Gənc alimin elmi məruzəsi dinlənilib

İyunun 25-də AMEA-nın Biofizika İnstitutunda növbəti onlayn elmi seminar keçirilib.

Seminarı giriş sözü ilə institutun baş direktoru, AMEA-nın müxbir üzvü Oktay Qasımov açaraq tədbir iştirakçılarına məruzənin mövzusu və məruzəçi barədə məlumat verib.

Sonra institutun Biomolekulların strukturu, dinamikası və funksiyası laboratoriyasının mühəndisi Aytac Məmmədova “Flüoresensiyanın əsasları. Stasionar və zamanla ayırdedilmiş flüoresensiya” mövzusunda məruzəsini təqdim edib.

Gənc alim məruzəsində hidrofob ANS zülal bağlayıcı qruplarının təsviri, mövzu üzrə aparılan tədqiqatlar və alınan nəticələr haqqında ətraflı məlumat verib. Hazırda laboratoriyada birgə aparılan işlərdə 8-anilino-1-naftalensülfon turşusu (ANS), müxtəlif vəziyyətlərdəki zülalları xarakterizə etmək üçün xarici fluoressent zond kimi istifadə olunduğunu qeyd edən məruzəçi əridilmiş qlobulyar vəziyyətdə ANS flüoresensiyasının artması hidrofob zülal qruplarının su molekuluna əlçatan olduğunu göstərdiyini bildirib. Məruzəçinin sözlərinə görə, aparılan tədqiqatların  nəticələri göstərib ki, ANS,  Alzheymer, Parkinson və s. kimi ciddi xəstəliklərlə əlaqəli amiloid fibrillərinin kinetikasını və yaranma mexanizmini öyrənmək üçün dehidratlaşdırılmış, habelə hidratlaşdırılmış zülal aqreqatlarının xarakteristikası üçün tətbiq oluna bilər.

Sonda məruzə ətrafında suallar cavablandırılıb, müzakirələr aparılıb.

25 İyun 2021

Paylaş