AMEA-nın müxbir üzvü İlham Şahmuradov Avropa Biotexnologiya konqresində iştirak edib

Azərbaycan Respublikası Elm və Təhsil Nazirliyinin Biofizika İnstitutunun və Genetik Ehtiyatlar İnstitutunun əməkdaşı, AMEA-nın müxbir üzvü İlham Şahmuradov Avropa Biotexnologiya Konqresində məruzə ilə iştirak edib.

Türkiyənin İstanbul şəhərində Avropa Biotexnologiya Tematik Şəbəkələri Assosiasiyası (ABTŞA; European Biotechnology Thematic Network Association, EBTNA; https://www.ebtna.eu/) tərəfindən təşkil edilən Avropa Biotexnologiya Konqresi keçirilib. 15 ölkədən (Birləşmiş Krallıq, Avstriya, Fransa, Türkiyə və s.) 200 tədqiqatçının iştirak etdiyi Konqresdə Azərbaycan Respublikası Elm və Təhsil Nazirliyinin Biofizika İnstitutunun İnteqrativ Biologiya laboratoriyasının rəhbəri və Genetik Ehtiyatlar İnstitutunun Mərkəzi Məlumat Bazası qrupunun baş elmi işçisi, ABTŞA-nın Azərbaycan üzrə Milli Koordinatoru, biologiya elmləri doktoru, AMEA-nın müxbir üzvü İlham Şahmuradov “Məməlilərin və bitkilərin annotasiya olunmuş mRNT-lərindəki əlavə Açıq Oxuma Çərçivələri naməlum zülallar kodlaşdıra bilər” mövzusunda şifahi məruzə ilə çıxış edib, həmçinin elmi sessiyalardan birinə sədrlik edib. Konqres zamanı bir sıra alimlərlə elmi əməkdaşlıq üzrə işgüzar müzakirələr aparılıb. ABTŞA-nın prezidenti, professor Munis Dündar, Azərbaycan alimlərinin bu təşkilatda daha geniş və fəal təmsil olunmalarını arzulayıb.

09 Oktyabr 2024

Paylaş