Rasim Aslanovu 70 illik yubileyi münasibətilə təbrik edirik!

Bu gün Biofizika İnstitutunun “Biomolekulların strukturu, dinamikası və funksiyası”  laboratoriyasının aparıcı elmi işçisi, fizika-riyaziyyat üzrə fəlsəfə doktoru, dosent Rasim Bəxtiyar oğlu Aslanovun 70 yaşı tamam olur.

Rasim Bəxtiyar oğlu Aslanov 1952-ci il oktyabr ayının 19-da Gədəbəy rayonunun Fərzalı kəndində ziyalı ailəsində dünyaya göz açıb. 1970-ci ildə Sumqayıt şəhəri 13 nömrəli orta məktəbi bitirərək, Bakı Dövlət Universitetinin Fizika fakültəsinə daxil olub.

Alim ilk əmək fəaliyyətinə 1972-ci ildə Bakı Dövlət Universitetinin Fizika fakültəsinin yarımkeçiricilər fizikası kafedrasında başlayıb.  1974-cü ildən 2002-ci ilə kimi Azərbaycan Milli Elmlər Akademiyasının H.M.Abdullayev adına Fizika İnstitutunda laborant, baş laborant, mühəndis, böyük mühəndis, kiçik elmi işçi, elmi işçi və böyük elmi işçi vəzifələrində çalışıb.

1981-1985-ci illərdə Moskva şəhərində Kimyəvi Fizika İnstitutunun Radiospektroskopiya laboratoriyasında təcrübə keçib. Həmin illərdə fibrilyar zülalların quruluşu Elektron Paramaqnit Rezonans üsulu ilə Ultra Bənövşəyi şüaların təsirindən sonra öyrənilmişdir və bu mövzuda 1988-ci ildə namizədlik dissertasiyasını müdafiə etmişdir.

2002-ci ildən 2010-cu ilin sentyabr ayına kimi “Ümid” Humanitar Sosial Dayaq Mərkəzi təşkilatında instruktor vəzifəsində çalışıb. Bu müddət ərzində BP şirkətinin Azərbaycanın Qərb Bölgəsində Bakı-Tbilisi-Ceyhan neft kəməri keçən ərazisində həyata keçirdiyi “Enerjidən səmərəli istifadə və alternativ enerji mənbələrinə çıxışın yaxşılaşdırılması” layihəsi üzrə əhali arasında maarifləndirmə işləri aparıb.O, 2015-ci ildə Azərbaycan Milli Elmlər Akademiyasının 70-illiyi ilə əlaqədar olaraq elmi fəaliyyətdə xidmətlərinə görə Fəxri Fərmanla təltif edilib.

Rasim Aslanov 2016-cı ildən bu günədək Biofizika İnstitutunun “Biomolekulların strukturu, dinamikası və funksiyası” laboratoriyasında aparıcı elmi işçi vəzifəsində çalışır və institutun Həmkarlar Təşkilatının sədridir.

Alim dəfələrlə beynəlxalq konfrans və konqreslərdə iştirak edərək Azərbaycan elmini ölkəmizin hüdudlarından kənarda layiqincə təmsil edib.

Biofizika İnstitutunun kollektivi Rasim müəllimi 70 illik yubileyi münasibətilə səmimi qəlbdən təbrik edir, ona möhkəm cansağlığı, uzun ömür və elmi fəaliyyətində yeni–yeni müvəffəqiyyətlər arzulayır.

19 Oktyabr 2022

Paylaş