Florida Mehrəliyevanı 45 illik yubileyi münasibətilə təbrik edirik!

Bu gün Biofizika İnstitutunun Elmi katibi, biologiya üzrə fəlsəfə doktoru, dosent Florida Radik qızı Mehrəliyevanın 45 yaşı tamam olur.

Florida Radik qızı Mehrəliyeva 1977-ci il noyab ayının 1-də Xaçmaz rayonun Yalama kəndində anadan olub. 1994-cü ildə Bakı şəhəri 213 nömrəli orta məktəbi bitirərək, Bakı Dövlət Universitetinin Fizika fakültəsinə daxil olub. 2000-ci ildə Bakı Dövlət Universitetinin Fizika fakültəsinin “Fizika” istiqaməti ilə “İstilik fizikası və Molekulyar fizika” ixtisası üzrə ali təhsil pilləsinin magistratura səviyyəsini müvəffəqiyyətlə başa vurub.

O, 2003-cü ildə AMEA-nın Fizika İnstitutunun aspiranturasına daxil olub. 2004-cü ildən həmin institutun “Ekoloji biofizika” laboratoriyasında kiçik elmi işçi vəzifəsində elmi fəaliyyətə başlayıb və namizədlik dissertasiyası istiqamətində işlərini davam etdirib. 2014-cü ildə b.e.d., prof. T.M. Hüseynovun rəhbərliyi altında dissertasiya işini müdafiə edərək, biologiya üzrə fəlsəfə doktoru elmi dərəcəsinə layiq görülüb. 2019-cu ildə dosent elmi adını  qazanıb.

F.Mehrəliyeva 2004-cü ilin iyul ayından 2017-ci ilin fevral ayınadək AMEA-nın Fizika İnstitutunda kiçik elmi işçi, elmi işçi və böyük elmi işçi vəzifələrində çalışıb. 2017-ci ilin fevral ayından AMEA-nın Biofizika İnstitutunda böyük elmi işçi vəzifəsində,  2018-ci ildən bu günədək isə elmi katib vəzifəsində fəaliyyət göstərir.

Florida Mehrəliyevanı 45 illik yubileyi münasibətilə səmimi qəlbdən təbrik edirik, ona möhkəm cansağlığı, xoşbəxtlik və hüzur dolu neçə belə illər arzu edirik!

01 Noyabr 2022

Paylaş