Biofizika İnstitutunun Elmi şurasının iclasında bir sıra mühüm məsələlər müzakirə edilib

İyunun 14-də AMEA Biofizika İnstitutunun Elmi Şurasının növbəti iclası keçirilib.

İclası Elmi şuranın sədri, institutun baş direktoru, AMEA-nın müxbir üzvü Oktay Qasımov açaraq Şura üzvlərini gündəlikdəki məsələlərlə tanış edib.

O, 3 iyun 2022-ci il tarixində AMEA Rəyasət Heyətinin “TEKNOFEST Azərbaycan” Aviasiya, Kosmos və Texnologiya festivalında AMEA-nın iştirakının nəticələrinə həsr olunmuş xüsusi iclasından irəli gələn tapşırıqlar və qarşıda duran vəzifələr haqqında Elmi şura üzvlərinə geniş məlumat verib. O.Qasımov institutda yeni texnologiyaların inkişafı istiqamətində aparılan elmi-tədqiqat işlərinin yeni səviyyəyə yüksəldilməsi və 2023-cü ildə Türkiyənin Samsun şəhərində keçiriləcək 6-cı “TEKNOFEST” Festivalında institutun daha da fəal iştirakını təmin etmək məqsədi ilə laboratoriya rəhbərlərinə müvafiq tapşırıq və tövsiyyələrini çatdırıb.

Daha sonra “TEKNOFEST Azərbaycan” Festivalı çərçivəsində AMEA Biofizika İnstitutunu uğurla təmsil etdiyinə görə İnstitutun elmi işçisi Arzu Hətəmşah qızı Aydəmirova Fəxri Diplomla təltif edilib. Mükafatı A.Aydəmirovaya təqdim edən institutun baş direktoru Oktay Qasımov müəssisənin rəhbərliyi və kollektivi adından tədqiqatçını təbrik edib, gələcək elmi və ictimai fəaliyyətində ona uğurlar arzulayıb.

Sonda institutun vakant elmi işçi vəzifələrinin tutulması ilə bağlı gizli səsvermə keçirilib. Səsvermənin nəticələrinə əsasən, Aidə Mayil qızı Məmmədzadə “Biomolekulların strukturu, dinamikası və funksiyası” laboratoriyasına elmi işçi, Ləman Mehman qızı Süleymanova “Biomolekulların strukturu, dinamikası və funksiyası” laboratoriyasına elmi işçi, Mətanət Ceyhun qızı Mansurova “Molekulyar və hüceyrə biokimyası” laboratoriyasına elmi işçi, Banu Qubad qızı Ağamalıyeva “Molekulyar və hüceyrə biokimyası” laboratoriyasına kiçik elmi işçi, Sevda Ayaz qızı Mahmudova “Molekulyar və hüceyrə biokimyası” laboratoriyasına kiçik elmi işçi vəzifəsinə seçiliblər. Həmçinin Nuranə Firuz qızı Əliyeva  “İnteqrativ biologiya birgə” laboratoriyasına elmi işçi vəzifəsini icra edən, Aysel Çingiz qızı Əliyeva isə “İnteqrativ biologiya birgə” laboratoriyasına kiçik elmi işçi vəzifəsini icra edən (3 aylıq sınaq müddətinə) seçiliblər.

14 İyun 2022

Paylaş