad edilməsində canlarını fəda edən şəhidlərimizin qəhrəmanlığını yüksək qiymətləndirərək, onların hər birinin əziz xatirəsinin xalqımız üçün müqəddəs olduğunu dilə gətirib. O, şəhidlərimizin vətən sevgisi və mübarizliyinin gələcək nəsillər üçün əsl örnək olduğunu qeyd edərək, bütün şəhidlərimizə Allahdan rəhmət diləyib. Fidan Qüdrətova, həmçinin, müharibənin Azərbaycan xalqının tarixində yeni bir dövr açdığını və bu zəfərin yalnız hərbi qələbə deyil, eyni zamanda milli ruhun yüksəlişi və birlik simvolu olduğunu vurğulayıb.
Sonda professor Oktay Qasımov çıxış edərək, Azərbaycanın tarixi zəfərinin xalqımız üçün nə qədər böyük əhəmiyyət kəsb etdiyini bir daha vurğulayıb. O, Vətən uğrunda canını fəda edən şəhidlərimizin qəhrəmanlığının heç vaxt unudulmayacağını və onların xatirəsinin həmişə ehtiramla yad ediləcəyini qeyd edib. Prof. O.Qasımov, Azərbaycanın güclü ordusu və xalqının birliyi sayəsində əldə olunan bu qələbənin, bölgədə sülhün və sabitliyin təmin edilməsi üçün də mühüm rol oynadığını vurğulayıb.
Oktay Qasımov çıxışında Azərbaycan və Ermənistan arasında sülh prosesinin vacibliyinə də toxunub. O, Ermənistanın baş naziri Nikol Paşinyanın Azərbaycanın tələblərinə uyğun olaraq sülh sazişini imzalayacağı və bununla əlaqədar Ermənistan Konstitusiyasında dəyişikliklər etməyə hazır olduğunu bildirməsini müsbət addım kimi qiymətləndirib. Professor O.Qasımov əlavə edib ki, bu cür diplomatik səylər bölgədə davamlı sülhün və inkişafın təmin edilməsinə xidmət edəcək və Azərbaycan xalqının zəfər ruhu ilə qazandığı bu tarixi nailiyyətlər bölgədə uzunmüddətli sabitliyin əsasını qoyacaq.
27 Sentyabr 2024
Paylaş
